លោក សម រង្ស៊ី សរសេរលិខិតរៀបរាប់ពីស្ថានការនយោបាយកម្ពុជាបច្ចុប្បន្នប្រាប់តំណាងអឺរ៉ុប
លោកសម រង្ស៊ី ដែលដាក់ងារខ្លួនឯងថា ជាប្រធានស្តីទីអតីតគណបក្សសង្រ្គោះជាតិកាលពីថ្ងៃទី២០ ធ្នូម្សិលមិញនេះ បានសរសេរលិខិតមួយទៅលោកស្រីFederica Mogherini តំណាងជាន់ខ្ពស់នៃសហភាពអឺរ៉ុបទទួលបន្ទុកគោលនយោបាយការបរទេស និងសន្តិសុខ។ លោកសម រង្ស៊ី បានរៀបរាប់ប្រាប់លោកស្រី Mogherini ជាច្រើនពីស្ថានភាពនយោបាយកម្ពុជាបច្ចុប្បន្ន។ លោកសម រង្ស៊ីក៏បានជំរុញឲ្យសហភាពអឺរ៉ុបបន្តគាបសង្កត់មកលើរដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:០០
នៅក្នុងលិខិតកម្រាស់ពីរទំព័រជាភាសាអង់គ្លេស លោកសម រង្ស៊ី បានប្រាប់លោកស្រីFederica Mogherini តំណាងជាន់ខ្ពស់នៃសហភាពអឺរ៉ុបទទួលបន្ទុកគោលនយោបាយការបរទេស និងសន្តិសុខថា ដោយសារតែសម្ពាធអន្តរជាតិ និងជាពិសេស ការអន្តរាគមន៍របស់គណៈកម្មការអឺរ៉ុប រដ្ឋាភិបាលក្រុងភ្នំពេញកំពុងព្យាយាមបង្ហាញនូវសញ្ញាកែប្រែនៃនយោបាយរបស់ខ្លួន។ ប៉ុន្តែលោកសម រង្ស៊ី អះអាងថា សញ្ញានេះអាចធ្វើឲ្យមានការយល់ខុស ដូចនៅក្នុងករណីនៃសេចក្តីប្រកាសរបស់លោកនាយករដ្ឋមន្រ្តីហ៊ុន សែន ស្តីពីការផ្តល់នីតិសម្បទាដល់បណ្តាថ្នាក់ដឹកនាំអតីតគណបក្សសង្រ្គោះជាតិឡើងវិញតែតម្រូវឲ្យពួកគេធ្វើលិខិតស្នើទៅកាន់រដ្ឋាភិបាលកម្ពុជា។
នៅត្រង់ចំណុចនេះ លោកសម រង្ស៊ី បានសង្កត់ធ្ងន់ថា លោកនាយករដ្ឋមន្រ្តីហ៊ុន សែន ដឹងយ៉ាងច្បាស់ថា ការផ្តល់នីតិសម្បទាឡើងវិញដល់មន្រ្តីអតីតបក្សប្រឆាំង១១៨នាក់គឺគ្មានន័យនោះទេក្នុងស្ថានភាពបច្ចុប្បន្ននេះ។ លោកចោទជាសំណូរថា តើពួកគេអាចធ្វើសកម្មភាពនយោបាយយ៉ាងម៉េចទៅនៅពេលគ្មានគណបក្ស និងគ្មានប្រធានបក្សបែបនេះ។ ជាមួយនឹងការចោទសួរបែបនេះ លោកសម រង្ស៊ី ក៏បានសម្តែងនូវការជឿជាក់ថា លោកស្រីFederica Mogherini នឹងបន្តគាបសង្កត់មកលើរដ្ឋាភិបាលកម្ពុជា ដើម្បីដោះលែងលោកកឹម សុខា និង ទម្លាក់រាល់ការចោទប្រកាន់មកលើគាត់ ដែលនឹងឈានទៅរកការផ្តល់នីតិសម្បទារបស់មន្រ្តីអតីតគណបក្សសង្រ្គោះជាតិ១១៨នាក់ ព្រមទាំងដំណើរការគណបក្សប្រឆាំងឡើងវិញ។
រដ្ឋាភិបាលកម្ពុជាបញ្ជាក់ម្តងជាពីរដងហើយថា ការចង់ឲ្យមានដំណើរការអតីតគណបក្សសង្រ្គោះឡើងវិញ គឺមិនអាចទៅរួចនោះទេ។ ប៉ុន្តែសម្រាប់ការផ្តល់នីតិសម្បទារបស់មន្រ្តីអតីតគណបក្សសង្រ្គោះជាតិ១១៨នាក់ឡើងវិញ អាចទៅរួច ព្រោះរដ្ឋសភាកម្ពុជាបានអនុម័តកែច្បាប់ ដើម្បីបើកផ្លូវឲ្យមានការលើកលែងការហាមឃាត់សិទ្ធិធ្វើនយោបាយ។ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា ការធ្វើវិសោធនកម្មនេះ គឺជាឆន្ទ:នយោបាយរបស់គណបក្សកាន់អំណាច មិនមែនកើតឡើងដោយសារការគាបសង្កត់ឬការគម្រាមគំហែងពីខាងក្រៅណានោះទេ ។ លោកបានអះអាងបន្ថែមទៀតថា ការធ្វើបែបនេះ ក៏មិនមែនមកពីគណបក្សប្រជាជនកម្ពុជាទាល់ច្រកខាងនយោបាយនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ