គជប បង្ហាញបញ្ជីឈ្មោះតំណាងរាស្ត្រថ្មី១១រូប ដែលសេសសល់ពីការបែងចែកជុំទី១
គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី២៨ ខែវិច្ឆិកា ម្សិលមិញនេះ បានបង្ហាញបញ្ជីឈ្មោះតំណាងរាស្ត្រថ្មី១១រូប បន្ថែមលើ៤៤រូប ដើម្បីបំពេញកៅអីសភាដែលនៅទំនេរ ក្រោយពីការរំលាយគណបក្សសង្គ្រោះជាតិ។ ១១អាសនៈចុងក្រោយនេះ គឺបានទៅលើគណបក្សប្រជាជនកម្ពុជាទាំងអស់ បន្ទាប់ពីគណបក្សនយោបាយចំនួនពីរបានបដិសេធ។
ចុះផ្សាយនៅថ្ងៃ៖
ស្តាប់ - ០២:១៣
លោក ឡុង ប៊ុន្នី អតីតតំណាងរាស្ត្រគណបក្សសង្គ្រោះជាតិមណ្ឌលខេត្តព្រៃវែង បានស្ថិតនៅក្នុងបញ្ជីឈ្មោះបេក្ខជនតំណាងរាស្ត្រថ្មីទាំង១១រូប កូតាមកពីគណបក្សប្រជាជនកម្ពុជា។ លោក ឡុង ប៊ុន្នី ដែលបានចាកចេញពីគណបក្សសង្គ្រោះជាតិ កាលពីខែតុលា នឹងទៅកាន់តួនាទីជាតំណាងរាស្ត្រមណ្ឌលខេត្តព្រៃវែងវិញ បន្ទាប់ពីការបែងចែករបស់គណៈកម្មាធិការជាតិរៀបចំការបោះឆ្នោត គជប នៅជុំទី០២ កាលពីថ្ងៃទី ២៧ វិច្ឆិកា។ ចំណែកអតីតតំណាងរាស្ត្រគណបក្សសង្គ្រោះជាតិម្នាក់ទៀត គឺលោក វ៉ាន សំអឿន ដែលបានចាកចេញពីគណបក្សសង្គ្រោះជាតិកាលពីឆ្នាំ ២០១៥ ក៏នឹងទៅកាន់តួនាទីជាតំណាងរាស្ត្រគណបក្សប្រជាជនកម្ពុជានៅមណ្ឌលខេត្តកណ្តាលផងដែរ បន្ទាប់ពីអតីតតំណាងរាស្ត្រគណបក្សសង្គ្រោះជាតិមណ្ឌលខេត្តកំពតរូបនេះ បានទៅចុះចូលជាមួយគណបក្សកាន់អំណាច។ នេះបើយោងតាមសេចក្តីសម្រេចរបស់គណៈកម្មាធិការជាតិរៀបចំការបោះឆ្នោត គ.ជ.ប កាលពីថ្ងៃទី ២៨ វិច្ឆិកា។
បើផ្អែកតាមបញ្ជីឈ្មោះនេះ តំណាងរាស្ត្រថ្មី៩រូបផ្សេងទៀតរបស់គណបក្សប្រជាជនកម្ពុជា ដែលសេសសល់ពីការបែងចែកជុំទី១ ក្រោយពីគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ បានបោះបង់ចោលនោះ រួមមាន លោក សៀង ស៊ុតថង គឺជាបេក្ខជនតំណាងរាស្ត្រមណ្ឌលបាត់ដំបង, លោក អ៊ី សំអុល លោក ម៉ា ឈឿន និងលោកស្រី ខុន ស៊ុនអេង ជាតំណាងរាស្ត្រមណ្ឌលខេត្តកំពង់ចាម, លោក គោស៊ុំ សារឿត អតីតអភិបាលខេត្តបន្ទាយមានជ័យ គឺជាតំណាងរាស្ត្រមណ្ឌលខេត្តកណ្តាល, លោក ជៀប ស៊ីវន លោក ពេជ្រ គឹមស្រ៊ាង និងលោក លី ឆេង ជាតំណាងរាស្ត្រមណ្ឌលភ្នំពេញ និងចុងក្រោយ គឺលោក ម៉ុម ស៊ីបុន ជាតំណាងរាស្ត្រមណ្ឌលព្រៃវែង។ បេក្ខជនតំណាងរាស្ត្រទាំង១១រូប នឹងត្រូវទៅទទួលការប្រកាសសុពលភាពពីរដ្ឋសភានៅពេលឆាប់ៗខាងមុខនេះ។ នេះបើតាមការបញ្ជាក់ពីលោក ឡេង ប៉េងឡុង អ្នកនាំពាក្យរដ្ឋសភា។ បើតាមអ្នកនាំពាក្យរូបនេះ នីតិវិធីនៃសមាជិកសភាថ្មីទាំង១១រូប នឹងអនុវត្តដូចតំណាងរាស្ត្រថ្មីទាំង៤៤រូប ដែលទើបតែបានស្បថចូលកាន់តំណែងថ្មី កាលពីថ្ងៃទី ២៨ វិច្ឆិកា ក្រោមការរិះគន់ជាខ្លាំង។
សូមបញ្ជាក់ថា ផ្អែកតាមការបែងចែកអាសនៈនេះ អាសនៈសភារបស់គណបក្សកាន់អំណាចនីតិកាលទី៥ នឹងកើនឡើងពី ៦៨ អាសនៈ នៅឆ្នាំ២០១៣ ដល់ ៧៩ អាសនៈ នៅឆ្នាំ២០១៧ បន្ទាប់ពីគណបក្សគណបក្សសង្គ្រោះជាតិត្រូវបានរំលាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ