តើលោក កឹម សុខា អាចមានវាសនាធ្វើជាប្រធានបក្សសង្គ្រោះជាតិដែរឬទេ?
ដូចលោកអ្នកស្តាប់ជ្រាបស្រាប់! គឺមួយថ្ងៃក្រោយការប្រកាសលាលែងពីតំណែងរបស់លោក សម រង្ស៊ី, គណបក្សសង្គ្រោះជាតិ ពីម្សិលមិញ បានកោះប្រជុំគណៈកម្មាធិការនាយកជាបន្ទាន់ ហើយបានសម្រេចប្រគល់សិទ្ធិឲ្យលោក កឹម សុខា ធ្វើជាប្រធានស្តីទីដឹកនាំបក្ស រហូតដល់ពេលជ្រើសរើសប្រធានថ្មី។ ក៏ប៉ុន្តែ សួរថា តើលោក កឹម សុខា អាចនឹងមានវាសនាក្លាយជាប្រធានផ្លូវការរបស់បក្សប្រឆាំង ធំជាងគេនេះដែរឬទេ? ហើយតើនីតិវិធីជ្រើសតាំងប្រធានថ្មីរបស់បក្សប្រឆាំង ត្រូវធ្វើដូចម្តេច?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ការសម្រេចប្រគល់សិទ្ធិឲ្យលោក កឹម សុខា ដឹកនាំបក្សក្នុងនាមជាប្រធានស្តីទី គឺធ្វើជាបណ្តោះអាសន្ន ក្នុងរយៈពេលយ៉ាងយូរត្រឹម១៨ខែតែប៉ុណ្ណោះ គឺរាប់ចាប់ពីពេលនេះ រហូតដល់ថ្ងៃទី៧ខែមេសាឆ្នាំ២០១៨។ ពេលនោះហើយ ទើបមានការជ្រើសរើសប្រធានបក្សថ្មី ជាផ្លូវការ តាមរយៈសមាជសាមញ្ញ លើកទី២របស់បក្ស។
បើយោងតាមលក្ខន្តិកៈ និង បទបញ្ជាផ្ទៃក្នុងគណបក្សសង្គ្រោះជាតិ, ការជ្រើសតាំងប្រធានបក្ស គឺត្រូវអនុម័តដោយសំឡេងភាគច្រើនដាច់ខាត ៥០% + ១ នៅក្នុងអង្គប្រជុំសមាជ គណបក្ស។ បេក្ខជនឈ្មោះឈរនោះ ត្រូវមានបញ្ជីឈ្មោះអនុប្រធានរបស់ខ្លួន ហើយដែលត្រូវមានការគាំទ្រ សំឡេង ១/៣ ពីគណៈកម្មាធិការនាយករបស់បក្ស។
បើក្នុងករណីប្រធានបក្សលាលែង ឬប្រធានបាត់បង់សមត្ថភាពដឹកនាំគណបក្ស, គណៈកម្មាធិការនាយករបស់បក្ស ត្រូវជ្រើសរើសអនុប្រធានបក្សជាប្រធានស្តីទី គឺដូចអ្វីដែលបក្សបានធ្វើនៅថ្ងៃអាទិត្យកន្លងទៅនេះ។ ហើយចាប់ពីពេលនេះ រហូតដល់១ខែ យ៉ាងយូរ គណៈកម្មាធិការនាយក ដែលមានសមាជិក៦៩រូប ត្រូវសម្រេចជ្រើសរើសអនុប្រធានបក្សថ្មីម្នាក់ទៀត ដើម្បីទៅជួយកិច្ចការងារលោក កឹម សុខា។
ដូច្នេះ ក្នុងការបោះឆ្នោតជ្រើសតាំងប្រធានថ្មី នៅឆ្នាំ២០១៨ខាងមុននោះ គឺត្រូវធ្វើឡើងតាមវិធីលើកដៃ ដោយសំឡេងភាគច្រើនដាច់ខាត ៥០% + ១។ ក៏ប៉ុន្តែ ដូចបានបញ្ជាក់មុននេះស្រាប់ ដើម្បីឈរឈ្មោះជាប្រធានបក្សបាន បេក្ខជននោះ ត្រូវទទួលការគាំទ្រ យ៉ាងតិច១/៣ពីគណៈកម្មាធិការនាយករបស់បក្ស ជាមុនសិន។
ប្រសិនបើ ករណីដែលមានបេក្ខជនឈរឈ្មោះជាប្រធាន មានដល់ទៅ២បញ្ជី ឬលើសពី២បញ្ជី បានសេចក្តីថា បេក្ខជននោះ មានបញ្ជីឈ្មោះខ្លួនឯងជាប្រធាននិងមានឈ្មោះបុគ្គលម្នាក់ទៀតជាអនុប្រធានរបស់ខ្លួន ហើយមានបញ្ជីឈ្មោះផ្សេងទៀត ដែលឈរឈ្មោះនិងអនុប្រធានរបស់ខ្លួនដែរ, នីតិវិធីជ្រើសរើសប្រធាននឹងត្រូវផ្លាស់ប្តូរ ដោយតម្រូវឲ្យមានការបោះឆ្នោតជាសម្ងាត់វិញ។
យ៉ាងណាក៏ដោយចុះ អនុប្រធានគណៈកម្មាធិការនាយរបស់បក្សសង្គ្រោះជាតិ លោក អេង ឆៃអ៊ាង បានពន្យល់បន្ថែមថា បើយោងតាមស្មារតីនៃសមាជបក្សលើកទី១ រួមទាំងក្នុងលក្ខន្តិកៈ, នៅក្នុងសមាជបក្សលើកទី២ គឺគ្មានចែងពីកូតាបេក្ខជនប្រធានបក្ស ថាត្រូវមកពីគណបក្សសិទ្ធិមនុស្ស ឬបក្ស សម រង្ស៊ី នោះឡើយទេ។ បើតាមលោក អេង ឆៃអ៊ាង ដដែល, បក្សទាំងពីរបានច្របាច់ចូលគ្នាតែមួយរួចហើយ ហេតុនេះ គ្មានត្រូវបែងចែងកូតាអ្វីទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ