លោកសុខ ឥសានៈ សមាជិកអតីតគណបក្សប្រឆាំងចូលរួមជាមួយគណបក្សប្រជាជនអាចនឹងកើនដល់ជិត១ពាន់នាក់
នៅសល់តែមួយថ្ងៃទៀតប៉ុណ្ណោះ ការកំណត់ទទួលមន្ត្រីជាន់ខ្ពស់និងចៅសង្កាត់ មេឃុំ និងសមាជិកក្រុមប្រឹក្សាឃុំ សង្កាត់ សមាជិកបំរុងអតីតគណបក្សសង្គ្រោះជាតិ ទៅក្នុងជីវភាពនយោបាយគណបក្សប្រជាជន នឹងដល់ទីត្រូវបញ្ចប់។ កាលពីម្សិលមិញ លោកនាយករដ្ឋមន្ត្រីហ៊ុន សែន ក៏បានផ្តល់ការលើកទឹកចិត្តរហូតដល់សមាជិកបំរុងរបស់អតីតគណបក្សប្រឆាំងផងដែរ ក្នុងការចូលរួមជាមួយបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០២:១៣
រហូតមកដល់ល្ងាចម្សិលមិញ មន្ត្រីជាន់ខ្ពស់ មេឃុំ ចៅសង្កាត់ និងសមាជិកក្រុមប្រឹក្សា និងសមាជិកក្រុមប្រឹក្សាបំរុងនៃអតីតគណបក្សសង្គ្រោះជាតិ បានចូលរួមជីវភាពនយោបាយជាមួយគណបក្សប្រជាជនកម្ពុជា មានប្រមាណជាជាង៥០០នាក់។
តាមរបាយការណ៍គណបក្សប្រជាជនកម្ពុជាកាលពីថ្ងៃទី២២វិច្ឆិកាម្សិលមិញ ចំនួនមន្ត្រីជាន់ខ្ពស់ដែលបានចុះចូលគណបក្សប្រជាជន ក្រោយរំលាយគណបក្សប្រឆាំង មានតែតំណាងរាស្ត្រម្នាក់ប៉ុណ្ណោះគឺលោកឡុង ប៊ុន្នី។ ក្រៅពីនោះ មានក្រុមប្រឹក្សាខេត្ត៧នាក់ ក្រុមប្រឹក្សាស្រុកក្រុង ៤៤នាក់ ក្រុមប្រឹក្សាឃុំ-សង្កាត់ ៥១០នាក់ ក្នុងនោះមានមេឃុំ ចៅសង្កាត់ ជំទប់ទី១ ជំទប់ទី២ និងសមាជិកក្រុមប្រឹក្សា មកពី៣៦៧ឃុំ-សង្កាត់។
ក៏ប៉ុន្តែលោកសុខ ឥសាន អ្នកនាំពាក្យគណបក្សប្រជាជនកម្ពុជា បញ្ជាក់នៅថ្ងៃនេះថាការសុំចូលរួមជីវភាពនយោបាយរបស់អតីតមន្ត្រីបក្សប្រឆាំងជាមួយគណបក្សប្រជាជនបានកើនឡើងដល់ជាង៦០០នាក់ហើយ ហើយនឹងអាចលោតដល់ពី៧០០ទៅ៨០០នាក់ នៅថ្ងៃសុក្រស្អែក ដែលជាថ្មីកំណត់ចុងក្រោយ។
នៅមិនមានប្រតិកម្មណាមួយពីសំណាក់អតីតមន្ត្រីគណបក្សសង្គ្រោះជាតិជុំវិញការចុះចូលជាមួយគណបក្សកាន់អំណាចកាន់តែច្រើនទៅៗនៅពេលនេះទេ ក៏ប៉ុន្តែកន្លងមកមន្ត្រីអតីតគណបក្សសង្គ្រោះជាតិបានហៅថាការចាកចេញរបស់សមាជិកទាំងថ្នាក់លើនិងថ្នាក់ក្រោមថាជាចំនួនតិចតួច ធៀបទៅនឹងសមាជិកក្រុមប្រឹក្សាឃុំ សង្កាត់ ដែលអតីតគណបក្សប្រឆាំងកាន់កាប់នៅទូទាំងប្រទេសចំនួនជាង៥ពាន់នាក់។
សូមរំលឹកថា ការចុះចូលរបស់មន្ត្រី មេឃុំ ចៅសង្កាត់ និងសមាជិកក្រុមប្រឹក្សារបស់អតីតគណបក្សសង្គ្រោះជាតិជាបន្តបន្ទាប់បែបនេះ បានធ្វើឡើងបន្ទាប់ពីមានការអំពាវនាវរបស់លោកនាយករដ្ឋមន្ត្រីហ៊ុន សែន ខណៈដែលគណបក្សប្រឆាំងត្រូវបានរំលាយកាលពីថ្ងៃទី១៦វិច្ឆិកា។លោកហ៊ុន សែន ក្នុងនាមប្រធានគណបក្សប្រជាជនកម្ពុជា បានសន្យាថានឹងផ្តល់ជូនដល់អ្នកចុះចូលឬចូលរួមជីវភាពនយោបាយជាមួយគណបក្សកាន់អំណាចនូវមុខតំណែង និងតួនាទីការងារដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ