លោក សម រង្ស៊ី អំពាវនាវឲ្យសហគមន៍អន្តរជាតិ ដកភាពស្របច្បាប់ពីកម្ពុជា ដូចនៅវ៉េណេស៊ុយអេឡា
តាមរយៈអត្ថបទបញ្ចេញមតិមួយចុះផ្សាយនៅលើទំព័រសារព័ត៌មានបារាំង Libération លោក សម រង្ស៊ី បានអំពាវនាវឲ្យបណ្តាប្រទេសប្រជាធិបតេយ្យក្នុងលោក ប្រឆាំងនឹងរដ្ឋអំណាចលោក ហ៊ុន សែន ដូចដែលពួកគេកំពុងប្រឆាំងនឹងរបបលោក Nicolas Maduro នៅVenezuela អីចឹងដែរ។ ប៉ុន្តែអ្នកនាំពាក្យគណបក្សកាន់អំណាចបានចាត់ទុកការអំពាវនាវនេះថា គឺជាការញុះញង់។
ចុះផ្សាយនៅថ្ងៃ៖
ស្តាប់ - ០២:៤២
តាមរយៈអត្ថបទនេះ លោក សម រង្ស៊ី បានស្នើសុំឲ្យសហគមន៍អន្តរជាតិ ប្រកាសថា របប ហ៊ុន សែន មិនមានភាពស្របច្បាប់នោះទេ ពីព្រោះការបោះឆ្នោតនៅកម្ពុជា ក្នុងឆ្នាំ ២០១៨ កន្លងទៅក៏មិនមានភាពស្របច្បាប់ដែរ។ មិនស្របច្បាប់ព្រោះគណបក្សប្រឆាំងមិនមានវត្តមានក្នុងការបោះឆ្នោត គឺដូចករណី នៅវ៉េណេស៊ុយអេឡា (Venezuela) ដែលប្រទេសប្រជាធិបតេយ្យទាំងអស់ក្នុងពិភពលោក បានដកភាពស្របច្បាប់ពីរបប លោក នីកូឡា ម៉ាឌូរ៉ូ (Nicolas Maduro) ដែលបានរារាំងមិនឲ្យគណបក្សប្រឆាំង ចូលរួមក្នុងការបោះឆ្នោតក្នុងឆ្នាំ ២០១។ នេះបើយោងតាមអត្ថបទបញ្ចេញមតិរបស់លោក សម រង្ស៊ី ដែលត្រូវបានចុះផ្សាយនៅលើទំព័រសារព័ត៌មានបារាំង Libération កាលពីថ្ងៃទី ៣១ មករា។ ចំពោះ លោក សម រង្ស៊ី សហគមន៍បណ្តាប្រទេសប្រជាធិបតេយ្យនៅក្នុងលោក ត្រូវប្រកាសកុំទទួលស្គាល់លោក ហ៊ុន សែន ដូចដែលពួកគេបានប្រកាសមិនទទួលស្គាល់លោក Maduro នៅ Venezuela អ៊ីចឹងដែរ។ ហើយលើសពីប្រទេសវ៉េណេស៊ុយអេឡា (Venezuela) ទៅទៀត គឺប្រទេសកម្ពុជាមានកិច្ចព្រមព្រៀងសន្តិភាពទីក្រុងប៉ារីស ឆ្នាំ ១៩៩១ ដែលតម្រូវឲ្យមានការបោះឆ្នោតត្រឹមត្រូវ ដោយសេរី និងយុត្តិធម៌ ហើយឲ្យមានប្រព័ន្ធប្រជាធិបតេយ្យ សេរីពហុបក្ស គឺមិនមែនដូចរបបផ្តាច់ការបក្សតែមួយ ដែលមានសព្វថ្ងៃនេះទេ។ នេះបើតាមសំណេរបន្ថែមរបស់លោក សម រង្ស៊ី នៅលើទំព័រហ្វេសបុករបស់លោក នៅថ្ងៃទី ០១ ខែកុម្ភៈនេះ។
គួរជំរាបជូនថា មកទល់ពេលនេះ វិបត្តិនយោបាយនៅវ៉េណេស៊ុយអេឡាកំពុងបន្តពុះចែកសហគមន៍អន្តរជាតិជាពីរ នៅម្ខាងមាន សហរដ្ឋអាមេរិក កាណាដា អូស្ត្រាលី អ៊ីស្រាអែល និងប្រទេសមួយចំនួនទៀតនៅអាមេរិកឡាទីន បានទទួលស្គាល់លោក ហ័ន ហ្កាយដូ ប្រធានគណបក្សប្រឆាំង ជាប្រធានាធិបតីស្តីទី។ ចំណែកនៅម្ខាងទៀត មានរុស្ស៊ី ចិន ឬតួកគី ជាដើម បានបន្តគាំទ្រលោក នីកូឡា ម៉ាឌូរ៉ូ ខណៈដែលប្រទេសបារាំង អេស្ប៉ាញ អង់គ្លេស អាល្លឺម៉ង់ និងបែលហ្សិកជាដើម បានប្រកាសជំហរដាក់ឱស្សានុវាទទៅរដ្ឋាភិបាលលោក នីកូឡា ម៉ាឌូរ៉ូ ត្រូវតែប្រកាសរៀបចំការបោះឆ្នោតជាថ្មី ក្នុងរវាង៨ថ្ងៃទៀត បើពុំដូច្នោះទេ ប្រទេសទាំងនេះ នឹងប្រកាសទទួលស្គាល់រដ្ឋាភិបាលបណ្តោះអាសន្នរបស់លោក ហ័ន ហ្កាយដូ ថែមទៀត។
យ៉ាងណាក៏ដោយ លោក សុខ ឥសាន អ្នកនាំពាក្យគណបក្សកាន់អំណាច បានចាត់ទុកការសរសេររបស់លោក សម រង្ស៊ី នេះ ថាជាការញុះញង់ ដោយប្រៀបធៀបសភាពការណ៍នៅកម្ពុជា ទៅនឹងសភាពការណ៍នៅក្នុងប្រទេសវ៉េណេស៊ុយអេឡា ដែលកំពុងច្របូកច្របល់ ឲ្យសហរដ្ឋអាមេរិក និងសហគមន៏អឺរ៉ុប ដាក់កំហិតឲ្យមានការបោះឆ្នោតឡើងវិញក្នុងឆ្នាំ២០១៩នេះ ដោយចោទថា ការបោះឆ្នោតនៅឆ្នាំ២០១៨ ជាការបោះឆ្នោតក្លែងក្លាយ។ បន្ថែមលើនេះ លោក សុខ ឥសាន បានចំអកឲ្យលោក សម រង្ស៊ី ថា ការញុះញង់ពីក្រៅប្រទេសឲ្យប្រជាជននិងកងទ័ពបះបោរប្រឆាំងនឹងរដ្ឋាភិបាលកម្ពុជា នឹងគ្មានអ្នកណាឈឺក្បាលជាមួយឡើយ។ ផ្ទុយទៅវិញ វាកាន់តែធ្វើឲ្យលោក សម រង្ស៊ី ធ្លាក់ទឹកចិត្តកាន់តែខ្លាំងឡើងៗ ចំពោះជោគវាសនាអនាគតរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ