លោក ស ខេង ស្តីបន្ទោសអភិបាលខេត្តតាកែវ ដែលរារាំងក្បួនធម្មយាត្រា
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជានាយករដ្ឋមន្ត្រីស្តីទី បានថ្លែងរិះគន់ចំៗទៅលើអភិបាលខេត្តតាកែវថា ធ្វើការមិនដឹងទិសតំបន់។ ការថ្លែងរិះគន់បែបនេះ ក្រោយពីមានការកត់សំគាល់ទៅលើការអនុវត្តការងារចំនួន២របស់អភិបាលខេត្តតាកែវថ្មី ដែលនាំអោយមានការរិះគន់ជាទូទៅ។
ចុះផ្សាយនៅថ្ងៃ៖
ស្តាប់ - ០២:២៨
រឿងរ៉ាវបានកើតឡើង តាំងពីមុនថ្ងៃប្រារព្ធខួបលើកទី៦៦ឆ្នាំ នៃទិវាសិទ្ធិមនុស្សអន្តរជាតិ១០ធ្នូ មកម្ល៉េះ ប៉ុន្តែទើបតែនៅថ្ងៃទី១២ធ្នូម្សិលមិញនេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជានាយករដ្ឋមន្ត្រីស្តីទីផង បានថ្លែងស្តីបន្ទោសចំៗ ទៅលើអភិបាលខេត្តតាកែវ លោក ឡាយ វណ្ណៈ ថា ធ្វើការដោយមិនបានឆ្លងយោបល់ថ្នាក់លើ និងគ្មានទិសតំបន់។ ការថ្លែងរិះគន់ បានធ្វើឡើង នៅក្នុងកិច្ចប្រជុំមួយ នៅឯក្រសួងមហាផ្ទៃកាលពីថ្ងៃទី១២ធ្នូម្សិលមិញ ដោយនាយករដ្ឋមន្ត្រីស្តីទី លោក ស ខេង បានទទួលស្គាល់ថា ក្នុងចំណោមអភិបាលខេត្តរាជធានីទាំង២៤ គឺមានតែអភិបាលខេត្តតាកែវម្នាក់ប៉ុណ្ណោះ ដែលធ្វើការខុសគេ។
បើតាមការកត់សំគាល់ កាលពីថ្ងៃទី៧ធ្នូកន្លងទៅ អភិបាលខេត្តតាកែវ លោក ឡាយ វណ្ណៈ បានចេញលិខិតមួយ ដោយបានកោះហៅប្រធានតុលាការសាលាដំបូងខេត្តតាកែវ និងព្រះរាជអាជ្ញា អោយចូលខ្លួនទៅឆ្លើយបំភ្លឺនៅព្រឹកថ្ងៃទី១៤ខែធ្នូ ពាក់ព័ន្ធនឹងរបាយការណ៍ស្តីពីការឃុំខ្លួនជនសង្ស័យពីរនាក់ដែលពាក់ព័ន្ធនឹងការរក្សាទុកនិងប្រើប្រាស់គ្រឿងញៀន។ បើតាមក្រុមអ្នកច្បាប់ អាជ្ញាធរ មិនមានសិទ្ធិអំណាចក្នុងការកោះហៅស្ថាប័នតុលាការឲ្យចូលខ្លួនទៅបំភ្លឺនោះឡើយ។ ចំណែកឯរឿងមួយទៀត កាលពីថ្ងៃទី៥ធ្នូកន្លងទៅ អាជ្ញាធរខេត្តតាកែវ បានប្រើកងកម្លាំងប្រដាប់អាវុធ រួមទាំងទាហានផង បានចេញទៅរារាំង និង ដាក់បារ៉ាស់ទប់ស្កាត់ ក្បួនធម្មយាត្រា ដែលរួមមានព្រះសង្ឃ តាជី យាយជី និងប្រជាពលរដ្ឋខ្មែរជាច្រើន មិនអោយចេញដំណើរពីស្រុកគីរីវង្ស ខេត្តតាកែវ ឆ្ពោះមកកាន់រាជធានីភ្នំពេញ ដើម្បីចូលរួមក្នុងទិវាសិទ្ធិមនុស្សអន្តរជាតិ១០ធ្នូនោះឡើយ តែចំណាត់ការរបស់អភិបាលខេត្តតាកែវខាងលើ ត្រូវបានបរាជ័យ បន្ទាប់ពីថ្នាក់លើបានដឹង និងបានបញ្ជាឲ្យដកកម្លាំងប្រដាប់អាវុធចេញទាំងអស់ ដើម្បីបើកផ្លូវឲ្យក្បួនធម្មយាត្រាធ្វើដំណើរតាមសម្រួល ខណៈដែលបណ្តាខេត្តផ្សេងៗទៀតនៅទូទាំងប្រទេស មិនមានខេត្តណាមួយបញ្ចេញចំណាត់ការរារាំងដូចករណីនៅខេត្តតាកែវនោះឡើយ។
បើតាមរបាយការណ៍របស់អង្គការសិទ្ធិមនុស្សលីកាដូ និងអ្នកឃ្លាំមើលសិទ្ធិមនុស្សផ្សេងៗទៀត មានតែក្បួនធម្មយាត្រាតាមផ្លូវជាតិលេខ២ និង ផ្លូវជាតិលេខ៣ដែលចេញពីខេត្តតាកែវប៉ុណ្ណោះ ដែលជួបការលំបាកជាងគេ។ អ្វីជាការកត់សំគាល់របស់ លោក ស ខេង ការធ្វើការដោយមិនបានឆ្លងកាត់យោបល់របស់អភិបាលខេត្តតាកែវបែបនេះ បាននាំមកនូវការរិះគន់យ៉ាងខ្លាំងពីសំណាក់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ