ក្រសួងអប់រំមិនទាន់ទទួលបានឈើមួយដុំទេ បន្ទាប់ពីរបាយការណ៍បង្ក្រាបព្រៃឈើទៅដល់ដៃនាយករដ្ឋមន្ត្រី
លោកនាយករដ្ឋមន្ត្រី ហ៊ុន សែន បានប្រគល់ការងារទៅឲ្យលោក ប៊ិន ឈិន ឧបនាយករដ្ឋមន្ត្រីប្រចាំការ និងជាប្រធានអាជ្ញាធរជាតិដោះស្រាយទំនាស់ដីធ្លី ដើម្បីធ្វើការត្រួតពិនិត្យបន្តលើរបាយការណ៍បទល្មើសព្រៃឈើ របស់គណៈកម្មការជាតិស្តីពីការបង្ក្រាបនិងទប់ស្កាត់បទល្មើសព្រៃ។ លោក ប៊ិន ឈិន ក៏បានជួបប្រជុំជាអន្តរក្រសួង ដោយមានការចូលពីរួមក្រសួងអប់រំ យុវជន និង កីឡា ផងដែរ។ ជំនួបនេះផ្ដោតសំខាន់ដើម្បីស្វែងរកមធ្យោបាយដឹកឈើដែលរឹបអូសបានជាងប្រាំពីរម៉ឺនម៉ែត្រគូប ប្រគល់ជូនក្រសួងអប់រំដោយរបៀបណា? តែយ៉ាងណាក៏ដោយ រហូតមកដល់ពេលនេះ ក្រសួងអប់រំនៅមិនទាន់ទទួលបានឈើមួយដុំនៅឡើយទេ។
ចុះផ្សាយនៅថ្ងៃ៖
ស្តាប់ - ០២:០៨
លោក ប៊ិន ឈិន ឧបនាយករដ្ឋមន្ត្រីប្រចាំការ និងជាប្រធានអាជ្ញាធរជាតិដោះស្រាយទំនាស់ដីធ្លី ដែលទទួលការងារបន្តពីលោកនាយករដ្ឋមន្ត្រី ហ៊ុន សែន ក្នុងការត្រួតពិនិត្យរបាយការណ៍បទល្មើសព្រៃឈើ បានដឹកនាំកិច្ចប្រជុំជាមួយអន្តរក្រសួង ដោយមានការចូលរួមពីក្រសួងអប់រំ និងក្រសួងបរិស្ថាន ជាដើម កាលពីថ្ងៃទី២៥មេសា នៅទីស្ដីការគណៈរដ្ឋមន្ត្រី។ លទ្ធផលនៃកិច្ចប្រជុំមិនត្រូវបានទម្លាយឲ្យដឹងនោះទេ។
ប៉ុន្តែលោក អេង ហ៊ី អ្នកនាំពាក្យឲ្យគណៈកម្មការជាតិស្ដីពីការបង្ក្រាបនិងទប់ស្កាត់បទល្មើសព្រៃឈើបានបញ្ជាក់ប្រាប់វិទ្យុបារាំងអន្តរជាតិ RFI ថា ក្រោយកិច្ចប្រជុំបានបញ្ចប់ គណៈប្រតិភូអន្តរក្រសួងចំនួន១៦រូប បានធ្វើដំណើររួមគ្នាតាមឧត្ថម្ភចក្រ ត្រួតពិនិត្យទីតាំងរឹបអូសឈើដ៏ធំក្នុងខេត្តក្រចេះនិងមណ្ឌគិរី ដើម្បីរកមធ្យោបាយដឹកជញ្ជូនឈើមកប្រគល់ជួនអប់រំយុវជននិងកីឡា។ ដឹកចេញរបៀបណានៅមិនទាន់ដឹង តែគណៈកម្មការជាតិដឹកនាំដោយ លោក សៅ សុខា នឹងធ្វើរបាយការណ៍នេះជាបន្តទៅឲ្យលោក ប៊ិន ឈិន។
លោក អេង ហ៊ី បានគូសបញ្ជាក់ថា រហូតមកដល់ពេលនេះ ឈើមួយដុំនៅមិនទាន់ទៅដល់ក្រសួងអប់រំនៅឡើយទេ បន្ទាប់ពីការប្រកាសរបស់លោក ហ៊ុន សែន ឲ្យឈើដែលរឹបអូសទាំងជាងប្រាំពីរម៉ឺនម៉ែត្រគូប ទៅក្រសួងអប់រំ ដើម្បីធ្វើសាលានិងសង់ផ្ទះឲ្យលោកគ្រូ អ្នកគ្រូ។ ការងារនេះប្រើពេលយូរបន្តិចដោយ លោក អេង ហ៊ី អះអាងថា ភាគីពាក់ព័ន្ធធ្វើទៅតាមនីតិវិធី។
បន្ទាប់ពីបានបញ្ជូនរបាយការណ៍ទៅលោកនាយករដ្ឋមន្ត្រី ហ៊ុន សែន ហើយ លោក អេង ហ៊ី មើលឃើញថាបទល្មើសព្រៃឈើបានស្ងប់ស្ងាត់ជាងមុន ដោយកើតមានឡើងក្នុងរូបភាពតូចតាចប៉ុណ្ណោះ។ លោកថា ប្រតិបត្តិការបង្ក្រាបបទល្មើសព្រៃឈើ នឹងនៅតែធ្វើឡើងជាបន្តបន្ទាប់។
សូមបញ្ជាក់ថា គណៈកម្មការជាតិបង្ក្រាប និងទប់ស្កាត់បទល្មើសព្រៃឈើ បានបញ្ជូនរបាយការណ៍នៃប្រតិបត្តិការបង្ក្រាបព្រៃឈើ ដែលផ្តើមតាំងពីខែមករាឆ្នាំ ២០១៦ ទៅកាន់រដ្ឋាភិបាលកាលពីថ្ងៃទី ១៨មេសា។ របាយការណ៍នោះបង្ហាញថា បានរកឃើញឈើខុសច្បាប់ជាង ៧ម៉ឺនម៉ែត្រគូប និងបានប្តឹងឈ្មួញរកស៊ីចំនួន ៥៧ករណីទៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ