អ្នកវិភាគសង្គម៖ រដ្ឋាភិបាលត្រូវបង្កើតច្បាប់ពិសេសការពារព្រៃឡង់
អ្នកវិភាគសង្គមបានបញ្ជាក់ថារដ្ឋាភិបាលត្រូវតែបង្កើតច្បាប់ពិសេសមួយ ការពារព្រៃឡង់ ដោយមិនអនុញ្ញាតឲ្យផ្តល់អាជ្ញាប័នដល់ក្រុមហ៊ុនណាមួយទេ ហើយផ្តល់សិទ្ធិអំណាចពេញលេញទៅដល់សហគមន៍ព្រៃឈើ។ ការបញ្ជាក់បែបនេះ របស់អ្នកវិភាគសង្គម បានធ្វើឡើងក្រោយពីបញ្ចប់វេទិកាស្តីពីព្រៃឡង់ នៅព្រឹកថ្ងៃទី៣១ ខែមករានេះ។ ដោយឡែក រដ្ឋាភិបាលបដិសេធនូវ ការបង្កើតច្បាប់ពិសេសថ្មីទៀត ដើម្បីការពារព្រៃឡង់។
ចុះផ្សាយនៅថ្ងៃ៖
ស្តាប់ - ០២:០៦
នៅព្រឹកថ្ងៃទី៣១ មករា នេះក្រុមយុវជនបានជជែកគ្នាពីព្រៃឡង់ ដែលបានធ្វើឡើងនៅសាកលវិទ្យាល័យZAMAN រាជធានីភ្នពេញ។ ក្រុមយុវជនបានជជែកគ្នាពីផលប្រយោជន៍របស់ព្រៃឡង់សម្រាប់សហគមន៍នៅជុំវិញតំបន់នោះ និងសង្គមទាំងមូល។ ចំណែកអ្នកសិក្សាបញ្ហាសង្គម លោកបណ្ឌិត កែម ឡី ដែលបានចូលរួមក្នុងវេទិកានោះ បានឲ្យដឹងថា រដ្ឋាភិបាលកម្ពុជា ត្រូវតែបង្កើតច្បាប់ពិសេសមួយ សម្រាប់ការពារព្រៃឡង់ ដោយមិនត្រូវផ្តល់អាជ្ញាប័នដល់ក្រុមហ៊ុនណាមួយទេ ក្នុងតំបន់ព្រៃឡង់។ បន្ថែមពីនេះច្បាប់ពិសេសនោះ ត្រូវដាក់ទោសចំពោះជនណាដែលកាប់ព្រៃឡង់។
លោក កែម ឡី បានបន្ថែមទៀតថា ដើម្បីឲ្យព្រៃឡង់ស្ថិតស្ថេរគង់វង្ស រដ្ឋាភិបាលគួរតែផ្តល់សិទ្ធិអំណាចគ្រប់គ្រងព្រៃនេះ ដល់សហគមន៍ព្រៃឈើ ក្រោមអភិបាលកិច្ចរបស់ក្រុមប្រឹក្សាឃុំ ហើយរដ្ឋាភិបាលដើរតួជាអ្នកផ្តល់បច្ចេកទេស។ បើតាមអ្នកសិក្សាបញ្ហាសង្គមរូបនេះ បានឲ្យដឹងទៀតថាកន្លងមកប្រជាសហគមន៍ព្រៃឈើ មិនអាចទប់ស្កាត់ការបំផ្លាញព្រៃឈើបាន ដោយសារតែក្រុមហ៊ុនធំៗ មួយចំនួនមានខ្នង មានបង្អែកនៅខាងលើ។
លោក អ៊ាង សុផល្លែត អ្នកនាំពាក្យក្រសួងកសិកម្មបានឲ្យដឹងថា លោកមិនទាន់ទទួលបានព័ត៌មាន ទាក់ទងនឹងច្បាប់ពិសេសេនេះទេ។ តែពេលនេះ ច្បាប់ព្រៃឈើដែលមានស្រាប់ ត្រូវបានរដ្ឋាភិបាលកម្ពុជាជម្រុញឲ្យសភាធ្វើវិសោធនកម្ម ដូច្នេះបើមានករណីចាំបាច់គួរតែបញ្ចូលចំណុចនោះ ក្នុងច្បាប់ព្រៃឈើតែមួយទៅ មិនគួរមានច្បាប់ពិសេសអ្វីទៀតទេ។
ព្រៃឡង់ គឺជាព្រៃមួយគ្រប់ដណ្តប់លើខេត្តចំនួន៤ រួមមានខេត្តកំពង់ធំ ព្រះវិហារ ស្ទឹងត្រែង និងខេត្តក្រចេះ។ ព្រៃនេះ គឺជាព្រៃស្រោងតំបន់ទំនាបធំជាងគេបង្អស់នៅកម្ពុជា។ មិនតែប៉ុណ្ណោះ តាមរយៈការសិក្សាថ្មីមួយរបស់អង្គការអភិរក្សអន្តរជាតិ និងអង្គការវីនរ៉ក់អន្តរជាតិ កាលពីឆ្នាំ២០១៥ បានឲ្យដឹងថា តំបន់ព្រៃឡង់ គឺជាទីជម្រករបស់ប្រភេទសត្វ និងរុក្ខជាតិជិត១ពាន់ប្រភេទ។ ព្រៃឡង់ គឺជាប្រភពនៃជីវិតសម្រាប់មនុស្សប្រមាណ២សែន ៥ម៉ឺននាក់ ដែលរស់នៅជុំវិញវា។
បើតាមតំណាងសហគម៍ព្រៃឡង់ លោក សេង សុខហេង បានឲ្យវិទ្យុបារាំងដឹងថា រហូតមកដល់ពេលនេះ ព្រៃឡង់មិនទាន់ត្រូវបានដាក់បញ្ចូលក្នុងតំបន់ការពារនៅឡើយទេ។ ចំពោះកិច្ចការពារកន្លងមក ក្រុមសហគមន៍ព្រៃឡង់ បានបង្ក្រាបបទលើ្មសព្រៃឈើ ដោយចាប់បានម៉ាស៊ីនអារឈើរាប់សិបគ្រឿង និងឈើរាប់ម៉ែត្រគូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ