សម្តេចក្រុមព្រះនៅតែមានតម្លៃសម្រាប់ហ្វ៊ុនស៊ិនប៉ិច
សម្តេចក្រុមព្រះ នរោត្តម រណឬទ្ធិ ប្រធានក្រុមឧត្តមប្រឹក្សាផ្ទាល់ព្រះមហាក្សត្រនិងជាប្រធានគណបក្សសង្គមរាស្ត្ររាជាធិបតេយ្យ បានយល់ព្រមធ្វើជាប្រធានគណបក្សហ្វ៊ុនស៊ិនប៉ិច តាមការយាងពីព្រះអនុជ និងលោកញឹក ប៊ុនឆៃ។ ការសម្រេចចិត្តរបស់សម្តេចក្រុមព្រះវិលទៅស្តារគណបក្សរាជានិយម ដែលធ្លាប់មានប្រជាប្រិយមួយនេះ បានធ្វើឡើងបន្ទាប់ពីមានការពិគ្រោះគ្នារវាងមន្ត្រីជាន់ខ្ពស់គណបក្សហ្វ៊ុនស៊ិនប៉ិច ដើម្បីប្រមូលសំឡេងរាជានិយមឡើងវិញ ត្រៀមបោះឆ្នោតធំៗចំនួនពីរ នៅឆ្នាំ២០១៧និង ២០១៨ខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
សម្តេចក្រុមព្រះ នរោត្តម រណឫទ្ធិ បានយល់ព្រម វិលមកធ្វើជាប្រធានគណបក្សហ្វ៊ុនស៊ិនប៉ិច ឡើងវិញ បន្ទាប់ពីមានការប្រេះឆាគ្នារវាងអ្នករាជានិយមអស់រយៈពេលជាច្រើនឆ្នាំកន្លងទៅនេះ។ តាមរយៈសារលិខិតឆ្លងឆ្លើយគ្នាចំនួនពីរច្បាប់ចុះថ្ងៃទី០១មករាឆ្នាំ២០១៥តែមួយ សម្តេចក្រុមព្រះ នរោត្តម រណឫទ្ធិ បានប្រកាសតបតាមសំណើរបស់សម្តេចរាជបុត្រីព្រះអនុជ នរោត្តម អរុណរស្មី ប្រធានគណបក្សហ្វ៊ុនស៊ិនប៉ិចនិងលោក ញឹក ប៊ុនឆៃ អគ្គលេខាធិការគណបក្សថាព្រះអង្គយល់ព្រម ទៅបន្តដឹកនាំគណបក្សហ្វ៊ុនស៊ិនប៉ិច ឡើងវិញ ។
លោក ញឹក ប៊ុនឆៃ បានថ្លែងប្រាប់វិទ្យុបារាំងអន្តរជាតិ RFI នៅថ្ងៃសុក្រនេះថា ការយាងសម្តេចក្រុមព្រះមកធ្វើជាប្រធានហ្វ៊ុនស៊ិនប៉ិច វិញនោះទីមួយគឺចង់ឲ្យមានការរួបរួមអ្នករាជានិយមឡើងវិញ ដែលការបែកបាក់កន្លងមកជាបទពិសោធន៍មួយធ្វើឲ្យចុះខ្សោយ។ ហើយចំណុចទី២គឺចៀសវាង ការវាយប្រហារគ្នារវាងអ្នករាជានិយម ជាពិសេសសមាជិកនៅតាមមូលដ្ឋាន។
ជាមួយនឹងការលើកឡើងថាអ្នករាជានិយមនៅតាមមូលដ្ឋានមានការសប្បាយចិត្តនោះ ការរួបរួមគ្នានៅពេលនេះគឺជាការត្រៀមលក្ខណៈប្រមែប្រមូល និងស្វែងរកសំឡេងគាំទ្រគណបក្សហ្វ៊ុនស៊ិនប៉ិច នៅក្នុងឱកាសនៃការបោះឆ្នោតក្រុមប្រឹក្សាឃុំ សង្កាត់ នៅឆ្នាំ ២០១៧ និងការបោះឆ្នោតសាកលឆ្នាំ២០១៨ ខាងមុខ។ នេះបើតាមលោកញឹក ប៊ុនឆៃ។
លោកញឹក ប៊ុនឆៃ បន្តថាសមាជដែលគ្រោងធ្វើដោយគណបក្សរាស្ត្ររាជាធិបតេយ្យនៅថ្ងៃទី១៩មករា ខាងមុខនឹងត្រូវលុប ហើយជំនួសមកវិញដោយសមាជហ្វ៊ុនស៊ិនប៉ិច ដែលមន្ត្រីជាន់ខ្ពស់គណបក្សទាំងពីរកំពុងបន្តជជែកគ្នារកពេលវេលាសមស្របមួយ។
ទាក់ទងទៅនឹងការត្រឡប់ទៅដឹកនាំគណបក្សហ៊ុនស៊ិនប៉ិចជាថ្មីនេះ លោកផៃ ស៊ីផាន
អ្នកនាំពាក្យទីស្តីការគណៈរដ្ឋមន្ត្រីបានថ្លែងថា គណបក្សហ្វ៊ុនស៊ិនប៉ិចក្រោមការដឹកនាំរបស់
សម្តេចក្រុមព្រះ បានដើរតួសំខាន់នៅក្នុងប្រវត្តិសាស្ត្រនយោបាយប្រទេសកម្ពុជា ដោយសារហ្វ៊ុនស៊ិនប៉ិច បានចូលរួមជាមួយគណបក្សប្រជាជនក្នុងការថែរក្សាសន្តិភាព និងស្ថិរភាព
នយោបាយ។
លោកស្រីមួ សុខហួរ តំណាងរាស្ត្រនិងជាមន្ត្រីជាន់ខ្ពស់គណបក្សសង្គ្រោះជាតិ ប្រាប់វិទ្យុRFI
នៅថ្ងៃនេះដែរថា ការត្រឡប់មកដឹកនាំគណបក្សហ្វ៊ុនស៊ិនប៉ិចវិញរបស់សម្តេចក្រុមព្រះ គឺមិន
មានឥទ្ធិពលលើសំឡេងគាំទ្ររបស់គណបក្សសង្គ្រោះជាតិទេ។ លោកស្រីបញ្ជាក់ថាប្រជាជននឹងដើរទៅមុខជាមួយសង្គ្រោះជាតិ ហើយហ្វ៊ុនស៊ិនប៉ិច បានដើរថយក្រោយឆ្ងាយណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ