លោកស ខេង ប្រាប់អ្នកឃុំរការកុំឲ្យអស់សង្ឃឹម រង់ចាំលទ្ធផលពិនិត្យឈាមឡើងវិញ
នៅព្រឹកថ្ងៃសៅរ៍នេះ លោកស ខេង ឧបនាយករដ្ឋមន្ត្រី និង ជារដ្ឋមន្ត្រីក្រសួងមហាផ្ទៃ បានចុះទៅជួបសួរសុខទុក្ខប្រជាពលរដ្ឋដែលបានឆ្លងមេរោគអេដស៍នៅក្នុងឃុំរការ ស្រុកសង្កែ ខេត្តបាត់ដំបង។ ក្នុងឱកាសនោះ លោកឧបនាយករដ្ឋមន្ត្រីស ខេង បានស្នើឲ្យពលរដ្ឋទាំងនោះកុំមានការព្រួយបារម្ភពេក និងកុំបាក់ទឹកចិត្ត ហើយរង់ចាំលទ្ធភាពពិនិត្យជាក់ស្តែង។ លោកឧបនាយករដ្ឋមន្ត្រី ក៏បានសម្តែងការមិនទាន់ជឿរឿងផ្ទុះការឆ្លងរាលដាលមេរោគអេដស៍ក្នុងចំនួនដ៏ច្រើនបែបនេះនោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅចំពោះមុខប្រជាពលរដ្ឋដែលបានពិនិត្យឈាមរកឃើញថាមានមេរោគអេដស៍ទាំងនោះ លោកស ខេង បានបញ្ជាក់ថា សំណាកឈាមរបស់ពួកគេត្រូវបាននាំយកមកពិនិត្យឡើងវិញនៅក្នុងទីក្រុងភ្នំពេញ និងត្រូវបញ្ជូនបន្តទៅពិនិត្យទៅក្នុងប្រទេសបារាំង ស្វីស និងកាណាដាបន្ថែមទៀត ដើម្បីបញ្ជាក់ឲ្យបានច្បាស់លាស់។ ជាមួយគ្នានោះ លោកឧបនាយករដ្ឋមន្ត្រី បានលើកទឹកចិត្តដល់ប្រជាពលរដ្ឋទាំងនោះ កុំឲ្យមានការព្រួយបារម្ភពេក និង កុំបាក់ទឹកចិត្ត ហើយបន្តរស់នៅជាមួយគ្នាជាធម្មតា។
គួរបញ្ជាក់ថា ប្រជាពលរដ្ឋនៅក្នុងឃុំរការ ស្រុកសង្កែ ខេត្តបាត់ដំបងនៅដើមខែធ្នូនេះ បានសម្រុកនាំគ្នាទៅពិនិត្យឈាមរកមេរោគអេដស៍ បន្ទាប់ពីអ្នកភូមិមួយចំនួនត្រូវបានរកឃើញថាមានផ្ទុកមេរោគនេះ។ ក្រោយពីពិនិត្យជាបន្តបន្ទាប់ លទ្ធផលបឋមបានបង្ហាញថា អ្នកភូមិជាច្រើននាក់មានផ្ទុកនូវមេរោគកំណាចនេះ។
ប្រឈមមុខនឹងហេតុការណ៍ដ៏គួរឲ្យភ្ញាក់ផ្អើល និងតក់ស្លុតនេះ មន្ត្រីជំនាញរបស់រដ្ឋាភិបាលបានដុតដៃ ដុតជើងចុះទៅសិក្សាស្រាវជ្រាវករណីនេះនៅកន្លែងកើតហេតុផ្ទាល់តែម្តង។ ជាមួយគ្នានេះ អាជ្ញាធរខេត្តបាត់ដំបងក៏បានឃាត់ខ្លួនគ្រូពេទ្យប្រចាំភូមិម្នាក់ដែល អ្នកភូមិអះអាងថា បានទៅទទួលសេវាព្យាបាលពីគ្រូពេទ្យនោះ។ អ្នកភូមិបានដាក់ការសង្ស័យលើគ្រូពេទ្យនោះ ថា ជាអ្នកចម្លងមេរោគកំណាចនេះដល់ពួកគេ។ យ៉ាងណាក៏ដោយ មកដល់ពេលនេះ មន្ត្រីជំនាញរបស់កម្ពុជា រកមិនទាន់ឃើញពីមូលហេតុនៃការឆ្លងរាលដាលមេរោគអេដស៍ជាក្រុមនេះនៅឡើយនោះទេ។
ការរកមិនទាន់ឃើញនេះ ជាហេតុធ្វើឲ្យប្រមុខរដ្ឋាភិបាលកម្ពុជា លោកនាយកមន្ត្រីហ៊ុន សែន កាលពីថ្ងៃព្រហស្បតិ៍ បានសម្តែងការមិនទាន់ជឿថា អ្នកភូមិទាំងនោះពិតជាមានផ្ទុកមេរោគអេដស៍ដូច ការសន្និដ្ឋានរបស់ក្រុមអ្នកជំនាញនៅឡើយទេ។ ប្រមុខរដ្ឋាភិបាលបានបញ្ជាឲ្យមានការសិក្សាល្អិតល្អន់បន្ថែមទៀត អំពីបញ្ហាដ៏គួរឲ្យតក់ស្លុតនេះ ជាពិសេសលោកបានអំពាវនាវឲ្យរក្សាសុវត្ថិភាពគ្រូពេទ្យប្រចាំភូមិដែលគេចោទថាជាអ្នកចម្លងមេរោគទៅអ្នកភូមិ។ លោកមាន ឈីវវុន នាយកវិទ្យាស្ថានជាតិប្រយុទ្ធនឹងជំងឺអេដស៍ សើស្បែក និងកាមរោគ បានបញ្ជាក់ថា នៅពេលនេះក្រុមមន្ត្រីជំនាញកំពុងបន្តសិក្សាស្រាវជ្រាវលើករណីនេះ។
យ៉ាងណាក៏ដោយ លោកឧបនាយករដ្ឋមន្ត្រីស ខេង បានអំពាវនាវដល់ប្រជាពលរដ្ឋផ្សេងទៀត បញ្ឈប់ការទៅរកសេវាព្យាបាលនៅពេទ្យឯកជន ហើយទៅរកសេវាព្យាបាលនៅមណ្ឌលសុខភាពវិញ។
គួរកត់សម្គាល់ថា អ្នកភូមិដែលរកឃើញថា មានផ្ទុកមេរោគអេដស៍ទាំងនោះ ភាគច្រើនគឺមានអាយុចាប់ ៦០ ឆ្នាំឡើងទៅ ពោល គឺក្នុងចំណោម៧ នាក់ មាន៣ នាក់រកឃើញថា មានមេរោគនេះ ហើយអ្វីដែលរឹតតែគូរឲ្យកត់សម្គាល់ទៀតនោះ គឺព្រះសង្ឃ អាចារ្យវត្ត និងក្រុមគ្រួសារក៏ត្រូវបានរកឃើញថា មានផ្ទុកមេរោគអេដស៍នេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ