លោក សុខ ទូច ការពារយុទ្ធសាស្ត្រដោះស្រាយបញ្ហាព្រំដែនឡាវរបស់ លោក ហ៊ុន សែន
លោក សុខ ទូច ប្រធានរាជ្យបណ្ឌិត្យសភាកម្ពុជានៅថ្ងៃនេះ បានចេញមុខការពារយុទ្ធសាស្ត្ររបស់លោកនាយករដ្ឋមន្ត្រី ហ៊ុន សែន ក្នុងការដោះស្រាយបញ្ហាព្រំដែនជាមួយឡាវដែលទើបបិទបញ្ចប់កាលពីពេលថ្មីៗនេះគឺជារឿងត្រឹមត្រូវ។ លោកបានសង្កត់ធ្ងន់ដោយសំឡេងខ្លាំងថា នេះគឺជាការងារពិត មិនមែនប្រឌិតដើម្បីចំណេញសន្លឹកឆ្នោតដូចការរិះគន់ទេ។
ចុះផ្សាយនៅថ្ងៃ៖
ស្តាប់ - ០២:០៤
ការលើកឡើងរបស់លោក សុខ ទូច ធ្វើឡើងនៅក្នុងសន្និសីទកាសែតស្ដីពី ស្ថានភាពព្រំដែនកម្ពុជាចំណុចតំបន់អូអាឡៃ និងតំបន់អូរតាង៉ាវ ខេត្តស្ទឹងត្រែង ក្រោយឡាវដកទ័ពចេញ។ នៅក្នុងបទបង្ហាញជាងមួយម៉ោង លោក សុខ ទូច ប្រធានរាជ្យបណ្ឌិត្យសភាកម្ពុជាបានគូសបញ្ជាក់ថា កងទ័ពឡាវពិតជាបានឈរជើងនៅក្នុងទឹកដីកម្ពុជាមែន។ ហើយក៏មានដែរការដាំដុះអនុផលផ្សេងៗ ដែលនេះមិនមែនជាយុទ្ធសាស្ត្រសម្បនិម្មិតដូចក្រុមមួយចំនួនលើកឡើងនោះទេ។ នេះគឺជាការឆ្លើយតបរបស់លោក សុខ ទូច ទៅកាន់មតិមួយចំនួនបានចាត់ទុកយុទ្ធសាស្ត្រលោក ហ៊ុន សែន ដោះស្រាយបញ្ហាព្រំដែនដើម្បីចំណេញសន្លឹកឆ្នោត។
លោកនាយករដ្ឋមន្ត្រី ហ៊ុន សែន កាលពីថ្ងៃ ចន្ទ ដើមសប្ដាហ៍នេះដែរ ក៏ព្រមានជាមុនថា រដ្ឋាភិបាល នឹងចាប់ខ្លួនអ្នកអត្ថាធិប្បាយទាំងឡាយណា ដែលនិយាយចោទថា ព្រឹត្តការណ៍ឈ្លានពានបរទេសណាមួយ មកលើកម្ពុជា ដើម្បីសន្លឹកឆ្នោត ។
លោក សុខ ទូច ថា ចេតនារបស់ឡាវឈរជើង នៅលើទឹកដីកម្ពុជា ដើម្បីធ្វើពាណិជ្ជកម្មជាមួយវៀតណាម និង ចិន។ ឆ្លើយសំណួរហេតុអ្វីបានជាកម្ពុជាចល័តទ័ពច្រើនម្លេះ? លោក សុខ ទូច ថា ត្បិតតែឡាវដាក់កងទ័ពនៅលើទឹកដីកម្ពុជាមានចំនួនតែ៩២នាក់ក៏ដោយ តែនៅពីក្រោយចំនួននេះ ឡាវបានពង្រាយកងទ័ពជាច្រើនចាប់ពីបង្គោលលេខ៧៨រហូតទៅដល់ចំណុចប្រសព្វនៃការបែងចែកដែនដី រវាងខេត្តអាតាពឺរបស់ឡាវ និងស្ទឹងត្រែងរបស់កម្ពុជា។ លោក សុខ ទូច ថាគេមិនអាចមើលងាយសត្រូវថា ខ្សោយនោះទេ ទោះបីចំណុចខ្លះឡាវចាញ់ប្រៀបកម្ពុជាក៏ដោយ។
តែយ៉ាងណាក៏ដោយ កាលដែលឡាវព្រមដកទ័ពចេញពីកម្ពុជាគឺបានបង្ហាញពីភាពជោគជ័យរបស់កម្ពុជាទាំងផ្នែក ការទូត យុទ្ធសាស្រ្តនៃការដោះស្រាយ និង វិសាលភាពនៃការបង្ហាញកម្លាំងទ័ពរបស់កម្ពុជា។
និយាយពីបញ្ហាព្រំដែនទូទៅ លោក សុខ ទូច បានបញ្ជាក់ពីភាពស្អាតស្អំ របស់ លោកហ៊ុន សែន ថា មិនមែនជានាយករដ្ឋមន្រ្តី ក្នុងប្រវត្តិសាស្រ្ត កាត់ទឹកដីឲ្យប្រទេសណាមួយនោះទេ។ ដូច្នេះរាជបណ្ឌិត្យសភានឹងចងក្រងសៀវភៅ ស្តីពីបញ្ហាព្រំដែនកម្ពុជា-ឡាវ ប្រហែលជា១០០ទំព័រ ដើម្បីទុកឲ្យកូនចៅជំនាន់ក្រោយបានដឹង។ មួយផ្នែកទៀតចៀសវាងមិនឲ្យអ្នកនយោបាយ ធ្វើពាណិជ្ជកម្មលើបញ្ហាព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ