ហ្វេសប៊ុក ឆ្លុះបញ្ចាំងពីភាពប្រេះឆាក្នុងសង្គមខ្មែរ
ចុះផ្សាយនៅថ្ងៃ៖
ស្តាប់ - ០៤:២៦
សង្គ្រាមសំណេរនៅតាមបណ្ដាញសង្គម រិះគន់ខ្លោងទ្វារអង្គរសង្ក្រាន្តនៅខេត្តសៀមរាបបានឡើងកម្ដៅខ្លាំងក្នុងសប្ដាហ៍នេះ។ គឺខ្លាំងរហូតជំរុញឲ្យជនមិនស្គាល់មុខ ដុតបំផ្លាញខ្លោងទ្វារនោះ កាលពីយប់អាធ្រាតឈានចូលថ្ងៃអង្គារ។ បណ្ដាញសង្គម ពីមួយថ្ងៃទៅមួយថ្ងៃ បានជះឥទ្ធិពលកាន់តែខ្លាំងឡើងៗនៅក្នុងសង្គមកម្ពុជា។ តើបណ្ដាញសង្គមនេះធ្វើឲ្យកម្ពុជាប្រេះឆាឬយ៉ាងណា? ឬថា កម្ពុជាប្រេះឆារួចជាស្រេចទៅហើយ?
នៅកម្ពុជា អ្នកប្រើប្រាស់បណ្ដាញសង្គមហ្វេសប៊ុកមានជាង១លាន៤សែននាក់។ ចំនួននេះ ស្មើនឹង១០ភាគរយ នៃប្រជាជនសរុបរបស់កម្ពុជា។ នេះបើតាមស្ថិតិ ចុះផ្សាយដោយគេហទំព័រ Geeks in Cambodia នៅក្នុងឆ្នាំ២០១៤។ ហ្វេសប៊ុក មានលក្ខណៈសេរី និងទូលំទូលាយ។ វាបានក្លាយជាឧបករណ៍ដ៏សំខាន់ ដែលត្រូវប្រជាពលរដ្ឋកម្ពុជា ប្រើប្រាស់ដើម្បីអនុវត្តសេរីភាពបញ្ចេញមតិរបស់ពួកគេ។ ជនជាតិខ្មែរដែលប្រើប្រាស់បណ្ដាញសង្គមហ្វេសប៊ុកសព្វថ្ងៃនេះ មានភាពក្លាហាន ក្នុងការបង្ហាញពីការយល់ឃើញ ក៏ដូចជានិន្នាការនយោបាយរបស់ខ្លួនយ៉ាងបើកចំហ។ គំនិតគាំទ្រ ឬរិះគន់គណបក្សណាមួយ ត្រូវបានបញ្ចេញមកក្រៅដោយឥតលាក់លាម តាមរយៈក្ដារចុចកុំព្យូទ័រឬទូរស័ព្ទ។
ជាការពិត នេះមិនមែនជារឿងប្លែកទេនៅក្នុងសង្គមដែលប្រកាន់យករបបប្រជាធិបតេយ្យសេរីពហុបក្សដូចកម្ពុជា។ អ្វីដែលប្លែកនោះ គឺការប្រកាន់ជំហជ្រុលនិយមរៀងៗខ្លួន របស់ក្រុមអ្នកគាំទ្រគណបក្សនយោបាយ។ ជារឿយៗ អ្នកគាំទ្រគណបក្សកាន់អំណាចនិងគណបក្សប្រឆាំងមួយចំនួនធំ បានជ្រើសយកទស្សនៈអញនិយមមកដាក់ក្នុងខ្លួន។ ទស្សនៈអញនិយមដែលយល់ថា អ្វីៗដែលជារបស់អញ ឬអ្វីៗដែលអញស្រឡាញ់ពេញចិត្ត គឺសុទ្ធតែត្រូវល្អឥតខ្ចោះ។ ហើយទង្វើ ឬកម្មសិទ្ធិគ្រប់យ៉ាងរបស់គូសត្រូវខ្លួន គឺសុទ្ធតែអាក្រក់រកលេខដាក់គ្មាន។
នៅពេលដែលអ្នកនយោបាយកម្ពុជារក្សាភាពស្ងប់ស្ងាត់ និងនៅពេលដែលគ្មានបាតុកម្មប្រឆាំងបែបចេញមុខ អ្នកគាំទ្រនយោបាយបានប្រើប្រាស់បណ្ដាញសង្គម ដើម្បីបង្ហាញពីទស្សនៈអញនិយម និងជំហជ្រុលនិយម។ អ្នកជ្រុលនិយមអស់ទាំងនេះ អាចបង្កើតសង្គ្រាមក្ដារចុចបានគ្រប់ពេលទាំងអស់ តាមរយៈការរិះគន់ឈ្នានីស។ ហើយការរិះគន់នេះទៀតសោត មិនមែនធ្វើឡើងចំពោះរឿងនយោបាយតែមួយមុខនោះទេ ប៉ុន្តែចំពោះគ្រប់វិស័យទាំងអស់។
ករណីខ្លោងទ្វារអង្គរសង្ក្រាន្តនៅខេត្តសៀមរាបជាឧទាហរណ៍ថ្មីបំផុត ដែលកើតឡើងដោយសារភាពជ្រុលនិយម។ ខ្លោងទ្វារនេះ ទទួលរងនូវការរិះគន់យ៉ាងចាស់ដៃថា គ្មានរចនាបទជាខ្មែរ តែបែរជាមានសណ្ឋានដូចរចនាបទវៀតណាមនិងចិនទៅវិញ។ រូបភាពត្រូវគេបង្ហោះតៗគ្នា។ បុគ្គលមួយចំនួនថែមទាំងបានបង្កើតយុទ្ធនាការប្រឆាំងអង្គរសង្ក្រាន្ត មិនទៅចូលរួមព្រឹត្តិការណ៍អង្គរសង្ក្រាន្ត ដោយសារតែខ្លោងទ្វារនេះថែមទៀតផង។ សង្គ្រាមសំណេរនៅតាមបណ្ដាញសង្គមឡើងកំដៅ រហូតធ្វើឲ្យខ្លោងទ្វារដែលមានភាពចម្រូងចម្រាស់នោះ ត្រូវជនមិនស្គាល់មុខដុតបំផ្លាញកាលពីយប់អាធ្រាតឈានចូលថ្ងៃអង្គារ។
តើដោយសារតែបណ្ដាញសង្គមហ្វេសប៊ុកឬ ដែលធ្វើឲ្យរឿងនេះរីកធំឡើងៗ រហូតធ្វើឲ្យសង្គមខ្មែរបែកបាក់ប្រេះឆា? ឬថាសង្គមខ្មែរប្រេះឆារួចស្រេចទៅហើយ?
មែនទែនទៅ ភាពប្រេះឆានៅក្នុងសង្គមខ្មែរ មានតាំងពីយូរមកហើយ ហើយវាបានបង្ហាញយ៉ាងច្បាស់ នៅក្រោយការបោះឆ្នោតខែកក្កដា ឆ្នាំ២០១៣។ ហ្វេសប៊ុក គ្រាន់តែដើរតួជាសង្វៀនប្រដាល់សាធារណៈ ដែលអនុញ្ញាតឲ្យភាគីទំនាស់ ឡើងមកប្រកួតគ្នាដោយសេរីតែប៉ុណ្ណោះ។ ចំណែកលទ្ធផលឈ្នះចាញ់យ៉ាងនា វាអាស្រ័យលើបំណិនប្រសព្វនៃសំណេររិះគន់លាបពណ៌របស់ភាគីម្ខាងៗ។ ប៉ុន្តែ សួរថាតើទង្វើអស់ទាំងនេះ វាផ្ដល់ប្រយោជន៍អ្វីខ្លះដល់សង្គមជាតិ ក្រៅតែពីភាពបែកបាក់ ប្រេះឆា?
ការរិះគន់ ដូចដែលបានលើកឡើងពីខាងដើមអ៊ីចឹង ថាជារឿងធម្មតានៅក្នុងសង្គមដែលប្រកាន់យកលទ្ធិប្រជាធិបតេយ្យ។ ប៉ុន្តែការរិះគន់ដែលមានប្រយោជន៍ និងមានតម្លៃ គឺត្រូវតែជាការរិះគន់ស្ថាបនា ដែលផ្អែកលើការសិក្សាគ្រប់ជ្រុងជ្រោយ និងមានបង្ហាញពីដំណោះស្រាយដ៏សមស្រប។ ចំណែកអ្នកដែលរងការរិះគន់ទៀតសោត ក៏ត្រូវទទួលយកគំនិតរិះគន់ស្ថាបនានោះ ទៅពិចារណា ដើម្បីកែលម្អចំណុចខ្វះខាតរបស់ខ្លួនផងដែរ។ គួរឲ្យសោកស្ដាយ ដែលពលរដ្ឋខ្មែរភាគច្រើន នៅមិនទាន់មានទំលាប់ដ៏ល្អទាំងនេះនៅឡើយ។
ជាថ្មីម្ដងទៀត បណ្ដាញសង្គម មិនបានធ្វើឲ្យពលរដ្ឋខ្មែរបែកបាក់ប្រេះឆាឡើយ។ ស្នាមប្រេះឆាមានរួចស្រេចទៅហើយ។ ខណៈដែលសង្គមខ្មែរនៅក្រោមសម្ពាធភាពជ្រុលនិយម ហ្វេសប៊ុកបានក្លាយទៅជាឧបករណ៍ដែលធ្វើឲ្យសង្គមនេះ រហែកចេញពីគ្នាកាន់តែលឿនរហ័ស។ គ្មានពលរដ្ឋខ្មែរណា ដែលចង់ឃើញប្រទេសរបស់ខ្លួនបែកបាក់នោះទេ។ ហេតុដូច្នេះ មិនថានៅតាមបណ្ដាញសង្គម ឬនៅក្នុងជំនួបផ្ទាល់ទេ ប្រជាពលរដ្ឋខ្មែរគ្រប់រូប គួរតែជម្រុះចោលនូវភាពជ្រុលនិយម ហើយងាកមកប្រកាន់យកវប្បធម៌សន្ទនាគ្នាដោយក្ដីគោរព។ ការរិះគន់ឈ្នានីស និងការលាបពណ៌គួរតែបញ្ចប់ ជំនួសមកវិញនូវការរិះគន់ស្ថាបនា ប្រកបដោយការទទួលខុសត្រូវ ទើបជាការប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ