កម្ពុជា កំពុងពិចារណាទិញឧទ្ធម្ភាគចក្រប្រភេទថ្មី២គ្រឿង ពីប្រទេសរុស្ស៊ី
កម្ពុជាកំពុងពិចារណាទិញឧទ្ធម្ភាគចក្រប្រភេទថ្មី ទំនើប២គ្រឿង ពីប្រទេសរុស្ស៊ី បន្ទាប់ពីឧទ្ធម្ភាគចក្រទាំងពីរគ្រឿងម៉ាក់ Mi 171 A2 និង ម៉ាក់ ANSAT នេះ បានដាក់ឲ្យហោះហើរសាកល្បង នៅព្រឹកថ្ងៃទី ២០ វិច្ឆិកា នេះ។ នៅក្នុងពិធីបង្ហាញ ដែលធ្វើឡើងនៅឯមូលដ្ឋានទ័ពអាកាសក្នុងទីក្រុងភ្នំពេញ លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា សង្ឃឹមថា កម្ពុជានឹងអាចប្រើប្រាស់ឧទ្ធម្ភាគចក្រទាំងពីរគ្រឿងនេះ នៅថ្ងៃអនាគត។
ចុះផ្សាយនៅថ្ងៃ៖
ស្តាប់ - ០២:១៩
អ្នកនាំពាក្យក្រសួងការពារជាតិកម្ពុជា លោកឧត្តមសេនីយ៍ ឈុំ សុជាតិ បានអះអាងថា កម្ពុជាមិនបដិសេធក្នុងការទិញឧទ្ធម្ភាគចក្រទាំងពីរគ្រឿងពីប្រទេសរុស្ស៊ីនោះទេ។ ការអះអាងនេះ បន្ទាប់ពីក្រុមហ៊ុនរបស់រុស្ស៊ី បានដាក់បង្ហាញនិងឲ្យហោះហើរសាកល្បងនូវឧទ្ធម្ភាគចក្រទាំងពីរគ្រឿង មួយគ្រឿង ម៉ាក់ Mi 171 A2 និង ម៉ាក់ ANSAT នៅព្រឹក ថ្ងៃទី ២០ វិច្ឆិកា នេះ។
ឧទ្ធម្ភាគចក្រទាំងពីរគ្រឿងដែលផលិតដោយក្រុមហ៊ុន RUSSIAN HELICOPTER បានមកដល់ប្រទេសកម្ពុជា កាលពីថ្ងៃទី ១៩ វិច្ឆិកា និងបានដាក់ឲ្យហោះហើរសាកល្បង នៅព្រឹកថ្ងៃទី ២០ វិច្ឆិកា។ ពិធីបង្ហាញនេះ បានធ្វើឡើងនៅឯមូលដ្ឋានកងទ័ពអាកាសពោធិ៍ចិនតុងក្នុងទីក្រុងភ្នំពេញ ដោយមានការចូលរួមពីលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា និងឯកអគ្គរដ្ឋទូតរុស្ស៊ីប្រចាំនៅកម្ពុជា លោក Dmitry Tsvetkov ផង។ បន្ទាប់ពីបានដាក់បង្ហាញរួច លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា បានបង្ហាញការចាប់អារម្មណ៍ខ្លាំងលើគុណភាព សមត្ថភាព និងបច្ចេកវិទ្យាថ្មីចុងក្រោយនៃឧទ្ធម្ភាគចក្រទាំងពីរគ្រឿង។ លោករដ្ឋមន្ត្រីសង្ឃឹមថា កម្ពុជានឹងអាចប្រើប្រាស់ឧទ្ធម្ភាគចក្រទាំងពីរគ្រឿងនេះនៅថ្ងៃអនាគតដ៏ខ្លីខាងមុខ។ យ៉ាងណាក៏ដោយ អ្នកនាំពាក្យក្រសួងការពារជាតិបានអះអាងថា កម្ពុជាកំពុងពិចារណានៅឡើយ លើលទ្ធភាពក្នុងការទិញឧទ្ធម្ភាគចក្រទាំងពីរគ្រឿងនេះ បើរដ្ឋាភិបាលឯកភាព។ លោកឧត្តមសេនីយ៍ ឈុំ សុជាតិ បានគូសបញ្ជាក់ថា ភាពរីកចំរើននៃកងទ័ពកម្ពុជា គឺចាំបាច់ត្រូវការសម្ភារៈ និងមធ្យោបាយដឹកជញ្ជូន ពិសេស គឺការប្រើប្រាស់ឧទ្ធម្ភាគចក្រ សម្រាប់ការហ្វឹកហាត់ និងការជួយសង្គ្រោះប្រជាពលរដ្ឋក្នុងគ្រោះមហន្តរាយធម្មជាតិជាដើម។
ឧទ្ធម្ភាគចក្រ Mi-171 A2 គឺជាប្រភេទឧទ្ធម្ភាគចក្រដែលពេញនិយមប្រើប្រាស់នៅ៨០ប្រទេសនៅលើពិភពលោក ដែលមានល្បឿន២៨០គីឡូម៉ែត្រក្នុង១ម៉ោង ខណៈដែលឧទ្ធម្ភាគចក្រធម្មតា អាចហោះហើរក្នុងល្បឿន ២០០ គីឡូម៉ែត្រក្នុង១ម៉ោង។ មិនតែប៉ុណ្ណោះ ឧទ្ធម្ភាគចក្រ Mi-171A2 នេះ អាចហោះនៅលើអាកាសបានរយៈពេល៤ម៉ោង និងអាចផ្ទុកមនុស្សបានចំនួន២៤នាក់ ឬ អាចប្រើប្រាស់ក្នុងការដឹកជញ្ជូនសម្ភារៈធ្ងន់ៗជាដើម។
យ៉ាងណាក៏ដោយ អ្នកនាំពាក្យក្រសួងការពារជាតិកម្ពុជា នៅមិនទាន់អាចបញ្ជាក់បាននៅឡើយទេថា តើឧទ្ធម្ភាគច្រដែលកម្ពុជាកំពុងពិចារណាទិញពីរុស្ស៊ីទាំងពីរគ្រឿងនេះ ក្នុង១គ្រឿង មានតម្លៃប៉ុន្មាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ