លោក សម រង្ស៊ី លាលែងពីតំណែងប្រធានបក្សប្រឆាំង ខណៈមន្ដ្រីជាន់ខ្ពស់បក្សភ្ញាក់ផ្អើល
លោក សម រង្ស៊ី នាថ្ងៃសៅរ៍ទី១១កុម្ភៈនេះ បានលាលែងចេញពីតំណែងប្រធានគណបក្សសង្គ្រោះជាតិ និងពីសមាជិកភាពគណបក្សសង្គ្រោះជាតិហើយ។ ការលាលែងចេញពីតំណែងប្រធានគណបក្សសង្គ្រោះជាតិរបស់លោក សម រង្ស៊ី នាពេលនេះ បានធ្វើឲ្យមន្ដ្រីជាន់ខ្ពស់គណបក្សប្រឆាំងជាច្រើនរូប សម្ដែងការភ្ញាក់ផ្អើលនិងសោកស្ដាយ។
ចុះផ្សាយនៅថ្ងៃ៖
ស្តាប់ - ០២:១៧
ម៉ោង៥ល្ងាចថ្ងៃសៅរ៍ ទី១១កុម្ភៈ លិខិតលាលែងពីតំណែងប្រធានគណបក្សសង្គ្រោះជាតិរបស់លោក សម រង្ស៊ី ត្រូវបានផ្សព្វផ្សាយលើបណ្ដាញសង្គមហ្វេសប៊ុក។ នៅក្នុងលិខិតនោះ លោក សម រង្ស៊ី បញ្ជាក់ពីសេចក្ដីសម្រេចចិត្តលាលែងពីតំណែងប្រធានបក្ស និងពីសមាជិកភាពគណបក្សសង្គ្រោះជាតិថា ដោយសារតែមូលហេតុផ្ទាល់ខ្លួន។ បើតាមលិខិតដដែល លោកសម រង្ស៊ី សូមឲ្យគណៈកម្មាធិការអចិន្ត្រៃយ៍និងគណៈកម្មាធិការនាយកគណបក្សសង្គ្រោះជាតិ ជ្រាបជាព័ត៌មាន និងចាត់ទុកសេចក្ដីសម្រេចនេះចូលជាធរមានចាប់ពីថ្ងៃទី១១កុម្ភៈតទៅ។
ភ្ជាប់ជាមួយលិខិត សហស្ថាបនិកគណបក្សសង្គ្រោះជាតិរូបនេះសរសេរបន្ថែមលើទំព័រហ្វេសប៊ុករបស់លោកថា «គ្រប់កាលៈទេសៈ ខ្ញុំនៅតែរក្សាឧត្តមគតិសង្គ្រោះជាតិជានិច្ច ក្នុងបេះដូងរបស់ខ្ញុំ»។
គួរកត់សម្គាល់ថា ការលាលែងពីតំណែងប្រធានបក្សប្រឆាំងរបស់លោកសម រង្ស៊ី នាពេលនេះ បានធ្វើឲ្យមន្ដ្រីជាន់ខ្ពស់គណបក្សប្រឆាំងជាច្រើនរូប សម្ដែងការភ្ញាក់ផ្អើលនិងសោកស្ដាយ។
សម្រាប់លោក អ៊ូ ច័ន្ទឬទ្ធិ តំណាងរាស្ត្រមណ្ឌលស្វាយរៀងកូតាបក្សប្រឆាំង វីរភាពនិងឧត្តមគតិជាតិរបស់លោក សម រង្ស៊ី នឹងស្ថិតនៅក្នុងបេះដូងខ្មែរស្នេហាជាតិជានិច្ច។ រីឯលោក គង់ សភា វិញ គ្រាន់តែឮដំណឹងថាលោក សម រង្ស៊ី លាលែងពីតំណែងប្រធានបក្ស លោកសោកស្ដាយរហូតអង្គុយយំ។ ប៉ុន្តែលោក គង់ សភា ថា លោកមិនតក់ស្លុតក្នុងការផ្លាស់ប្ដូរឡើយ។
ចំណែក លោក អេង ឆៃអ៊ាង មន្ដ្រីជាន់ខ្ពស់គណបក្សសង្គ្រោះជាតិ បានបញ្ជាក់ប្រាប់វិទ្យុបារាំងអន្ដរជាតិនាល្ងាចថ្ងៃសៅរ៍នេះថា លោកភ្ញាក់ផ្អើលយ៉ាងខ្លាំងចំពោះការលាលែងពីតំណែងរបស់លោក សម រង្ស៊ី។ ភ្ញាក់ផ្អើលក៏ពិតមែន ប៉ុន្តែលោកចាត់ទុកការសម្រេចចិត្តនេះថាជារឿងធម្មតាសម្រាប់អ្នកនយោបាយ ដែលមានទាំងសិទ្ធិធ្វើនយោបាយ និងសិទ្ធិលាឈប់ធ្វើនយោបាយ។ លោក អេង ឆៃអ៊ាង អះអាងថា ទោះបីលោក សម រង្ស៊ី អស់ងារជាប្រធានគណបក្សសង្គ្រោះជាតិហើយក៏ដោយ តែនៅក្នុងបេះដូងកូនខ្មែរ លោកសម រង្ស៊ី នៅតែជាប្រធានគណបក្សសង្គ្រោះជាតិដដែល។
ឆ្លើយនឹងសំណួររបស់វិទ្យុបារាំង លោក អេង ឆៃអ៊ាង នៅមិនទាន់ដឹងទេថា នរណានឹងឡើងធ្វើជាប្រធានគណបក្សសង្គ្រោះជាតិ បន្តពីលោក សម រង្ស៊ី ខណៈលោក កឹម សុខា នៅបន្តធ្វើជាប្រធានស្ដីទី។ បើតាមលោក អេង ឆៃអ៊ាង គណបក្សសង្គ្រោះជាតិនឹងបើកកិច្ចប្រជុំបន្ទាន់មួយនៅថ្ងៃអាទិត្យស្អែក ដើម្បីជជែកពីបញ្ហាអស់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ