សហភាពអឺរ៉ុបសម្រេចផ្តល់ជំនួយ៤១០លានអឺរ៉ូដល់កម្ពុជា រហូតដល់ឆ្នាំ២០២០
ឯកអគ្គរដ្ឋទូតនៃប្រតិភូសហភាពអឺរ៉ុប លោក ហ្សង់ ហ្វ្រង់ស័រ កូតាំង (Jean-Francois Cautain) បានប្រកាសនៅថ្ងៃពុធទី១៧ធ្នូនេះថា គណៈកម្មការសហភាពអឺរ៉ុប ទើបតែបានសម្រេចកាលពីថ្ងៃម្សិលម៉ិញថា សហភាពអឺរ៉ុប នឹងផ្តល់ជំនួយដល់កម្ពុជាចំនួន៤១០លានអឺរ៉ូ សម្រាប់វិស័យអាទិភាពចំនួន៣ ក្នុងនោះក៍មានការផ្តល់ជំនួយដល់សាលាក្តីខ្មែរក្រហមផងដែរ។ ការប្រកាសពីការផ្តល់ជំនួយនេះ បានធ្វើឡើង នៅក្នុងសន្និសីទកាសែតរួមគ្នាមួយ ជាមួយរដ្ឋមន្ត្រីក្រសួងអប់រំ យុវជននិងកីឡា លោក ហង់ ជួនណារ៉ុន ស្តីពីការចុះហត្ថលេខាលើកិច្ចព្រមព្រៀងផ្តល់ជំនួយជាង៣៧លានអឺរ៉ូ ដើម្បីបង្កើនការគាំទ្ររបស់ខ្លួនលើវិស័យអប់រំនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងសន្និសីទកាសែតនោះ លោក ហ្សង់ ហ្វ្រង់ស័រ កូតាំង (Jean-Francois Cautain) ឯកអគ្គ រដ្ឋទូតនៃប្រតិភូសហភាពអឺរ៉ុប បានបញ្ជាក់ថា សហភាពអឺរ៉ុប ទើបតែបានប្រកាសពីកាសម្រេចផ្តល់ជំនួយ៤១០លានអឺរ៉ូដល់កម្ពុជា សំរាប់ការអភិវឌ្ឍន៍លើវិស័យអទិភាពចំនួនបី ចាប់ពីឆ្នាំ២០១៤ ដល់ឆ្នាំ២០២០ខាងមុខ។ ក្នុងនោះ ថវិការចំនួន១៤០លានអឺរ៉ូ នឹងផ្តល់ទៅវិស័យអប់រំនៅកម្ពុជា។ ចំណែកឯវិស័យអាទិភាពពីរទៀត គឺវិស័យកសិកម្មគ្រប់គ្រងធនធានធម្មជាតិ និងវិស័យអភិបាលកិច្ចល្អ និងផ្តល់ជូនក្នុងរង្វង់ថវិការពី១៣០ រឺ១៤០លានអឺរ៉ូ ហើយក្នុងនោះ ក៍មានការផ្តល់ជំនួយដល់សាលាក្តីខ្មែរក្រហមផងដែរ។ ប៉ុន្តែយ៉ាងណាក៍ដោយ លោកឯកអគ្គរដ្ឋទូតសហភាពអឺរ៉ុប មិនទាន់អាចបញ្ជាក់អោយច្បាស់នៅឡើយទេថា តើក្នុងចំនោមថវិការ៤១០លានអឺរ៉ូនោះ នឹងផ្តល់ទៅអោយសាលាក្តីខ្មែរក្រហមប៉ុន្មាននៅឡើយទេ។ បើតាមលោក ហ្សង់ហ្វ្រង់ស័រ កូតាំង (Jean-Francois Cautain) នៅពីររឺបីសប្តាហ៍ខាងមុខទៀត នឹងមានការប្រកាសអំពីគម្រោងលំអិតនៃថវិការជំនួយនេះ។
សូមបញ្ជាក់ថា ការប្រកាសអំពីទឹកប្រាក់ផ្តល់ជំនួយដល់កម្ពុជានេះ បានធ្វើឡើង នៅក្នុងសន្និសីទកាសែតរួមគ្នាមួយ ស្តីពីការចុះហត្ថលេខាលើកិច្ចព្រមព្រៀងផ្តល់ជំនួយឥតសំណង ៣៧,៣ លានអឺរ៉ូសំរាប់ជួយវិស័យអប់រំនៅកម្ពុជាចាប់ពីឆ្នាំ២០១៤ដល់ឆ្នាំ២០១៦ ដែលធ្វើឡើងដោយ លោក ហ្សង់ហ្វ្រង់ស័រ កូតាំង (Jean-Francois Cautain) ឯកអគ្គរដ្ឋទូតនៃប្រតិភូសហភាពអឺរ៉ុប ប្រចាំនៅកម្ពុជា និងលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅឯវិទ្យាល័យព្រះស៊ីសុវត្ថិ ក្នុងរាជធានីភ្នំពេញ នាព្រឹកថ្ងៃទី១៧ខែធ្នូឆ្នាំ២០១៤នេះ។ តាមរយៈកិច្ចព្រមព្រៀងនេះ ថវិកាចំនួន៣២លានអឺរ៉ូ នឹងផ្តល់លើការគ្រប់គ្រងហិរញ្ញវត្ថុសាធារណៈ ហើយថវិការចំនួន ៥,៣លានអឺរ៉ូទៀត គឺប្រើទៅលើការអភិវឌ្ឍន៍សមត្ថភាព និងការអភិវឌ្ឍន៍ស្ថាប័ន។
លោកហង់ ជួន ណារ៉ុន ជឿជាក់ថា ថវិការគាំទ្រវិស័យអប់រំនេះ គឺជាយន្តការដ៏មានប្រសិទ្ធភាពបំផុត ដើម្បីភាពស័ក្តិសិទ្ធនៃការអភិវឌ្ឍ ពីព្រោះថា ថវិកានេះ ផ្តល់ជូនដោយផ្អែកទៅលើដំណើរការនៃការរៀបចំ ផែនការ ការរៀបចំថវិកា និងការចំណាយរបស់រដ្ឋាភិបាល។
សូមបញ្ជាក់ថា ក្នុងរយៈពេល១០ឆ្នាំចុងក្រោយ គិតត្រឹមឆ្នាំ២០១៤នេះ ការគាំទ្រហិរញ្ញវត្ថុដែលជាជំនួយឥតសំណងរបស់សហភាពអឺរ៉ុបសម្រាប់ការអភិវឌ្ឍន៍ និងការធ្វើកំណែទម្រង់វិស័យអប់រំ គឺមានចំនួនសរុបជិត១០០លានអឺរ៉ូរឺស្មើ១២៥លានដុល្លាអាមេរិក ដោយបូករួមទាំងការចុះហត្ថលេខាលើកិច្ចព្រមព្រៀងផ្តល់ជំនួយហិរញ្ញវត្ថុនៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ