តំណាងរាស្ត្រថ្មីទាំង៤៤រូបស្បថចូលកាន់តំណែងថ្ងៃនេះ ខណៈអង្គការមួយប្រកាសមិនទទួលស្គាល់
តំណាងរាស្ត្រថ្មី ដែលមិនជាប់ឆ្នោតពីប្រជារាស្ត្រ ទាំង ៤៤រូប មកពីគណបក្សនយោបាយ ចំនួន០៣ បានស្បថចូលកាន់តំណែង នៅរសៀលថ្ងៃទី ២៨ វិច្ឆិកានេះ ដើម្បីបំពេញនីតិវិធីជាអ្នកតំណាងរាស្ត្រថ្មី ជំនួសកៅអីរបស់អតីតតំណាងរាស្ត្រគណបក្សសង្គ្រោះជាតិ ដែលត្រូវបានរំលាយ។ ពិធីសច្ចាប្រណិធាន បានធ្វើឡើងនៅក្នុងព្រះបរមរាជវាំង តែមិនមានព្រះរាជវត្តមានរបស់អង្គព្រះមហាក្សត្រកម្ពុជាចូលរួមនោះទេ។ ប៉ុន្តែទន្ទឹមជាមួយគ្នានេះ មតិរិះគន់ក៏មានផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ដូចតាមការគ្រោងទុក សមាជិកសភាថ្មីទាំង៤៤រូប នាំមុខដោយសម្តេចក្រុមព្រះ នរោត្តម រណឬទ្ធិ បានចូលទៅធ្វើពិធីសច្ចាប្រណិធាន នៅក្នុងព្រះបរមរាជវាំង នៅរសៀលថ្ងៃទី ២៨ វិច្ឆិកានេះ បន្ទាប់ពីទទួលបានការប្រកាសសុពលភាពពីរដ្ឋសភាជាតិរួចមក។ នៅក្នុងពាក្យសម្បថ ដែលត្រូវបានផ្សព្វផ្សាយនៅថ្ងៃនេះ ក្រុមអ្នកតំណាងរាស្ត្រថ្មីទាំង៤៤រូប ៤១រូបមកពីគណបក្សហ្វ៊ុនស៊ិនប៉ិច ២រូបមកពីគណបក្សសញ្ជាតិកម្ពុជា និង១រូបទៀតមកពីគណបក្សខ្មែរអភិវឌ្ឍសេដ្ឋកិច្ច បានសន្យាថា នឹងស្មោះត្រង់នៅក្នុងមុខតំណែងរបស់ខ្លួន ក្នុងពេលប្រតិបត្តិការ ឬក្នុងការបំពេញបេសកកម្មដែលប្រជារាស្ត្រកម្ពុជាបានប្រគល់ជូននេះ។ ក្នុងនោះ សមាជិករដ្ឋសភាថ្មីក៏បានប្តេជ្ញាគោរពរដ្ឋធម្មនុញ្ញ បម្រើផលប្រយោជន៍របស់ប្រជារាស្ត្រ និងមាតុភូមិកម្ពុជា ដោយមិនកេងប្រវ័ញ្ចនូវផលប្រយោជន៍ជាតិឡើយ។
សូមបញ្ជាក់ថា បន្ទាប់ពីធ្វើពិធីសច្ចាប្រណិធាននៅថ្ងៃនេះហើយ តំណាងរាស្ត្រថ្មីទាំង៤៤រូប នឹងក្លាយជាសមាជិកសភា ស្របតាមច្បាប់ថ្មី ដើម្បីបំពេញតួនាទីនៅតាមមណ្ឌលរៀងៗខ្លួន។ប៉ុន្តែ យ៉ាងណាក៏ដោយ ការយកអាសនៈរបស់គណបក្សប្រឆាំង ទៅបែងចែកឲ្យគណបក្សនយោបាយផ្សេងនេះ កំពុងទទួលរងនូវការរិះគន់និងវាយប្រហារពីសំណាក់ប្រជាពលរដ្ឋ និងអង្គការក្រៅរដ្ឋាភិបាលមួយដែលមានមូលដ្ឋាននៅក្រៅប្រទេស។ តាមរយៈសេចក្តីថ្លែងការណ៍មួយ ក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅទីក្រុងគ្រីស្ទានសាន់ ប្រទេសន័រវេស៍ បានប្រកាសនៅថ្ងៃទី ២៨ វិច្ឆិកា ថា មិនទទួលស្គាល់សមាជិកសភាថ្មីនេះឡើយ។ សេចក្តីថ្លែងការណ៍បានចាត់ទុកថា ការរិបអូសអាសនៈស្របច្បាប់ ពីគណបក្សសង្គ្រោះជាតិ ទៅឲ្យគណបក្សនយោបាយផ្សេងបែបនេះ គឺជាការអនុវត្តផ្ទុយពីរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ខណៈដែលប្រជាពលរដ្ឋកម្ពុជាមួយចំនួន ក៏បានចោទជាសំណួរថា តើគួរហៅតំណាងរាស្ត្រថ្មីទាំងនេះថា ជាតំណាងរាស្ត្រដែរឬយ៉ាងណា?
គួរជំរាបជូនថា នេះគឺជាការបំពេញនិតិវិធីដើម្បីក្លាយជាតំណាងរាស្ត្រថ្មីទាំង៤៤រូបនេះ នឹងទៅជំនួសកៅអីរបស់អតីតតំណាងរាស្ត្រគណបក្សសង្គ្រោះជាតិដែលនៅទំនេរចំនួន ៥៥ បន្ទាប់ពីតុលាការកំពូលបានប្រកាសរំលាយ កាលពីថ្ងៃទី ១៦ វិច្ឆិកា កន្លងទៅ។ ដោយឡែក អាសនៈដែលនៅសេសសល់ចំនួន១១ ពីការបែងចែកជុំទី១នេះ នឹងត្រូវ គ.ជ.ប យកទៅបែងចែកឲ្យគណបក្សប្រជាជនកម្ពុជា ក្រោយពីគណបក្សនយោបាយចំនួន២ គឺគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ បានប្រកាសមិនទទួលយក។ ការណ៍នេះ នឹងធ្វើឲ្យចំនួនអាសនៈរបស់គណបក្សកាន់អំណាចកើនឡើងពី៦៨អាសនៈនៅឆ្នាំ២០១៣ ដល់ ៧៩ អាសនៈនៅឆ្នាំ ២០១៧នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ