លោក សួន សេរីរដ្ឋា ប្តឹងលោកហោ ណាំហុង ទាមទារសំណងជំងឺចិត្ត៥០០លានរៀល
លោក សួន សេរីរដ្ឋា ប្រធានគណបក្សអំណាចខ្មែរ នៅព្រឹកថ្ងៃទី១៨ធ្នូនេះ បានចេញមុខមកធ្វើសន្និសីទកាសែត ដើម្បីប្រកាសប្តឹងលោក ហោ ណាំហុង រដ្ឋមន្រ្តីក្រសួងការបរទេសកម្ពុជាជាផ្លូវការហើយ។ បើតាមប្រធានគណបក្សអំណាចខ្មែររូបនេះថា លោកនឹងប្តឹងទាមទារសំណងជំងឺចិត្តពីលោក ហោ ណាំហុង ចំនួន៥០០លានរៀល។ ហើយថវិកាដែលលោករំពឹងថា នឹងឈ្នះក្តីនេះ នឹងយកទៅជូយដល់មន្ទីរពេទ្យគន្ធបុប្ផាទាំងអស់។
ចុះផ្សាយនៅថ្ងៃ៖
ស្តាប់ - ០២:០៥
ពាក្យបណ្តឹងរបស់លោក សួន សេរីរដ្ឋា នឹងដាក់ទៅកាន់តុលាការក្រុងភ្នំពេញ នៅថ្ងៃទី២១ធ្នូខាងមុខ ប្រសិនបើមិនមានការសរសេរលិខិតសុំទោសពីលោក ហោ ណាំហុងទេនោះ។ នេះបើតាមការប្រកាសរបស់ប្រធានគណបក្សអំណាចខ្មែរ លោក សួន សេរីរដ្ឋា នៅក្នុងសន្និសីទកាសែតមួយនៅថ្ងៃទី១៨ធ្នូ ឆ្នាំ២០១៥នេះ។
បើតាមប្រធានគណបក្សអំណាចខ្មែររូបនេះ លោកនឹងប្តឹងលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេសកម្ពុជា ពីបទ«បរិហារកេរ្តិ៍ និងញុះញង់ឲ្យមានការរើសអើងជាសាធារណៈ» ដោយយោងទៅលើការអត្ថាធិប្បាយរបស់លោកឧបនាយករដ្ឋមន្រ្តី ហោ ណាំហុង កាលពីថ្ងៃទី៧ធ្នូ ដែលបានចោទប្រកាន់គណបក្សអំណាចខ្មែរថា មានសមាជិកជាភេវរករនៅក្នុងជួរគណបក្សនេះ។ ប៉ុន្តែ លោក សួន សេរីរដ្ឋា បានច្រានចោល និងបានចាត់ទុកការអត្ថាធិប្បាយរបស់លោក ហោ ណាំហុង កាលពីថ្ងៃទី៧ធ្នូនោះថា គឺជាការញុះញង់ និងបានធ្វើឲ្យប្រជាពលរដ្ឋមានការភ័យខ្លាច ចំពោះគណបក្សអំណាចខ្មែរ ព្រោះប្រជាពលរដ្ឋនឹងគិតថា ជាគណបក្សដែលបង្កភេរវកម្ម។
ជុំវិញពាក្យបណ្តឹងរបស់លោក សួន សេរីរដ្ឋានេះ នៅមិនទាន់មានប្រតិកម្មជាសាធារណៈពីប្រមុខការទូតកម្ពុជា លោក ហោ ណាំហុង នៅឡើយទេ។ ក៏ប៉ុន្តែ តាមរយៈលិខិតចុះថ្ងៃទី១៧ ខែធ្នូ ឆ្នាំ២០១៥ លោក ការ សាវុត្ថ មេធាវីការពារក្តីឲ្យលោក ហោ ណាំហុងបានបញ្ជាក់ថា លោក សួន សេរីរដ្ឋា និងសមាជិក ៣រូបទៀត ធ្លាប់ត្រូវបានតុលាការសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគាររយៈពេល៧ឆ្នាំ និងពិន័យជាប្រាក់២៥លានរៀល ពីបទញុះញង់ឲ្យប្រព្រឹត្តបទឧក្រិដ្ឋមានជាអាទិ៍ រួមគំនិតក្បត់ជាតិ និងអំពើរារាំងប្រជាពលរដ្ឋ ដែលមានសិទ្ធិបោះឆ្នោត មិនឲ្យទៅបោះឆ្នោត និងបង្កការរំខានមិនឲ្យដំណើរការបោះឆ្នោតជាដើម។
នៅក្នុងសន្និសីទកាសែតនៅថ្ងៃនេះ លោក សួន សេរីរដ្ឋា បានបញ្ជាក់ថា ក្រៅពីការប្តឹងទាមទារឲ្យតុលាការកាត់ទោសតាមមាត្រាច្បាប់ហើយ លោកនឹងប្តឹងទាមទារសំណងជំងឺចិត្តពីលោក ហោ ណាំហុង ចំនួន៥០០លានរៀល ហើយប្រាក់សំណងជំងឺចិត្តនេះ លោកនឹងប្រគល់ទៅឲ្យមន្ទីរពេទ្យគន្ធបុប្ផាទាំងអស់។
យ៉ាងណាក៏ដោយ នៅចុងក្រោយនៃសន្និសីទកាសែតនេះ លោក សួន សេរីរដ្ឋា បានបញ្ជាក់ថា លោកនឹងមិនដាក់ពាក្យប្តឹងទៅកាន់តុលាការនោះទេ បើលោក ហោ ណាំហុង ព្រមសុំទោសជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ