អ្នកវិភាគ៖ បណ្តឹងរបស់លោក សួន សេរីរដ្ឋា ជាការទាក់ទាញប្រជាប្រិយភាព
នៅថ្ងៃសុក្រទី១៨ធ្នូ ស្អែកនេះ គណបក្សអំណាចខ្មែររបស់លោក សួន សេរីរដ្ឋា នឹងរៀបចំសន្និសីទសារព័ត៌មានមួយ ជុំវិញប្រធានបទ «ការចោទប្តឹងលោក ហោ ណាំហុង ពីបទបរិហាកេរិ៍្តលោក សួន សេរីរដ្ឋា និងញុះញង់អោយមានការរើសអើងចំពោះគណបក្សអំណាចខ្មែរ។» ការប្តឹងផ្តល់នេះ ត្រូវបានអ្នកវិភាគឯករាជ្យមើលឃើញថា គ្រាន់តែជាការទាក់ទាញប្រជាប្រិយភាពតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៣៦
លោកបណ្ឌិត មាស នី អ្នកស្រាវជ្រាវដើម្បីអភិវឌ្ឍន៍សង្គម និងជាអ្នកវិភាគ និយាយថា លទ្ធភាពនៃការឈ្នះបណ្តឹង របស់លោក សួន សេរីរដ្ឋា ទៅលើលោក ហោ ណាំហុង គឺជារឿងដែលមិនអាចទៅរួចនោះទេ។ លោកបណ្ឌិត មាស នី ថាក្នុងបរិយាកាសសង្គមបែបនេះ អ្នកនយោបាយមិនគួរយករឿងផ្ទាល់ខ្លួន មកចង់ចាញ់ចង់ឈ្នះគ្នានោះទេ។ អ្នកនយោបាយ គួរគិតគូររឿងជាតិជារឿងធំ។ លោកបន្តថា ការប្តឹងផ្តល់គ្នារបស់អ្នកនយោបាយ មិនមែនជាអ្វីដែលកូនខ្មែរចង់បាននោះទេ។
ទាក់ទងនឹងការប្តឹងផ្តល់នេះដែរ លោកបណ្ឌិត រស់ រ៉ាវុធ សាស្រ្តាចារ្យវិទ្យាសាស្ត្រនយោបាយ និងជាអ្នកវិភាគដែរនោះ យល់ឃើញថា អ្នកនយោបាយខ្មែរចូលចិត្តបបួលគ្នាចងបញ្ហា ជាជាងបបួលគ្នាដោះស្រាយបញ្ហា។ លោកថាការប្តឹងផ្តល់របស់លោក សួន សេរីរដ្ឋា នេះ គឺជាការកេងចំណេញផ្នែកនយោបាយ និងដើម្បីទាក់ទាញប្រជាប្រិយភាពតែប៉ុណ្ណោះ។ លោកបណ្ឌិតរស់ រ៉ាវុធ បន្តថាអ្នកនយោបាយគួរទាក់ទាញប្រជាប្រិយភាព តាមរយៈការអនុវត្តគោលនយោបាយរបស់គណបក្សខ្លួន ការចុះជួបប្រជាពលរដ្ឋ និងរួមគ្នាធ្វើច្បាប់ដើម្បីជាតិ។
ចំណែកលោក អំ សំអាត មន្រ្តីស៊ើបអង្កេតជាន់ខ្ពស់របស់អង្គការលីកាដូ និយាយថាការប្តឹងផ្តល់គ្នានេះ គឺជាសិទ្ធិរបស់បុគ្គល ប៉ុន្តែបើអ្នកនយោបាយប្តឹងផ្តល់គ្នាច្រើន នោះនឹងធ្វើអោយបរិយាកាសនយោបាយអាប់អួរ។ ដូចគ្នានឹងបណ្ឌិត រស់ រ៉ាវុធ ដែរ លោក អំ សំអាត មើលឃើញថា ការប្តឹងផ្តល់របស់លោក សួន សេរីរដ្ឋា នេះ គឺជាការ ទាក់ទាញប្រជាប្រិយភាពតែប៉ុណ្ណោះ ព្រោះគណបក្សអំណាចពលរដ្ឋខ្មែរជាគណបក្សទើបនឹងបង្កើតថ្មី។ ម្យ៉ាងវិញទៀត ជុំវិញការស្វែងរកយុត្តិធម៌តាមប្រព័ន្ធតុលាការនេះ លោកអំ សំអាត និយាយថា តុលាការនឹងមិនអាចផ្តល់យុត្តិធម៌ដល់លោក សួន សេរីរដ្ឋា បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ