ក្រសួងមហាផ្ទៃ ចាត់ទុក បន្ទប់ស្ថានការណ៍បង្កើតដោយសង្គមស៊ីវិល គឺផ្ទុយនឹងបទបញ្ញត្តិ
ក្រសួងមហាផ្ទៃ នៅយប់ថ្ងៃទី ៤ កក្កដា បានបញ្ជាឲ្យអង្គការខុមហ្រ្វែលនិងនិកហ្វិច បញ្ឈប់សកម្មភាពជាបន្ទាន់របស់បន្ទប់ស្ថានការណ៍ឃ្លាំមើលការបោះឆ្នោត។ ជាសកម្មភាពដែលត្រូវបានក្រសួងមហាផ្ទៃអះអាងថា អនុវត្តផ្ទុយទៅនឹងបទបញត្តិនៃច្បាប់ស្តីពីសមាគម។ ជាការឆ្លើយតប ខុមហ្វ្រែល ចាត់ទុកថា ការលើកឡើងនេះ គឺជារឹតត្បិតសេរីភាពបញ្ចេញមតិរបស់អង្គការសង្គមស៊ីវិល។
ចុះផ្សាយនៅថ្ងៃ៖
នៅក្នុងលិខិតផ្ញើទៅកាន់អង្គការខុមហ្វ្រែល និងនិកហ្វិច នៅយប់មិញនេះ លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ បានរិះគន់សេចក្តីថ្លែងការណ៍របស់ បន្ទប់ស្ថានការណ៍ ថាមិនមានតម្លៃគតិយុត្ត និងមិនបានឆ្លុះបញ្ចាំងពីអព្យាក្រឹត្យភាព ដូចមានចែង ក្នុងមាត្រា២៤ នៃច្បាប់ស្តីពីសមាគម និងអង្គការមិនមែនរដ្ឋាភិបាល។ លោក ស ខេង បានបង្គាប់ឱ្យអង្គការទាំងពីរ ដែលជាអ្នកផ្តួចផ្តើម បង្កើតបន្ទប់ស្ថានការណ៍ បញ្ឈប់សកម្មភាពខុសច្បាប់ និងត្រូវអនុវត្តសកម្មភាពខ្លួនឱ្យបានត្រឹមត្រូវ ស្របតាមច្បាប់ស្តីពីសមាគម ច្បាប់ និងលិខិតបទដ្ឋានគតិយុត្តនានាជាធរមាន។
ភ្លាមៗក្រោយលិខិតរបស់ក្រសួងមហាផ្ទៃ អង្គការខុមហ្វ្រែលចាត់ទុកថា ការលើកឡើងនេះគឺការរិតដ្បិតសិទ្ធិ និងសេរីភាពនៃការចូលរួម និងសិទ្ធិប្រមូលផ្តុំរបស់អង្គការសង្គមស៊ីវិលក្នុងការសហការណ៍ សម្របសម្រួលនៃការឃ្លាំមើលដំណើរការបោះឆ្នោតនៅកម្ពុជា និងសិទ្ធិចូលរួមក្នុងដំណើរការនៃការអនុវត្តលទ្ធិប្រជាធិបតេយ្យនៅកម្ពុជា។
សូមរំឮកជូនថា ការចេញមុខព្រមានរបស់ក្រសួងមហាផ្ទៃពេលនេះ ធ្វើឡើងបន្ទាប់ពី លោកនាយករដ្ឋមន្រ្តី ហ៊ុន សែន បានបញ្ជាឲ្យបើកការស៊ើបអង្កេតសកម្មភាពរបស់បន្ទប់ស្ថានការណ៍។ លោក ហ៊ុន សែន យល់ឃើញថា បន្ទប់ស្ថានការណ៍ឃ្លាំមើលការបោះឆ្នោត គឺជាដៃជើងរបស់គណបក្សប្រឆាំងព្រោះថា បានចេញសេចក្តីថ្លែងការណ៍ក្នុងន័យស្រដៀងគ្នាចាត់ទុកដំណើរការបោះឆ្នោតឃុំសង្កាត់កន្លងទៅថា គ្មានសេរីភាពពេញលេញ និងមិនយុត្តិធម៌នោះឡើយ។ ហើយលោក បានចាត់ទុកថា ក្រុមទាំងនោះបានធ្វើសកម្មភាព និងសេចក្តីថ្លែងការណ៍ ធ្វើឲ្យប៉ះពាល់ដល់រូបភាពការបោះឆ្នោតនៅកម្ពុជា។
ជាការឆ្លើយតបនៅពេលនោះ បន្ទប់ស្ថានការណ៍បានចេញសេចក្តីប្រកាសព័ត៌មានដោយពន្យល់ពីតួនាទីនិងគោលបំណងរបស់ខ្លួនថា គឺបង្កើតឡើងដើម្បីដាក់ពង្រាយអ្នកសង្កេតការណ៍ក្នុងស្រុកនៅថ្ងៃបោះឆ្នោតឃុំសង្កាត់ដោយមានការទទួលស្គាល់ពីគជប ចែករំលែកនិងធ្វើបច្ចុប្បន្នភាពព័ត៌មានទាក់ទងការបោះឆ្នោត និង វាយតម្លៃផ្ទៀងផ្ទាត់លទ្ធផលនៃការបោះឆ្នោតដោយផ្អែកលើបទដ្ឋានច្បាប់ជាតិ និងអន្តរជាតិក្នុងអំឡុងពេលបោះឆ្នោតក្រុមប្រឹក្សាឃុំសង្កាត់តែប៉ុណ្ណោះ។ បើតាមបន្ទប់ស្ថានការណ៍ ក្រោយពីការបោះឆ្នោតត្រូវបានបញ្ចប់ សកម្មភាពរបស់ខ្លួនក៏ត្រូវបានបញ្ចប់ដែរកាលពីថ្ងៃទី ២៤ មិថុនាកន្លងទៅ។
នៅថ្ងៃទី៤ កក្កដា ដដែលនេះ ក្រសួងមហាផ្ទៃបានចេញសេចក្តីជូនដំណឹងមួយដាច់ដោយឡែកទៀត ដោយ ព្រមានដល់សមាគម និងអង្គការមិនមែនរដ្ឋាភិបាលមួយចំនួន ដែលមិនបានអនុវត្តឱ្យបានត្រឹមត្រូវតាម ច្បាប់ស្តីពីសមាគម ជាពិសេសតាមលក្ខខណ្ឌដែលកំណត់ដោយមាត្រា១០ និងមាត្រា២៥ នៃច្បាប់នេះ។ ក្រសួង អះអាងថា មួយរយៈកន្លងទៅនេះ មានអង្គការមិនមែនរដ្ឋាភិបាលក្នុងស្រុកមួយចំនួន ដែលបានចុះបញ្ជី និងតម្កល់សំណុំឯកសារនៅក្រសួងមហាផ្ទៃ មិនបានយកចិត្តទុកដាក់ អនុវត្តតាមបទបញ្ញត្តិនៃមាត្រាខាងលើនេះទេ និងបានអនុវត្តផ្ទុយពីលក្ខន្តិកៈរបស់ខ្លួនថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ