ក្រុមបណ្តាញសង្គមគ្រោងបង្កើតគណបក្សនៅតាមមូលដ្ឋានចំនួន២៥នៅឆ្នាំ២០១៥
ក្រុមបណ្តាញពលរដ្ឋសកម្មដើម្បីអភិវឌ្ឍន៍សង្គម ដែលមានសមាសភាពលោកកែម ឡី ដែរនោះ បានលើកឡើងថា បណ្តាញរបស់លោក នឹងគ្រោងបង្កើតគណបក្សនយោបាយនៅតាមមូលដ្ឋានឱ្យបាន២៥ឃុំសម្រាប់ឆ្នាំ២០១៥ខាងមុខ។ គណបក្សតាមមូលដ្ឋាននេះ គឺដើម្បីអប់រំពលរដ្ឋនៅតាមមូលដ្ឋានឱ្យយល់ពីសិទ្ធិនយោបាយ និងកិច្ចការនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ក្រុមបណ្តាញពលរដ្ឋសកម្ម (CAN) ដែលជាបណ្តុំនិស្សិតបញ្ញាវ័ន្ត ដែលរួមមានលោកកែម ឡីផង បានបញ្ជាក់ថា ចាប់ពីឆ្នាំ២០១៥តទៅ នឹងមានបណ្តាញគណបក្សនៅតាមមូលដ្ឋានចំនួន២៥ដំបូង ដែលប្រជាពលរដ្ឋនៅតាមមូលដ្ឋានផ្ទាល់ ជាអ្នកដឹកនាំ។ លោកបន្តថា ការបង្កើតគណបក្សនៅតាមមូលដ្ឋាននេះ គឺដើម្បីឱ្យពលរដ្ឋអនុវត្តសិទ្ធិនយោបារបស់ខ្លួននៅតាមមូលដ្ឋានតែម្តង។ បន្ទាប់ពីពួកគាត់ទទួលបានចំណេះដឹងស្តីពីនយោបាយ សិទ្ធិនយោបាយ ដែលបណ្តាញ CAN បានជួយបណ្តុះបណ្តាល និងជួយរៀបចំបង្កើតឡើង។
បើតាមលោកកែម ឡី ក្រុមបណ្តាញរបស់គាត់ មានមហិច្ឆតាចង់បង្កើតគណបក្សនយោបាយនៅតាមមូលដ្ឋានឱ្យបានគ្រប់ឃុំនៅទូទាំងប្រទេសកម្ពុជា ក្នុងរយៈពេល៣ឆ្នាំ ចាប់ពីឆ្នាំ២០១៥តទៅ។ យ៉ាងណាក៏ដោយដើម្បីសម្រេចដល់គោលដៅនៃការបង្កើតគណបក្សនយោបាយនៅតាមមូលដ្ឋាននេះ ក្រុមបណ្តាញសង្គម នឹងបើកកិច្ចប្រជុំដំបូងរបស់ខ្លួននៅថ្ងៃទី២៧ធ្នូខាងមុខដែលមានសមាសភាព១៥០នាក់ មកពីគ្រប់មជ្ឈដ្ឋានចូលរួម។ ទោះបីជាបែបណាក៏ដោយ លោកកែម ឡី ដែលជាសមាសភាពដឹកនាំក្រុមមួយរូប បានលើកឡើងថា ក្រុមបណ្តាគណបក្សនយោបាយនៅតាមមូលដ្ឋាននោះគឺជាបក្សស្វ័យឯករាជ្យដោយខ្លួនឯង។
សម្រាប់លោក សុខ ទូច បណ្ឌិតវិទ្យាសាស្ត្រនយោបាយ ការបង្កើតគណបក្សនយោបាយនៅតាមមូលដ្ឋាននេះ គឺជាការបង្ហាញសាច់ដុំដល់គណបក្សនយោបាយនៅកម្ពុជា ព្រោះថា ការបង្កើតកំលាំងនៅតាមមូលដ្ឋានគឺជាអំណាចដ៏រឹងមាំ។ លោក សុខ ទូច បានសង្កត់ធ្ងន់ថា ការបង្កើតគណបក្សនយោបាយពីក្រោមឡើងទៅលើនេះ គឺជាការលំបាកខ្លាំងណាស់ ព្រោះតែបញ្ហាចំណេះដឹងមានកម្រិតនៅតាមមូលដ្ឋាន រចនាសម្ព័ន្ធការលំបាកគ្រប់គ្រង និងផុយស្រួយក្នុងការបំបែក។ ទោះបីជាបែបណាក៏ដោយ លោក សុខ ទូច បញ្ជាក់ថា ការបង្កើតនេះជាជំហានទៅបង្កើតគណបក្សនយោបាយក្នុងការប្រកួតប្រជែងខាងមុខ។ ដូចនេះ លោកសុខ ទូច ស្នើឱ្យបង្កើតរចនាសម្ព័ន្ធគ្រប់គ្រងត្រឹមត្រូវ មូលដ្ឋានហិរញ្ញវត្ថុ និងទីតាំងគណបក្សឱ្យបានច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ