លោក សុខ ឥសាន៖ ពលរដ្ឋកម្ពុជា នឹងមិនបោះឆ្នោតព្រមានគណបក្សកាន់អំណាចជាលើកទី២ទេ
ចុះផ្សាយនៅថ្ងៃ៖
ស្តាប់ - ១៣:៣៦
ភ្ញៀវប្រចាំថ្ងៃរបស់វិទ្យុបារាំងអន្តរជាតិ RFI នៅថ្ងៃនេះ គឺឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា។ ឆ្លើយតបនឹងសំណួររបស់វិទ្យុបារាំងអន្តរជាតិ RFI ជុំវិញដំណើរឆ្ពោះទៅកាន់ការបោះឆ្នោតឃុំសង្កាត់នាពេលខាងមុខ លោក សុខ ឥសាន បានលើកឡើងថា គណបក្សប្រជាជនកម្ពុជាបានត្រៀមខ្លួនរួចរាល់ហើយ ហើយគណបក្សជឿជាក់ថា ប្រជាពលរដ្ឋកម្ពុជានឹងមិនបោះឆ្នោតព្រមានគណបក្សកាន់អំណាចជាលើកទី២នោះទេ។ គួរជំរាបជូនថា នៅក្នុងការបោះឆ្នោតជាតិកាលពីឆ្នាំ២០១៣ គណបក្សប្រជាជនកម្ពុជា បានបាត់បង់អស់២២អាសនៈទៅគណបក្សសង្គ្រោះជាតិ។ ហើយនៅក្នុងការបោះឆ្នោតឃុំសង្កាត់នៅថ្ងៃទី ៤ មិថុនា ខាងមុខ គណបក្សកាន់អំណាចនឹងបន្តបាត់បង់អំណាចថ្នាក់មូលដ្ឋានជាលើកដំបូងជាបន្តទៀត។ អាចនៅក្នុងហេតុផលនេះដែរ ដែលគណបក្សកាន់អំណាចបានរំលឹកឲ្យប្រធានស្ថាប័នរដ្ឋត្រៀមទទួលយកមេឃុំចៅសង្កាត់ រហូតដល់សមាជិកក្រុមប្រឹក្សាមកធ្វើជាជំនួយការ ដែលមានឋានៈស្មើប្រធាននាយកដ្ឋាន ប្រធានការិយាល័យ និងអនុប្រធានការិយាល័យផង។ ទោះជាយ៉ាងនេះក្តី លោក សុខ ឥសាន បានបញ្ជាក់ថា នេះមិនមែនជាការត្រៀមខ្លួនចាញ់របស់គណបក្សកាន់អំណាចនោះទេ។ខាងក្រោមនេះ គឺជាបទសម្ភាសន៍រវាង វ៉ា សំណព្វ ជាមួយលោក សុខ ឥសាន។
