មេធាវីលោកសម រង្ស៊ី ថាការប្តឹងទាស់ទៅសាលាឧទ្ធរណ៍ គឺសង្ឃឹមឈ្នះតិចតួច
មេធាវីការពារក្តីឲ្យលោកសម រង្ស៊ី គឺលោកសំ សុគង់ បានថ្លែងបញ្ជាក់ប្រាប់វិទ្យុបារាំងអន្តរជាតិនៅព្រឹកនេះថា លោកនឹងដាក់ពាក្យប្តឹងទាស់សាលក្រមរបស់សាលាដំបូងរាជធានីភ្នំពេញទៅកាន់សាលាឧទ្ធរណ៍នៅថ្ងៃចន្ទដើមសប្តាហ៍ក្រោយ។ ការប្តឹងទាស់នេះ គឺសុំឲ្យសាលាឧទ្ធរណ៍ធ្វើការជំនុំជម្រះឡើងវិញទាក់ទិនការសម្រេចឲ្យលោកសម រង្ស៊ី ចាញ់ក្តីលោកហេង សំរិន ក្នុងសំណុំរឿងបរិហារកេរ្តិ៍។ យ៉ាងណាក៏ដោយ លោកសំ សុគង់ លើកឡើងថា លោកសង្ឃឹមឈ្នះតិចតួចប៉ុណ្ណោះចំពោះការដាក់ពាក្យប្តឹងនេះ។
ចុះផ្សាយនៅថ្ងៃ៖
ស្តាប់ - ០១:៥៦
មូលហេតុសំខាន់បំផុតដែលធ្វើឲ្យលោកសំ សុគង់ ផ្តល់ក្តីសង្ឃឹមតិចតួចចំពោះការស្វែងរកយុត្តិធម៌ជូនលោកសម រង្ស៊ី នៅសាលាឧទ្ធរណ៍នោះ ក៏ព្រោះថា កូនក្តីរបស់លោកមិនមែនជាមនុស្សសាមញ្ញទូទៅ ប៉ុន្តែជាអ្នកនយោបាយ និង ជាប្រធានគណបក្សប្រឆាំងផង។ ដូច្នេះហើយ តុលាការនឹងមានភាពស្ទាក់ស្ទើរក្នុងការធ្វើសេចក្តីសម្រេចណាមួយ។ ទោះជាបែបនេះក្តី លោកមេធាវីរូបនេះ នៅតែប្រកាន់ជំហរដាក់ពាក្យប្តឹងទៅសាលាឧទ្ធរណ៍ទាំងមិនរារែក ព្រោះលោកចង់ឲ្យសាលាឧទ្ធរណ៍ធ្វើការត្រូតពិនិត្យលើសេចក្តីសម្រេចរបស់សាលាដំបូងរាជធានីភ្នំពេញ និង ធ្វើការជំនុំជម្រះឡើងវិញលើសំណុំរឿងនេះ។
ការប្តឹងទៅកាន់សាលាឧទ្ធរណ៍របស់មេធាវីការពារក្តីឲ្យលោកសម រង្ស៊ីនេះ គឺដើម្បីជំទាស់ទៅនឹងសាលក្រមរបស់សាលាដំបូងរាជធានីភ្នំពេញកាលពីថ្ងៃទី២៨កក្កដាដោយបានសម្រេចឲ្យលោកសម រង្ស៊ី ចាញ់ក្តីលោកហេង សំរិន ដែលជាប្រធានរដ្ឋសភាខ្មែរមកពីគណបក្សប្រជាជនកម្ពុជា។ លោកសម រង្ស៊ី ត្រូវបានលោក ហេង សំរិន ប្តឹងពីបទបរិហាកេរ្តិ៍ជាសាធារណៈ បន្ទាប់ពីប្រមុខគណបក្សប្រឆាំង បានបង្ហោះវីដេអូខ្លីបមួយកាលពីថ្ងៃទី១៧វិច្ឆិកាឆ្នាំមុននៅលើទំព័រហ្វេសប៊ុក ដោយបានចោទប្រកាន់របបរដ្ឋកម្ពុជាដែលដឹកនាំដោយលោក ហេង សំរិន ថាបានកាត់ទោសព្រះបរមរតនកោដ្ឋ សម្តេចព្រះ នរោត្តម សីហនុ ដោយចោទថា ជាជនក្បត់ជាតិ។ តុលាការក្រុងភ្នំពេញ បានបង្គាប់ឲ្យលោកសម រង្ស៊ី បង់ប្រាក់ពិន័យ១៦០លានរៀល ដោយ១៥០លានរៀលបង់ទៅឲ្យដើមបណ្តឹង និង ១០លានរៀលទៀតបង់ចូលជាថវិការដ្ឋ។
សូមបញ្ជាក់ថា ការសម្រេចក្តីរបស់តុលាការក្រុងភ្នំពេញនេះ គឺបានធ្វើឡើងដោយកំបាំងមុខ គឺគ្មានទាំងវត្តមានលោកសម រង្ស៊ី ហើយក៏គ្មានវត្តមានមេធាវីតំណាងណាម្នាក់ចូលរួមស្ដាប់នោះដែរ។ គឺនៅត្រង់ចំណុចនេះហើយ ដែលធ្វើឲ្យលោកមេធាវី សំ សុគង់ អាចទាញសេចក្តីសន្និដ្ឋានបានថា ការសម្រេចក្តីដោយបង្គាប់ឲ្យបង់ប្រាក់ទាំងនេះ គឺមិនមានលក្ខណៈត្រឹមត្រូវ។ ចំណែកលោកគី តិច មេធាវីការពារក្តីលោកហេង សំរិន វិញក៏យល់ថា ហាក់ដូចជាមិនត្រឹមត្រូវដែរ។ ប៉ុន្តែពាក្យមិនត្រឹមត្រូវរបស់លោកគី តិចក្នុងន័យនេះ គឺថាលោកនៅមិនទាន់ពេញចិត្តនឹងការសម្រេចឲ្យបង់ប្រាក់ពិន័យត្រឹមតែ១៥០លានរៀលទៅឲ្យកូនក្តី ព្រោះលោកចង់បានសំណងជំងឺចិត្តដល់ទៅ៣០០លានរៀលឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ