លោក ហ៊ុន សែន ភ្ជាប់ថ្ងៃបង្កើតមូលនិធិស៊ីក្លូ ក្នុងខែមករាទៅនឹងខួប៣៣ឆ្នាំនៃការឡើងកាន់អំណាចរបស់លោក
លោកនាយករដ្ឋមន្ត្រី ហ៊ុន សែន នៅថ្ងៃសៅរិ៍ទី១៣មករានេះ បានរំលឹកឡើងវិញថា ខែមករា គឺជាខែដែលមានន័យជាប្រវត្តិសាស្ត្ររបស់ប្រជាពលរដ្ឋកម្ពុជា និងសម្រាប់លោកនឹងក្រុមគ្រួសារ ហើយថានៅថ្ងៃទី ១៤ មករា គឺជាខួប៣៣ឆ្នាំ ដែលលោកបានក្លាយជានាយករដ្ឋមន្ត្រីក្មេងជាងគេ និងយូជាងគេនៅលើពិភពលោក។ លោកនាយករដ្ឋមន្ត្រីធ្លាប់បានអះអាងថា លោកនឹងបន្តធ្វើនាយករដ្ឋមន្ត្រីកម្ពុជាយ៉ាងហោច២អាណត្តិបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៨
លោកនាយករដ្ឋមន្ត្រី ហ៊ុន សែន នៅថ្ងៃទី ១៣ មករានេះ បានភ្ជាប់ថ្ងៃបង្កើតមូលនិធិស៊ីក្លូ ឬឈ្មោះជាផ្លូវការ “មូលនិធិត្រីចក្រយាន” នៅឯមជ្ឈមណ្ឌលកោះពេជ្រថា មិនមែនជារឿងចៃដន្យនោះទេ។ បើតាមប្រមុខរដ្ឋាភិបាលកម្ពុជា លោក ហ៊ុន សែន ខែមករា គឺជាខែនៃទិវាជ័យជំនះ ៧ មករា ខួបលើកទី៣៩, ខែមករា គឺជាខួបលើកទី៤២ឆ្នាំនៃអាពាហ៍ពិពាហ៍ឥតភ្លេងរបស់លោក ខែមករា គឺជាខួប៣៩ឆ្នាំ នៃការឡើងក្លាយជារដ្ឋមន្ត្រីការបរទេសក្មេងជាងគេនៅកម្ពុជា និងក៏ជាខែនៃការឡើងកាន់អំណាចរបស់លោកខួបលើកទី៣៣ឆ្នាំ ក្នុងនាមជានាយករដ្ឋមន្ត្រីកម្ពុជា។
គួរជំរាបជូនថា លោក ហ៊ុន សែន ត្រូវបានមហាសន្និបាតគណបក្សប្រជាជនកម្ពុជាលើកទី ០៥ បានតែងតាំងជានាយករដ្ឋមន្ត្រីកម្ពុជា នៅថ្ងៃទី ១៤ មករា ឆ្នាំ ១៩៨៥ បន្ទាប់ពីលោក ចាន់ ស៊ី ដែលជានាយករដ្ឋមន្ត្រីបានទទួលមរណភាព។ លោកនាយករដ្ឋមន្ត្រី ហ៊ុន សែន ដែលកំពុងសំឡឹងទៅរកការដឹកនាំប្រទេសកម្ពុជាយ៉ាងតិចពីរអាណត្តិ ឬ ស្មើនឹង១០ឆ្នាំខាងមុខទៀតនោះ បានលើកឡើងថា គិតត្រឹមថ្ងៃទី ១៤ មករា ឆ្នាំ២០១៨នេះ គឺជាខួបលើកទី ៣៣ ឆ្នាំ ដែលលោកបានក្លាយជានាយករដ្ឋមន្ត្រីក្មេងជាងគេនិងយូជាងគេនៅលើពិភពលោក។
សូមបញ្ជាក់ថា ការលើកឡើងរបស់លោកនាយករដ្ឋមន្ត្រី ហ៊ុន សែន បានធ្វើឡើងនៅក្នុងពេលដែលលោកបានប្រកាសបង្កើតមូលនិធិស៊ីក្លូជាលើកដំបូងនៅកម្ពុជា ដើម្បីជួយទ្រទ្រង់និងអភិរក្សស៊ីក្លូនៅកម្ពុជា។ ក្នុងនាមជាប្រធានមូលនិធិនេះ លោក ហ៊ុន សែន បានទម្លាក់ថវិការផ្ទាល់ខ្លួនប្រមាណជា៥០០លានរៀលទៅក្នុងមូលនិធិ ដែលគ្រប់គ្រងដោយអភិបាលរាជធានីភ្នំពេញ និងប្រកាសឧបត្ថម្ភបន្ថែមក្នុងមួយឆ្នាំៗ ចំនួន២៤ម៉ឺនដុល្លាសហរដ្ឋអាមេរិក។ នៅក្នុងវេទិការជួបជុំនិងប្រកាសដាក់ឲ្យដំណើរការមូលនិធិជួយទ្រទ្រង់ដល់អ្នកប្រកបមុខរបរធាក់ស៊ីក្លូដែលភាគច្រើនគឺជាអ្នកក្រីក្រនឹងមានវ័យចំណាស់ៗនេះដែរ លោកនាយករដ្ឋមន្ត្រី ហ៊ុន សែន ក៏បានថ្លែងរិះគន់ទៅលើអ្នកវាយប្រហារមកលើរូបលោក នឹងក្រុមមន្ត្រីរបស់លោក ចំពោះការផ្តួចផ្តើមបង្កើតមូលនិធិនេះ និងបានស្វាគមន៍ចំពោះអ្នកដែលចង់ប្រជែងជាមួយរូបលោកក្នុងការបង្កើតមូលនិធិជួយដល់អ្នកធាក់ស៊ីក្លូនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ