ក្រុមមេធាវីស្នើតុលាការសុំផ្ទេរការឃុំខ្លួនលោកកឹម សុខា ពីត្រពាំងផ្លុងមកពន្ធនាគារប៉េហ្ស៊ីនៅភ្នំពេញ
ក្រុមមេធាវីការពារក្តីលោកកឹម សុខា កំពុងរៀបចំសំណើមួយទៅកាន់តំណាងអយ្យការតុលាការក្រុងភ្នំពេញ ដើម្បីស្នើសុំផ្ទេរលោកកឹម សុខា ពីការឃុំខ្លួននៅក្នុងពន្ធនាគារត្រពាំងផ្ទុងក្នុងខេត្តត្បូងឃ្មុំមកកាន់ពន្ធនាគារប៉េហ្ស៊ី(PJ)ក្នុងរាជធានីភ្នំពេញវិញ។ បើតាមក្រុមមេធាវី សំណើនេះ នឹងដាក់ជូនអយ្យការតុលាការក្រុងភ្នំពេញនៅក្នុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:១០
ការស្នើសុំផ្ទេរលោកកឹម សុខា ពីត្រពាំងផ្លុងមកកាន់ប៉េហ្ស៊ីនេះ ក្រុមមេធាវីបានសំអាងទៅលើហេតុផលបីសំខាន់ៗ គឺទី១ ក្រុមមេធាវីយល់ថា ការផ្ទេរលោកកឹម សុខា មកពន្ធនាគារក្នុងរាជធានីភ្នំពេញ គឺផ្តល់ភាពងាយស្រួលទាំងតុលាការ និងក្រុមមេធាវីផ្ទាល់តែម្តងក្នុងការអនុវត្តនីតិវិធី និងផ្តល់ប្រឹក្សាផ្នែកច្បាប់ដល់លោកកឹម សុខា ជាដើម។ ទីពីរ ក្រុមមេធាវីអះអាងថា ការឃុំខ្លួនលោកកឹម សុខា នៅឆ្ងាយបែបនេះ គឺមានការលំបាកសម្រាប់តុលាការ និងអាជ្ញាធរនៅពេលត្រូវនាំខ្លួនលោកមកកាន់តុលាការ ដើម្បីធ្វើសវនាការណាមួយនោះ។ ចំណែកទីបី គឺពាក់ព័ន្ធនឹងបញ្ហាសុខភាពរបស់លោកកឹម សុខា ពោលគឺក្រុមមេធាវីយល់ថា នៅពេលលោកកឹម សុខាត្រូវឃុំខ្លួននៅភ្នំពេញវិញ វាងាយស្រួលសម្រាប់គាត់ក្នុងពេលមានបញ្ហាសុខភាពណាមួយ គឺអាចជួបពេទ្យដែលមានវិជ្ជាជីវៈត្រឹមត្រូវ។ ម៉្យាងវិញ ការដាក់ឃុំខ្លួននៅភ្នំពេញនេះ ក៏ផ្តល់ភាពងាយស្រួលដល់ក្រុមគ្រួសារ និងមិត្តភក្តិលោកកឹម សុខា អាចចូលមកជួបសួរសុខទុក្ខលោក។
សូមរំលឹកថា សំណើទៅកាន់អយ្យការតុលាការក្រុងភ្នំពេញនេះ បានកើតឡើងបន្ទាប់ពីក្រុមមេធាវីបានដាក់សំណើរបៀបនេះទៅកាន់ចៅក្រមស៊ើបសួរម្តងរួចហើយ។ បើតាមលោកសំ សុគង់ ដែលជាសហមេធាវីម្នាក់របស់លោកកឹម សុខា គឺចៅក្រមស៊ើបសួរ បានណែនាំឲ្យដាក់សំណើនេះទៅកាន់អយ្យការតុលាការក្រុងភ្នំពេញវិញ ព្រោះមិនមែនជាសមត្ថកិច្ចរបស់ចៅក្រមស៊ើបសួរ។ យ៉ាងណាក៏ដោយ ចំពោះសំណើសុំផ្ទេរការឃុំខ្លួនលោកកឹម សុខានេះ ក្រុមមេធាវីបក្សប្រឆាំងមិនបានផ្តល់ក្តីសង្ឃឹមណាមួយទេ ដោយគ្រាន់តែអះអាងថា ធ្វើទៅតាមនីតិវិធីដែលអាចធ្វើបានតែប៉ុណ្ណោះ។
លោកកឹម សុខា ប្រធានគណបក្សសង្រ្គោះជាតិត្រូវបានឃុំខ្លួននៅក្នុងពន្ធនាគារត្រពាំងផ្ទុងក្នុងខេត្តត្បូងឃ្មុំក្រោមបទចោទប្រកាន់ក្បត់ជាតិ។ កាលពីថ្ងៃទី២៦ ខែមុន សាលាឧទ្ធរណ៍បានសវនាការលើបណ្តឹងប្រឆាំងនឹងការឃុំខ្លួនលោកកឹម សុខាម្តងរួចមកហើយ។ គឺនៅពេលនោះហើយ លោកកឹម សុខា មិនត្រូវបានអាជ្ញាធរនាំខ្លួនកាន់តុលាការឡើយក្រោមហេតុផលសុវត្ថិភាព និងសន្តិសុខសណ្តាប់ធ្នាប់។ នៅត្រង់ចំណុចនេះ លោកមេធាវីសំ សុគង់ គូសបញ្ជាក់ថា ប្រសិនបើលោកកឹម សុខា ត្រូវឃុំខ្លួននៅក្នុងរាជធានីភ្នំពេញវិញនោះ គឺវាផ្តល់ភាពងាយស្រួលក្នុងការនាំខ្លួនលោកកឹម សុខា មកចូលរួមនៅក្នុងសវនាការរបស់តុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ