លោក សម រង្ស៊ី៖ លោក ហ៊ុន សែន កំពុងភ័យខ្លាចចំពោះគម្រោងវិលត្រលប់របស់លោក
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ បានសរសេរនៅលើទំព័រហ្វេសបុករបស់លោកនៅថ្ងៃទី ០៩ ឧសភា ដោយបានហៅលិខិតរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ០៧ ឧសភា ថា កំពុងភ័យខ្លាចចំពោះគម្រោងនៃការធ្វើមាតុភូមិនិវត្តន៍របស់លោក។ សូមជំរាបជូនថា តាមរយៈលិខិតចុះថ្ងៃទី ០៧ ឧសភា ប្រមុខរដ្ឋាភិបាលកម្ពុជា លោក ហ៊ុន សែន បានបង្គាប់ឲ្យក្រុមការងាររបស់លោកទាំងក្នុងជួររដ្ឋាភិបាល ទាំងក្នុងក្របខណ្ឌគណបក្សចុះអប់រំប្រជាពលរដ្ឋ ពីផលវិបាកនៃការផ្តួលរំលំរដ្ឋាភិបាល តាមរយៈសកម្មភាពបដិវត្តន៍ព័ណ៌។
ចុះផ្សាយនៅថ្ងៃ៖
ស្តាប់ - ០២:៣៣
លោក សម រង្ស៊ី ដែលបានអះអាងថាជាប្រធានស្តីទីអតីតគណបក្សសង្គ្រោះជាតិ កំពុងនីរទេសខ្លួននៅក្រៅប្រទេស បានចាត់ទុកលិខិតរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ០៧ ឧសភា ថា កំពុងភ័យខ្លាចចំពោះគម្រោងនៃការវិលត្រលប់របស់លោក។ តាមរយៈគណនីយហ្វេសបុករបស់ខ្លួន លោក សម រង្ស៊ី បានសង្កត់ធ្ងន់ចំនួន៣ចំណុច ទី១.លោក សម រង្ស៊ី អះអាងថា ប្រជារាស្ត្រខ្មែរត្រូវតែផ្តួលរំលំរបបលោកនាយករដ្ឋមន្ត្រី ហ៊ុន សែន ពីព្រោះរបបនេះ ជារបបខុសច្បាប់កើតចេញមកពីការបោះឆ្នោតក្លែងក្លាយ និងរំលោភឆន្ទៈប្រជារាស្ត្រ។
ចំណុចទី២.លោក សម រង្ស៊ី បានអះអាងថា តាមរយៈលិខិតរបស់លោកនាយករដ្ឋមន្ត្រី ហ៊ុន សែន នេះ បានបញ្ជាក់ថា ទាល់តែ សម រង្ស៊ី ជិតវិលត្រឡប់មកប្រទេសកម្ពុជាវិញ ទើបរបបលោកនាយករដ្ឋមន្ត្រី ហ៊ុន សែន ចាប់ផ្តើមគិតគូរធ្វើអំពើល្អ។ និងចំណុចចុងក្រោយ លោក សម រង្ស៊ី បានដាក់លក្ខ័ណ្ឌថា បើលោក ហ៊ុន សែន ចង់កាត់បន្ថយកំហឹងប្រជារាស្ត្រ ចំពោះរបបគាត់ លោកហ៊ុន សែន ត្រូវតែបញ្ជាឲ្យអាជ្ញាធរពាក់ព័ន្ធប្រគល់សងមកវិញ នូវដីធ្លី ផ្ទះសម្បែង និងទ្រព្យសម្បត្តិផ្សេងៗទៀត ដែលពួកគេបានប្លន់យកពីប្រជាពលរដ្ឋទៅ។ នេះបើតាមសំណេររបស់លោក សម រង្ស៊ី។
ជុំវិញការលើកឡើងរបស់លោក សម រង្ស៊ី ដូច្នេះ លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានថ្លែងថា លោកនៅមិនទាន់ទទួលបានលិខិតនោះនៅឡើយទេ ប៉ុន្តែក្នុងលក្ខខ័ណ្ឌដែលលិខិតនោះពិតមែន នោះគឺជាកាតព្វកិច្ចរបស់រដ្ឋាភិបាលក្នុងកិច្ចការការពារសន្តិសុខសណ្តាប់ធ្នាប់ និងបង្ការមិនឲ្យមានរឿងអ្វីកើតឡើងជាយថាហេតុនោះទេ។ លោក ផៃ ស៊ីផាន បានសង្កត់ធ្ងន់ថា រដ្ឋាភិបាលមិនដែលភ័យខ្លាចចំពោះការវិលត្រលប់របស់លោក សម រង្ស៊ី នោះទេ។
គួរជំរាបជូនថា តាមរយៈលិខិតមួយចុះថ្ងៃទី ០៧ ឧសភា ដែលគេបានចែកចាយនៅលើបណ្តាញសង្គមហ្វេសបុក លោក ហ៊ុន សែន បានបង្គាប់ឲ្យមន្រ្តីថ្នាក់ក្រោមរបស់លោក ចុះទៅអប់រំប្រជាពលរដ្ឋនៅគ្រប់មូលដ្ឋានទាំងអស់ អំពីគម្រោងនៃការផ្តួលរំលំរដ្ឋាភិបាល និងគម្រោងនៃការវិលត្រឡប់របស់លោក សម រង្ស៊ី។ តាមរយៈលិខិតនោះ ប្រមុខរដ្ឋាភិបាលកម្ពុជា បានក្រើនរម្លឹកមន្រ្តីរបស់ខ្លួនទាំងក្នុងក្របខ័ណ្ឌរដ្ឋាភិបាលនិងទាំងក្នុងក្របខ័ណ្ឌគណបក្សថា លោក សម រង្ស៊ី មានបំណងដឹកនាំធ្វើបដិវត្តពណ៌ ដោយបានអំពាវនាវឲ្យកងកម្លាំងប្រដាប់អាវុធ និងប្រជាពលរដ្ឋផ្តួលរំលំរដ្ឋាភិបាល។
តាមរយៈលិខិតនោះ ប្រមុខរដ្ឋាភិបាលកម្ពុជា បានហៅសកម្មភាពរបស់លោក សម រង្ស៊ី ថា ជាការរំលោភបំពានយ៉ាងធ្ងន់ធ្ងរលើរដ្ឋធម្មនុញ្ញ និងច្បាប់នានារបស់កម្ពុជា ហើយអាចនាំប្រទេស ឲ្យធ្លាក់ក្នុងវិបត្តិ ភាពចលាចល និងភាពវឹកវរ ដែលមិនអាចប៉ាន់ស្មានបាន។ លោក សម រង្ស៊ី និងមនុស្សជំនិតៗរបស់លោកបានប្រកាសម្តងហើយម្តងទៀតថា នឹងវិលមកកម្ពុជាវិញនៅក្នុងឆ្នាំ២០១៩នេះ ប៉ុន្តែមិនទាន់កំណត់កាលបរិច្ចេទនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ