ស៊ុយអ៊ែតប្រកាសសើរើកិច្ចព្រមព្រៀងផ្តល់ជំនួយដល់កម្ពុជា ក្រោយការរំលាយគណបក្សប្រឆាំង
រដ្ឋាភិបាលស៊ុយអ៊ែត នៅថ្ងៃទី ២១ វិច្ឆិកាបានប្រកាសច្បាស់ៗថា រដ្ឋាភិបាលប្រទេសនេះ នឹងមិនផ្តល់ការគាំទ្រថ្មីណាមួយ ដល់ប្រទេសកម្ពុជាទៀតទេ លើកលែងតែវិស័យអប់រំ និងកិច្ចការស្រាវជ្រាវ។ នេះគឺជាសេចក្តីប្រកាសជាលើកទី០២របស់រដ្ឋាភិបាលស៊ុយអ៊ែត ប្រឈមនឹងស្ថានការវិវត្តន៍ចុងក្រោយនៅកម្ពុជា បន្ទាប់ពីតុលាការកំពូល បានសម្រេចរំលាយគណបក្សសង្គ្រោះជាតិរួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដោយបានបង្ហាញការព្រួយបារម្ភយ៉ាងខ្លាំងបំផុត អំពីការវិវត្តន៍នៃស្ថានភាពនយោបាយនៅកម្ពុជានារយៈពេលចុងក្រោយនេះ រដ្ឋាភិបាលស៊ុយអ៊ែត តាមរយៈស្ថានទូតរបស់ខ្លួនប្រចាំនៅកម្ពុជា បានប្រកាសសើរើនូវកិច្ចសហប្រតិបត្តិការឡើងវិញជាមួយភាគីកម្ពុជា។ តាមរយៈសេចក្តីប្រកាសព័ត៌មានចុះថ្ងៃទី ២១ វិច្ឆិកា នេះ រដ្ឋាភិបាលស៊ុយអ៊ែត បានអះអាងថា នឹងមិនបន្តការគាំទ្រថ្មីណាមួយទៀតឡើយដល់រដ្ឋាភិបាលកម្ពុជា ប្រសិនបើស្ថានភាពនយោបាយនៅក្នុងប្រទេសនេះ មិនវិលមករកស្ថានភាពល្អប្រសើរឡើងវិញ។ តាមរយៈសេចក្តីប្រកាសព័ត៌មានរបស់ខ្លួន រដ្ឋាភិបាលស៊ុយអ៊ែតប្រកាសថា នឹងសើរើមុនគេលើកិច្ចសហប្រតិបត្តិការលើវិស័យសិទ្ធិមនុស្ស និងលទ្ធិប្រជាធិបតេយ្យ ដែលរដ្ឋាភិបាលនេះ បានផ្តល់ការគាំទ្រជាយូមកហើយ។
សូមបញ្ជាក់ថា សេចក្តីប្រកាសនេះ គឺជាការឆ្លើយតបទៅនឹងការសន្យារបស់លោកស្រី Annika Ben David អគ្គរាជទូតសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋរបស់ស៊ុយអ៊ែត ដែលបានមកធ្វើទស្សនកិច្ចនៅកម្ពុជា កាលពីអំឡុងខែតុលា ដែលបានព្រមានថា ស៊ុយអ៊ែត នឹងពិនិត្យមើលឡើងវិញនូវរាល់ទំនាក់ទំនងជាមួយប្រទេសកម្ពុជា ប្រសិនបើគណបក្សប្រឆាំងត្រូវបានរំលាយ។ ដោយឡែក តាមរយៈសេចក្តីប្រកាសព័ត៌មាននៅថ្ងៃនេះ ស៊ុយអ៊ែតក៏បានរំលឹកឡើងវិញពីសេចក្តីថ្លែងការណ៍កាលពីសប្តាហ៍មុន របស់លោកស្រី Margot Wallstrom រដ្ឋមន្ត្រីការបរទេសស៊ុយអ៊ែត ដែលបានចាត់ទុកថា ការរំលាយគណបក្សប្រឆាំង ការវាយប្រហារទៅលើអង្គការសង្គមស៊ីវិល និងប្រព័ន្ធផ្សព្វផ្សាយនៅកម្ពុជានារយៈពេលចុងក្រោយនេះ គឺជាការឆ្លើយតបដ៏គ្រោះថ្នាក់របស់រដ្ឋាភិបាលកម្ពុជា ទៅលើលទ្ធិប្រជាធិបតេយ្យ និងសិទ្ធិមនុស្សនៅក្នុងប្រទេសនេះ។
គួរជំរាបជូនដែរថា អស់រយៈពេលជាយូមកហើយ ដែលស៊ុយអ៊ែត បានធ្វើកិច្ចសហប្រតិបត្តិការជាមួយរដ្ឋាភិបាលកម្ពុជាដើម្បីជម្រុញការអភិវឌ្ឍន៍នៅកម្ពុជា ជាពិសេសលើវិស័យសំខាន់ៗចំនួនបី រួមមាន ទី០១. ការពង្រឹងលទ្ធិប្រជាធិបតេយ្យ សិទ្ធិមនុស្ស សមភាពយែនឌ័រ, ទី០២. អភិបាលកិច្ចល្អ ការអប់រំ និងការងារ និងទី០៣. គឺវិស័យបរិស្ថាន និងការប្រែប្រួលអាកាសធាតុជាដើម។ កិច្ចសហប្រតិបត្តិការទាំងនេះ ត្រូវបានធ្វើកិច្ចសហប្រតិបត្តិការឡើងវិញជាទៀងទាត់នៅរយៈពេល៤ឆ្នាំម្តង ហើយកិច្ចសហប្រតិបត្តិការចុងក្រោយ ត្រូវបានធ្វើរួចហើយ ចាប់ពី ២០១៤-២០១៨ ។
គិតត្រឹមល្ងាចថ្ងៃទី ២១ វិច្ឆិកា នៅមិនទាន់មានប្រតិកម្មតបពីរដ្ឋាភិបាលកម្ពុជា ទៅនឹងសេចក្តីសម្រេចរបស់ស៊ុយអ៊ែតវិញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ