អ្វីខ្លះជាសមិទ្ធផលការងាររបស់ក្រសួងបរិស្ថានក្នុងអាណត្តិលោកសាយ សំអាល់?
នៅព្រឹកនេះ ក្រសួងបរិស្ថានបានរៀបចំវេទិការស្ដីពី«ការការពារ និងអភិរក្សធនធានធម្មជាតិ» ក្រោមវត្តមានលោករដ្ឋមន្ត្រីសាយ សំអាល់។ មែនទែនទៅ នេះមិនមែនជាលើកទី១ទេ ហើយក៏មិនមែនជាលើកចុងក្រោយដែរ ដែលក្រសួងបរិស្ថានរៀបចំកម្មវិធីផ្សេងៗបង្ហាញពីការខិតខំធ្វើការរបស់ខ្លួន។ កម្មវិធីដែលរៀបចំដោយក្រសួងបរិស្ថានមានជាហូរហែមិនដាច់នេះ ធ្វើឲ្យសាធារណមតិកើតចំងល់ឆ្ងល់ថា តើក្រសួងបរិស្ថានក្រោមការដឹកនាំរបស់លោកសាយ សំអាល់ បង្កើតបានសមិទ្ធផលអ្វីខ្លះសម្រាប់ជាតិ?
ចុះផ្សាយនៅថ្ងៃ៖
ស្តាប់ - ០២:៤៤
និយាយពីសមិទ្ធផលការងាររបស់លោកសាយ សំអាល់ក្នុងនាមជារដ្ឋមន្ត្រីក្រសួងបរិស្ថាន គេអាចចែកជាពីរផ្នែកធំៗ គឺទីមួយការងារកែទម្រង់នៅក្នុងក្រសួង និងទីពីរកិច្ចការការពារផ្នែកបរិស្ថាន។ សម្រាប់ចំណុចទីមួយ លោករដ្ឋមន្ត្រីវ័យក្មេងជាងគេក្នុងអាណត្តិទី៥នេះ បានធ្វើទំនើបកម្មនៅក្នុងក្រសួង កែទម្រង់កាដឹកនាំ និងការគ្រប់គ្រង រៀបចំដំឡើងប្រាក់ខែដល់ឧទ្យានុរក្ស ក៏ដូចជាបានសាងសង់អាគារទីស្តីការក្រសួងថ្មីជាដើម។ ចំណែកកិច្ចការការពារបរិស្ថានវិញ លោកសាយ សំអាល់ បានធ្វើការត្រួតពិនិត្យ និងវាយតម្លៃឡើងវិញលើគម្រោងអភិវឌ្ឍដីសម្បទានសេដកិច្ចណាដែលបានប៉ះពាល់ដល់ប្រជាពលរដ្ឋ និងដែលមានការកាប់បំផ្លាញព្រៃឈើ។ ជាលទ្ធផល មកដល់ពេលនេះ ក្រុមហ៊ុនដីសម្បទានសេដ្ឋកិច្ចចំនួន២៧ ក្រុមហ៊ុន បានត្រូវក្រសួងបរិស្ថាននិរាករណ៍អាជ្ញាបណ្ណ និងដកហូតដីមកវិញ។
លោកសាយ សំអាល់ ក៏ជាអ្នកស្នើសុំឲ្យមានការបែងចែកការគ្រប់គ្រងដីសម្បទានសេដ្ឋកិច្ចច្បាស់លាស់ជាមួយក្រសួងកសិកម្មផងដែរ។ អនុលោមតាមនេះ ក្រសូងបរិស្ថានបានផ្ទេរគម្រោងដីសម្បទានសេដ្ឋកិច្ចចំនួន៧៣កន្លែង និងតំបន់អភិរក្សព្រៃឈើ១៨កន្លែងទៅកាន់ក្រសួងកសិកម្ម។ គិតមកពេលនេះ ក្រសួងបរិស្ថានកំពុងគ្រប់គ្រងតំបន់ការពារធម្មជាតិចំនួន៤៥កន្លែងស្មើជិត៦លានហិកតា និងរបៀងអភិរក្សជីវៈចម្រុះ១,៤លានហិកតាទៀត។
មានវ័យ៣៧ឆ្នាំ លោកសាយ សំអាល់ គឺជាកូនប្រុសរបស់លោកសាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភាខ្មែរ។ មុនកាន់តំណែងជារដ្ឋមន្ត្រីក្រសួងបរិស្ថាននៅក្នុងឆ្នាំ២០១៣ លោកសាយ សំអាល់ បានបញ្ចប់បណ្ឌិតផ្នែកជីវវិទ្យានៅក្នុងប្រទេសអូស្ត្រាលី។ បច្ចុប្បន្ន លោកគឺជារដ្ឋមន្ត្រីដែលលេចធ្លោនិងវ័យក្មេងជាងគេនៅក្នុងចំណោមរដ្ឋមន្ត្រីទាំងអស់របស់រដ្ឋាភិបាលក្នុងអាណត្តិនេះ។ លោកក៏ជារដ្ឋមន្ត្រីទី១ដែលទទួលបានការកោតសរសើរដោយផ្ទាល់មាត់ជាសាធារណៈពីសំណាក់លោកនាយករដ្ឋមន្ត្រីហ៊ុន សែនផងដែរ។
លោកអេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ និងជាប្រធានគណៈកម្មការទី១នៃរដ្ឋសភាបានវាយតម្លៃថា នៅក្នុងកិច្ចការពារផ្នែកបរិស្ថាន លោកសាយ សំអាល់បានដាក់ចេញនយោបាយបានល្អ ប៉ុន្តែសម្រាប់ការអនុវត្តវិញនោះ គឺមិនទាន់មានអ្វីជាដុំកំភួននៅឡើយទេ។ នេះ ក៏ព្រោះតែលោកអេង ឆៃអ៊ាង នៅតែមើលឃើញពីការកាប់បំផ្លាញព្រៃឈើ ការបំពុលបរិស្ថាននៅតែកើតមាន ហើយកិច្ចខិតខំការពារធនធានធម្មជាតិក៏នៅមានការយកចិត្តទុកតិចតួចដែរ។
ដូចគ្នានឹងលោកអេង ឆៃអ៊ាងដែរ លោកមាស នី អ្នកសិក្សាស្រាវជ្រាវ ដើម្បីការអភិវឌ្ឍសង្គមក៏យល់ថា ការអនុវត្តការការពារបិរស្ថានរបស់ក្រសួងបរិស្ថានមានប្រសិទ្ធភាពតិចតួច ដោយសារការកាប់បំផ្លាញព្រៃឈើនៅតែមាន។ ដូច្នេះហើយ លោកចង់ឃើញក្រសួងបរិស្ថានមានវិធានការក្តៅជាងរាល់ដង និងមានយន្តការបន្ថែមទៀត។ យ៉ាងណាក៏ដោយ ទាំងលោកអេង ឆៃអ៊ាង និងទាំងលោកមាស នី សុទ្ធតែទទួលស្គាល់ថា ក្រសួងបរិស្ថានរបស់លោកសាយ សំអាល់ ជាក្រសួងមួយដែលសកម្មនិងលេចធ្លោជាងក្រសួងមួយចំនួនទៀតសម្រាប់អាណត្តិទី៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ