លោក សម រង្ស៊ី ផ្សាយខិត្តប័ណ្ណតាមហ្វេសប៊ុកមិនឲ្យពលរដ្ឋទៅបោះឆ្នោត ខណៈការឃោសនាកំពុងដំណើរការ
លោក សម រង្ស៊ី អតីតប្រធានគណបក្សសង្រ្គោះជាតិពីក្រៅប្រទេសបានបន្តយុទ្ធនាការតាមបណ្តាញសង្គមរបស់លោកជាថ្មីទៀត តាមរយៈការផ្សាយខិត្តប័ណ្ណ អំពាវនាវមិនឲ្យពលរដ្ឋទៅបោះឆ្នោត នាថ្ងៃទី២៩ ខែកក្កដា ខាងមុខនេះ។ ជាការអំពាវនាវ ខណៈការឃោសនាបោះឆ្នោតនៅក្នុងប្រទេសកម្ពុជាកំពុងតែប្រព្រឹត្តទៅ ដោយអវត្តមានអតីតគណបក្សប្រឆាំង។
ចុះផ្សាយនៅថ្ងៃ៖
លោក សម រង្ស៊ី កាលពីថ្ងៃទី០៧ ខែកក្កដា ចំថ្ងៃដំបូងនៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រអាណត្តិទី៦ បានផ្សព្វផ្សាយខិត្តប័ណ្ណអេឡិចត្រូនិច តាមបណ្តាញសង្គមហ្វេសប៊ុករបស់លោក ក្នុងគោលដៅអំពាវនាវមិនឲ្យប្រជាពលរដ្ឋទៅបោះឆ្នោតនាថ្ងៃទី២៩ ខែកក្កដា ខាងមុខនេះ។ ជាការបោះឆ្នោត ដែលអតីតប្រធានអតីតគណបក្សសង្រ្គោះជាតិរូបនេះ ថាជាការបោះឆ្នោតក្លែងក្លាយ។
លោក សម រង្ស៊ី តាមរយៈខិត្តប័ណ្ណអេឡិចត្រូនិច បានចាត់ទុកអ្នកមិនទៅបោះឆ្នោតថាជាអ្នកគាំទ្រអតីតគណបក្សសង្រ្គោះជាតិ ខណៈដែលបក្សនេះ មិនបានចូលរួមក្នុងការបោះឆ្នោតនាពេលខាងមុខ។ ចំណែកឯអ្នកទៅបោះឆ្នោត លោកចាត់ទុកថាជាអ្នក ដែលគាំទ្រគណបក្សប្រជាជនកម្ពុជា និងចង់ឲ្យគណបក្សប្រជាជន បន្តដឹកនាំប្រទេសកម្ពុជាតទៅទៀត។
ខិត្តប័ណ្ណ ដែលមានផ្សាយនៅថ្ងៃទី០៨ ខែកក្កដា លោក សម រង្ស៊ី បានវាយប្រហារខ្លាំងៗទៅលើគណបក្សប្រជាជនកម្ពុជា និងគណបក្សទាំង១៩ ដែលចូលរួមការបោះឆ្នោត។ ក្រៅពីនេះ អតីតប្រធានគណបក្សប្រឆាំងរូបនេះ បានយកសន្លឹកឆ្នោតមកគូសសញ្ញាខ្វែងពីលើថែមទៀត។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងថា នេះគឺជាគំនិតដដែលៗ របស់លោក សម រង្ស៊ី ហើយការផ្សាយខិត្តប័ណ្ណនេះ គឺគ្រាន់តែជាការទាក់ទាញចំណាប់អារម្មណ៍ថ្មីមួយបែបទៀតប៉ុណ្ណោះ។ អ្នកនាំពាក្យ គ.ជ.ប បញ្ជាក់ជាថ្មីថា ដំណើរការបោះឆ្នោតនៅក្នុងប្រទេសកម្ពុជានឹងមិនអាចឈប់នៅទ្រឹង ព្រោះតែសម្តីរបស់មនុស្សមួយក្រុមតូចនោះទេ ដូច្នេះការបោះឆ្នោតនៅក្នុងប្រទេសកម្ពុជានឹងប្រព្រឹត្តទៅតាមការគ្រោងទុក។
សូមជម្រាបជូនថា យុទ្ធនាការផ្សាយខិត្តប័ណ្ណអេឡិចត្រូនិច តាមបណ្តាញសង្គមរបស់ លោក សម រង្ស៊ី បានធ្វើឡើងដំណាលគ្នានឹងយុទ្ធនាការឃោសនាបោះឆ្នោត ដែលធ្វើឡើងចាប់ពីថ្ងៃទី៧ ខែកក្កដា រហូតដល់ថ្ងៃទី២៧ ខែកក្កដា ដោយមានគណបក្សនយោបាយចំនួន២០ចូលរួម។ ក្រៅពីការផ្សាយខិត្តប័ណ្ណតាមបណ្តាញសង្គមហ្វេសប៊ុក មន្ត្រីអតីតគណបក្សសង្រ្គោះជាតិមួយចំនួនទៀត បានធ្វើយុទ្ធនាការសិទ្ធិម្រាមដៃស្អាត ដើម្បីបង្ហាញពីការមិនចូលរួមបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ