គណៈកម្មការទី៣រដ្ឋសភា បញ្ចប់បេសកម្មពិនិត្យពីផលប៉ះពាល់នៃការសាងសង់ទំនប់វារីអគ្គីសនីសេសានក្រោម២ តែគ្មានគម្រោងសុំឱ្យបញ្ឈប់
គណៈកម្មការទី៣នៃរដ្ឋសភា ដែលដឹកនាំដោយលោក ប៉ុល ហំម បានបញ្ចប់ដំណើរបេសកម្មរយៈពេលបីថ្ងៃនៅខេត្តស្ទឹងត្រែង កាលពីល្ងាចថ្ងៃទី២៨មិនា និងកំពុងធ្វើដំណើរមកកាន់ទីក្រុងភ្នំពេញវិញនៅថ្ងៃអាទិត្យទី២៩មិនានេះ។ ជាដំណើរបេសកម្ម ដើម្បីពិនិត្យមើលដោយផ្ទាល់ពីផលប៉ះពាល់នៃការសាងសង់ទំនប់វារីអគ្គីសនីសេសានក្រោម២។ ក្នុងរយៈពេលបីថ្ងៃ គណៈកម្មការនេះ បានប្រមូលព័ត៌មានជាច្រើនជុំវិញក្តីកង្វល់របស់ប្រជាពលរដ្ឋ តែមិនមានគម្រោងក្នុងការស្នើសុំឱ្យរដ្ឋាភិបាលបញ្ឈប់ការសាងសង់ទំនប់នេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ដំណើរបេសកម្មរបស់ប្រតិភូគណៈកម្មការទី៣នៃរដ្ឋសភា បានផ្តើមតាំងពីថ្ងៃទី២៦មិនា ដោយបានចុះទៅកាន់ទីតាំងដោយផ្ទាល់នៃការសាងសង់ទំនប់វារីអគ្គីសនីសេសានក្រោម២ ស្ថិតនៅក្នុងភូមិស្រែគរ ខេត្តស្ទឹងត្រែង។ ជាទីដែលប្រជាពលរដ្ឋកំពុងព្រួយបារម្ភយ៉ាងខ្លាំង ពីការប្រឈមទៅនឹងផលប៉ះពាល់ដោយសារតែគម្រោងសាងសង់ទំនប់វារីអគ្គិសនី សេសានក្រោម២ និងគម្រោងនៃការសាងសង់ទំនប់វារីអគ្គីសនីដនសាហុងរបស់ប្រទេសឡាវ។
ក្នុងរយៈពេលបីថ្ងៃ គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនេះ បានជួបជាមួយអភិបាលខេត្តស្ទឹងត្រែង លោក កុល សំអុល, ក្រុមអង្គការសង្គមស៊ីវិល និងប្រជាពលរដ្ឋ ស្តីអំពីបញ្ហា និងក្ដីព្រួយបារម្មណ៍អំពីផលប៉ះពាល់ ជុំវិញគម្រោងការសាងសង់ទំនប់វារីអគ្គិសនី សេសានក្រោម២។ ជាគម្រោងដែលប្រជាពលរដ្ឋ និងអង្គការសង្គមស៊ីវិលក្នុងស្រុកនិងក្រៅស្រុក កំពុងតែតស៊ូមតិសុំឱ្យរដ្ឋាភិបាលកម្ពុជា បញ្ឈប់គម្រោងសាងសង់នេះ។
លោក ប៉ុល ហំម ប្រធានគណៈកម្មការទី៣នៃរដ្ឋសភា បានកត់សំគាល់ថា មានប្រជាពលរដ្ឋបីក្រុម បានបញ្ចេញមតិខុសៗគ្នា ជុំវិញគម្រោងសាងសង់នេះ។ ប្រជាពលរដ្ឋ១ក្រុម សប្បាយចិត្តនឹងការទទួលបានភ្លើងប្រើប្រាស់ពីការសាងសង់ទំនប់វារីអគ្គីសនី ខណៈប្រជាពលរដ្ឋ១ក្រុមទៀត បានប្រឆាំងដាច់ខាតចំពោះការសាងសង់នេះ។ ចំណែកឯប្រជាពលរដ្ឋ១ក្រុមទៀត បានយល់ព្រមឲ្យមានការសាងសង់ដែរ ក៏ប៉ុន្តែ សុំឱ្យមានការផ្តល់សំណងសមរម្យ និងបំពេញទៅតាមលក្ខ័ណមួយចំនួន ដូចជា បញ្ហាការរើទីតាំងភូមិដ្ឋាន បញ្ហាហេដ្ឋារចនាសម្ព័ន្ធ ទំហំដី ផ្ទះនិងដីស្រែចំការ រួមទាំងការធ្វើពិធីគាល់ផ្នូដូនតារបស់ពួកគេជាដើម។
យ៉ាងណាក៏ដោយ បន្ទាប់ពីការចុះពិនិត្យដល់ទីតាំងនៃការសាងសង់ទំនប់វារីអគ្គីសនីសេសានក្រោម២នេះ គណៈកម្មការទី៣នៃរដ្ឋសភា មិនមានគម្រោងក្នុងការស្នើសុំឱ្យរដ្ឋាភិបាលបញ្ឈប់ រឺផ្អាកការសាងសង់ទំនប់វារីអគ្គីសនីនេះទេ។ មូលហេតុដោយសារថា គម្រោងនេះត្រូវបានរដ្ឋសភា អនុម័តរួចទៅហើយ ប៉ុន្តែអ្វីដែលគណៈកម្មការទី៣នៃរដ្ឋសភាអាចធ្វើបាននៅពេលនេះ គឺការធ្វើរបាយការណ៍ជូនប្រធានរដ្ឋសភា ដើម្បីពិនិត្យ ហើយអ្វីដែលអាចធ្វើបានទៀតនោះ គឺការបន្តតាមដានការងារដែលរដ្ឋាភិបាលនិងភាគីពាក់ព័ន្ធបានសន្យាដោះស្រាយជាមួយនឹងពួកគេ។
សូមបញ្ជាក់ថា ទំនប់វារីអគ្គីសនីសេសានក្រោម២ ដែលអាចទាញយកថាមពលអគ្គីសនី បាន៤០០ ម៉េហ្គាវ៉ាត់ កំពុងដំណើរការសាងសង់បាន៣០ភាគរយហើយ ក៏ប៉ុន្តែក្រុមប្រជាពលរដ្ឋ និងអង្គការសង្គមស៊ីវិលជាច្រើននៅតែបន្តការតស៊ូមតិ ប្រឆាំងនឹងការសាងសង់ទំនប់វារីអគ្គិសនីនេះ រហូតទាល់តែការវាយតម្លៃពីផលប៉ះពាល់សង្គម និងបរិស្ថានឡើងវិញ។
តាមគម្រោង ទំនប់វារីអគ្គីសនីសេសានក្រោម២ នឹងសាងសង់រួចរាល់ជាស្ថាពរនៅក្នុងឆ្នាំ២០១៧ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ