កម្ពុជាអបអរសាទរខួប៣ឆ្នាំនៃការដាក់បញ្ចូលចាប៉ីដងវែងក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ
ថ្ងៃទី ៣០ វិច្ឆិកា ២០១៦ - ៣០ វិច្ឆិកា ឆ្នាំ២០១៩នេះ គឺជាខួប៣ឆ្នាំគត់នៃការដាក់បញ្ចូលចាប៉ីដងវែងរបស់កម្ពុជា ទៅក្នុងបញ្ជីបេតិកភណ្ឌវប្បធម៌អរូបីនៃអង្គការយូណេស្កូ នៅទីក្រុងអាឌីស អាបាបា ប្រទេសអេត្យូពី។ នៅថ្ងៃនេះ ប្រមុខរដ្ឋាភិបាលកម្ពុជាលោក ហ៊ុន សែន បានចេញសារមួយដើម្បីអបអរសាទរ និងអរគុណដល់ព្រឹទ្ធាចារ្យសិល្បករចាប៉ីដងវែងទាំងអស់ ដែលបានចូលរួមថែរក្សានូវសិល្បៈមួយនេះអោយបានគង់វង្ស។ ដោយឡែក កាលពីរាត្រី ថ្ងៃទី ២៩ វិច្ឆិកាម្សិលមិញនេះ សិល្បករចាប៉ីដងវែង៣ជំនាន់សរុប៤៤រូប ក៏បានរួមគ្នាសម្ដែងចាប៉ីដងវែង នៅក្នុងមហោស្រពចាប៉ីដងវែងលើកទី៣ ដែលធ្វើឡើងនៅឯមជ្ឈមណ្ឌលសហប្រតិបត្តិការកម្ពុជា-ជប៉ុន។ វ៉ា សំណព្វ ជូនព័ត៌មាននេះ៖
ចុះផ្សាយនៅថ្ងៃ៖
ស្តាប់ - ០៣:២១
ចាប៉ីដងវែង គឺជាឧបករណ៍តន្ត្រីវ័យចំណាស់មួយរបស់កម្ពុជា និងដែលមានឆ្លាក់នៅជញ្ជាំងប្រាសាទអង្គរវត្តផងដែរ។ ចាប៉ី អាចលេងបានមានអមជាមួយបទចម្រៀង ព្រមទាំងអាចច្នៃប្រឌិត និងបង្កើតបទថ្មីៗ ដោយខ្លួនឯងទៀតផង។ បទចម្រៀងចាប៉ីជាទូទៅរៀបរាប់អំពីរឿងបុរាណ ឬរឿងអប់រំខ្លីៗដល់ប្រជាជនពីគុណធម៌ និងវប្បធម៌ជាដើម។ នេះគឺជាសាររបស់លោកនាយករដ្ឋមន្ត្រី ហ៊ុន សែន ដើម្បីអបអរសាទរខួប៣ឆ្នាំនៃការដាក់បញ្ចូលចាប៉ីដងវែង ទៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ ដែលបន្ថែមដោយការថ្លែងអំណគុណដល់ក្រសួងវប្បធម៌និងចាស់ព្រឹទ្ធាចារ្យសិល្បករចាប៉ីដងវែងទាំងឡាយ ដែលបានចូលរួមក្នុងការថែរក្សា នូវសិល្បៈមួយនេះអោយបានគង់វង្ស។ ប៉ុន្តែនេះ មិនទាន់គ្រប់គ្រាន់នោះទេ តាមរយៈសំណេរលើបណ្តាញទំនាក់ទំនងសង្គមហ្វេសបុក លោកនាយករដ្ឋមន្ត្រី ហ៊ុន សែន នៅថ្ងៃទី ៣០ វិច្ឆិកានេះ ក៏បានអំពាវនាវឲ្យជនរួមជាតិរបស់លោក បន្តជួយថែរក្សាសម្បត្តិបេតិកភណ្ឌវប្បធម៌ជាតិរបស់កម្ពុជា ឱ្យនៅគង់វង្សជាបន្តបន្ទាប់ទៀត។
គួរជំរាបជូនថា ចាប៉ីដងវែងរបស់កម្ពុជា ត្រូវបានអង្គការយូណេស្កូចុះបញ្ជីជាបេតិកភណ្ឌវប្បធម៌អរូបីនៃមនុស្សជាតិ កាលពីថ្ងៃទី ៣០ ខែវិច្ឆិកា ឆ្នាំ២០១៦ នៅទីក្រុង អាឌីស អាបាបា ប្រទេសអេត្យូពី ដែលស្ថិតនៅក្នុងបញ្ជីបេតិកភណ្ឌអរូបី ត្រូវការការសង្គ្រោះបន្ទាន់។ គណៈកម្មាធិការអភិរក្សបេតិកភណ្ឌវប្បធម៌អរូបីនៃអង្គការយូណេស្កូ ក៏បានអនុម័តលើការស្នើសុំជំនួយហិរញ្ញវត្ថុចំនួន២៣ម៉ឺនដុល្លាររបស់កម្ពុជា សម្រាប់ការអភិរក្សចាប៉ីដងវែងនេះផងដែរ។
ដោយឡែកនៅក្នុងមហោស្រពចាប៉ីដងវែងលើកទី០៣ ដែលបានប្រារព្ធធ្វើឡើងកាលពីរាត្រីថ្ងៃទី ២៩ វិច្ឆិកា ដែលធ្វើឡើងនៅឯមជ្ឈមណ្ឌលសហប្រតិបត្តិការកម្ពុជា-ជប៉ុន ដើម្បីអបអរសាទរការចុះបញ្ជីចាប៉ីដងវែងជាសម្បត្តិបេតិកភណ្ឌវប្បធម៌អរូបីនៃអង្គការយូនេស្កូនេះ សិល្បករចាប៉ីដងវែង ដែលមួយចំនួនមានវ័យជាង៨០ប្លាយឆ្នាំទៅហើយនោះ ក៏បានអំពាវនាវឲ្យមានការជួយថែរក្សានិងបន្តវេនពីពួកគាត់ផងដែរ។ ទន្ទឹមគ្នានេះ លោក ពេជ សារ៉ាត់ ប្រធានសមាគមចាប៉ីអមតៈ បានថ្លែងថា មហោស្រពចាប៉ីដងវែងនេះ ធ្វើឡើងក្នុងគោលបំណងឲ្យព្រឹទ្ធាចារ្យចាប៉ីដងវែង បានជួបជុំជាមួយយុវជននិងកុមារ ដែលជាសិល្បករចាប៉ីវ័យក្មេង និងដើម្បីរកវិធីសាស្ត្រយ៉ាងណា ធ្វើឲ្យសិល្បៈចាប៉ីដងវែងកម្ពុជាមាននិរន្តរភាព។ ម្យ៉ាងវិញទៀត ព្រឹត្តិការណ៍នេះ ក៏ជាឱកាសមួយក្នុងការជំរុញការផ្សព្វផ្សាយពីទម្រង់សិល្បៈចាប៉ីដងវែង ដែលបានចុះក្នុងបញ្ជីសម្បត្តិបេតិកភណ្ឌអរូបីរបស់អង្គការយូណេស្កូ ទៅកាន់មហាជនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ