បណ្ឌិត សុខ ទូច ចង់បានយន្តហោះ Drone ដើម្បីស្រាវជ្រាវរឿងព្រំដែន!
លោកបណ្ឌិត សុខ ទូច ប្រាប់វិទ្យុបារាំងអន្តរជាតិ នៅថ្ងៃសៅរ៍នេះថា ក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា កំពុងតែខ្វះយន្តហោះ ឌ្រូន (Drone) ដើម្បីចុះទៅពិនិត្យព្រំដែន ប្រៀបធៀបផែនទី និង ផែនដីជាក់ស្តែង។ ចំណែកបញ្ហាថវិកាស្រាវជ្រាវវិញ ក៏មានតិចតួចស្តួចស្តើងដែរ។ មិនតែប៉ុណ្ណោះ លោកបណ្ឌិតរូបនេះថា គាត់ត្រូវរងការជេរប្រមាថ ត្មិះតិះដៀលដល់វង្សត្រូកូល ដែល«លំបាកទទួលយក»ដោយសារតែរឿងព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោកបណ្ឌិត សុខ ទូច ប្រធានក្រុមស្រាវជ្រាវព្រំដែន នៃរាជបណ្ឌិត្យសភាកម្ពុជា បានបង្ហើបឲ្យដឹងថា ក្រុមអ្នកស្រាវជ្រាវរបស់លោក កំពុងតែប្រឈមនឹងបញ្ហាថវិកា ពិសេសគឺការរកលុយទិញយន្តហោះ Drone ដើម្បីយកទៅពិនិត្យព្រំដែនផ្ទាល់តែម្តង។ បើតាមលោកបណ្ឌិតដដែលនេះ ការមានយន្តហោះឌ្រូន គឺប្រយោជន៍ដើម្បីដាក់ GPS បៀបធៀបផែនទីនិងផែនដី ហើយមើលពីលើអាកាសដើម្បីពិនិត្យឲ្យបានត្រឹមត្រូវជាមួយបង្គោលព្រំដែននីមួយៗ។ មិនតែប៉ុណ្ណោះ មានយន្តហោះ ឌ្រូន ក៏អាចជៀសវាងឧបសគ្គព្រៃភ្នំថែមទៀតផង។
លោកបណ្ឌិត សុខ ទូច ដែលពេលថ្មីៗនេះ ត្រូវមហាជនមួយចំនួន ជេរប្រមាថដល់ឪពុកម្តាយ ដោយសារតែលូកដៃស្រាវជ្រាវរឿងព្រំដែននោះ បានលើកឡើងដោយសម្តីទន់ភ្លន់ខុសធម្មតាថា លោកបានកាត់បន្ថយម៉ោងបង្រៀនផ្ទាល់ខ្លួន យកពេលទៅលូកដៃឲ្យកប់ជ្រៅរឿងព្រំដែន ដែលធ្វើឲ្យប្រាក់ចំណូលផ្ទាល់ខ្លួនរបស់លោកក៏ខើចណាស់ដែរ។ ចំណែកការត្មិះតិះដៀលលើរូបលោកកន្លងមក លោកបណ្ឌិតថា លំបាកនឹងទទួលយកណាស់ ហើយលោកត្រូវរកសម្ពាធផ្លូវចិត្តមែនទែន។ យ៉ាងណាក៏ដោយចុះ បណ្ឌិតរូបនេះ អះអាងថា នឹងខំខាំមាត់សង្កត់ចិត្ត ដើម្បីបុព្វហេតុប្រវត្តិសាស្ត្រខ្មែរ។
សូមជម្រាបថា ក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា មានគ្នា៨នាក់ គឺបណ្ដុំដោយក្រុមបណ្ឌិតនិងបេក្ខបណ្ឌិត ស្ថិតក្រោមការដឹកនាំដោយ លោកសាស្ត្រាចារ្យបណ្ឌិត សុខ ទូច។ លោកគឺជាប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ដែលគេតែងស្គាល់ថាជាអ្នកវិភាគនយោបាយ។ ក្រុមនេះបានប្រកាសបើកការស្រាវជ្រាវរឿងព្រំដែន តាំងពីថ្ងៃទី២២កក្កដា២០១៥រហូតមក។
ចំណែកសមិទ្ធផលវិញ ត្រូវលោក សុខ ទូច បញ្ជាក់ថា ក្រុមស្រាវជ្រាវព្រំដែននៃរាជបណ្ឌិត្យសភាកម្ពុជា បានសម្រេច២ដំណាក់កាលរួចហើយ គឺដំណាក់កាលប្រមូលឯកសារនិងផែនទីផ្សេងៗ ហើយទី២ គឺការសិក្សាពីសន្ធិសញ្ញាពាក់ព័ន្ធនានានិងកិច្ចព្រមព្រៀងផ្សេងៗទៀត។ កិច្ចការទាំងនេះសម្រេចរួចរាល់ហើយ ពោលគឺនៅតែជំហានទី៣ ដែលត្រូវចុះទៅប្រៀបធៀបនឹងភូមិសាស្ត្រផែនដីជាក់ស្តែងតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ