ប្រតិកម្មបានធ្លាក់មក ក្រោយពីក្រសួងមហាផ្ទៃដាក់ពាក្យបណ្តឹងរំលាយគណបក្សសង្គ្រោះជាតិ
ក្រសួងមហាផ្ទៃបានដាក់ពាក្យបណ្តឹងទៅកាន់តុលាការកំពូលនៅថ្ងៃទី ០៦តុលានេះ ដើម្បីស្នើសុំរំលាយគណបក្សសង្គ្រោះជាតិតាមបណ្តឹងរបស់គណបក្សនយោបាយចំនួនពីរ។ ប៉ុន្តែភ្លាមៗនេះ ប្រតិកម្មបានធ្លាក់មក ទាំងប្រតិកម្មគាំទ្រ និងប្រតិកម្មប្រឆាំង ចំពោះចំណាត់ការរបស់ក្រសួងមហាផ្ទៃនៅពេលនេះ។
ចុះផ្សាយនៅថ្ងៃ៖
ស្តាប់ - ០២:០៧
ជាបឋម គឺប្រតិកម្មគាំទ្របានធ្លាក់មកពីគណបក្សខ្មែររួបរួមជាតិ។ តាមរយៈសេចក្តីថ្លែងការណ៍ នៅថ្ងៃនេះ គណបក្សអំណាចខ្មែរដែលមានលោក ញឹក ប៊ុនឆៃ ជាអតីតប្រធានដែលកំពុងជាប់ពន្ធនាគារនេះ បានគាំទ្រចំណាត់ការរបស់រដ្ឋាភិបាលកម្ពុជាការចាត់វិធានការដ៏ត្រឹមត្រូវក្នុងការចាប់ខ្លួនលោក កឹម សុខា គណបក្សសង្គ្រោះជាតិ។ តាមរយៈសេចក្តីថ្លែងការណ៍ចុះថ្ងៃទី ០៦ តុលា គណបក្សខ្មែររួបរួមជាតិ មិនបានលើកឡើងពីបណ្តឹងឲ្យរំលាយគណបក្សសង្គ្រោះជាតិទេ តែបានចាត់ទុកថា ទង្វើរបស់លោក កឹម សុខា ដែលត្រូវបានរដ្ឋាភិបាលចាប់ខ្លួននោះ ដោយសារតែបានប្រព្រឹត្តអំពើផ្ទុយពីច្បាប់ ដូចមានចែងនៅក្នុងមាត្រា ៦ថ្មី (ពីរ) មាត្រា ៧ និងមាត្រា ៤៤ថ្មី (ពីរ) នៃច្បាប់ស្តីពីគណបក្សនយោបាយ និងច្បាប់ស្តីពីវិសោធនកម្មច្បាប់គណបក្សនយោបាយនោះ គឺជាវិធានការដ៏ត្រឹមត្រូវរបស់រាជរដ្ឋាភិបាលកម្ពុជា។
គួរជំរាបជូនថា គណបក្សខ្មែររួបរួមជាតិ គឺជាគណបក្សទី៣ហើយ ដែលបានគាំទ្រចំណាត់ការរបស់រដ្ឋាភិបាលលើប្រធានគណបក្សប្រឆាំង បន្ទាប់ពីគណបក្សហ្វ៊ុនស៊ិនប៉ិចរបស់ព្រះអង្គម្ចាស់ នរោត្តម រណឬទ្ធិ និងគណបក្សយុវជនកម្ពុជា របស់លោក ពេជ្រ ស្រស់។ គណបក្សហ្វ៊ុនស៊ិនប៉ិច និងគណបក្សយុវជនកម្ពុជា ដែលបានដាក់ពាក្យបណ្តឹងទៅកាន់ក្រសួងមហាផ្ទៃកាលពីថ្ងៃទី ០៥ តុលា ដើម្បីសុំឲ្យរំលាយគណបក្សសង្គ្រោះជាតិ។ ពាក្យបណ្តឹងសមដូចបំណង នៅល្ងាចថ្ងៃទី ០៦ តុលានេះ ក្រសួងមហាផ្ទៃ ទើបតែបានដាក់ពាក្យនេះ ទៅកាន់តុលាការកំពូលដើម្បីប្តឹងឲ្យរំលាយគណបក្សសង្គ្រោះជាតិរបស់លោក កឹម សុខា ដោយផ្អែកតាមពាក្យបណ្តឹងរបស់គណបក្សនយោបាយទាំងពីរ។
យ៉ាងណាក៏ដោយ ប្រតិកម្មប្រឆាំងក៏មានដែរ ដែលធ្លាក់មកពីអង្គការក្រៅរដ្ឋាភិបាល Global Witness ។ អង្គការ Global Witness ដែលមានមូលដ្ឋាននៅប្រទេសអង់គ្លេសបានអំពាវនាវឲ្យសហគមន៍អន្តរជាតិ ចូលរួមដោះស្រាយបញ្ហារបស់កម្ពុជាជាបន្ទាន់ ដោយមិនអាចឈររងចាំមើលសភាពការណ៍ពីក្រោយតទៅទៀតនោះទេ។ បន្ថែមលើនេះ Global Witness បានអំពាវនាវឲ្យប្រទេសម្ចាស់ជំនួយ និងដៃគូរពានិជ្ជកម្ម ដែលមានទឹកមាត់ប្រៃចូលអន្តរាគមន៍ជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ