សភាកម្ពុជាស្នើសុំអន្តរសភាមិនឱ្យបញ្ជូលបញ្ហាសមុទ្រចិនខាងត្បូង
មហាសន្និបាតអន្តរសភាអាស៊ាន អាចនឹងពុំមានការដាក់បញ្ចូល របៀបវីរៈលើបញ្ហាជម្លោះសមុទ្រចិនខាងត្បូងចូលទៅក្នុងការប្រជុំ។ នេះបើតាមការស្នើសុំរបស់រដ្ឋសភាកម្ពុជា ដោយសំអាងទៅលើការគោរពរដ្ឋធម្មនុញ្ញរបស់អាស៊ាន។ គួររំលឹកថាមហាសន្និបាតនេះនឹងប្រារព្ធឡើង នាខែកញ្ញាខាងមុខនេះ នៅក្នុងរដ្ឋធានីវៀងចន្ទន៍ ប្រទេសឡាវ។អត្តបទដោយ ហង់ យុត្តិវង្ស ចេមី
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
រដ្ឋសភាកម្ពុជានឹងផ្ញើលិខិតទៅកាន់ប្រធានអន្តរសភាAIPA ដើម្បីមិនឱ្យលើកយកបញ្ហាសមុទ្រចិនខាងត្បូងដ៏ចម្រូងចម្រាស់ដាក់ក្នុងរបៀបវារៈនៃកិច្ចប្រជុំរបស់សភាអាស៊ាននោះទេ។ លោកសុខ ឥសាន សមាជិកសភាគណបក្សប្រជាជនកម្ពុជា បានអះអាងថាការដាក់របៀបវារៈសមុទ្រចិនខាងត្បូងចូលក្នុងកិច្ចប្រជុំសភា នឹងអាចរំលោភរដ្ឋធម្មនុញ្ញអាស៊ាន។ រដ្ឋធម្មនុញ្ញអាស៊ាន ដែលមិនអនុញ្ញាតឲ្យសមាជិករបស់ខ្លួន យកបញ្ហាប្រទេសជាសមាជិកដទៃមកជជែកវែកញែកនៅក្នុងការប្រជុំនោះទេ។
ប៉ុន្តែយ៉ាងណាក៏ដោយ អ្នកវិភាគយុទ្ធសាស្ត្រនយោបាយការបរទេស បានលើកឡើងថាកម្ពុជាគឺកំពុងប្រកាន់ជំហរកាន់ជើងប្រទេសចិន ដែលជាមិត្តចាក់ទឹកមិនលិចរបស់ខ្លួន និងជាប្រទេស ដែលផ្តល់ជំនួយធំជាងគេមកកាន់កម្ពុជា។ លោក សុខ ឥសាន អះអាងថា រដ្ឋសភាកម្ពុជាមិនលូកដៃចូលទៅក្នុងបញ្ហាជម្លោះសមុទ្រចិនខាងត្បូងនោះទេ ព្រោះជាជម្លោះទ្វេភាគីតែប៉ុណ្ណោះ។ ហើយថា សមាជិកណាដែលមានបញ្ហាជាមួយប្រទេសចិន គួរតែយកបញ្ហានេះទៅ ជជែកពិភាក្សាដោះស្រាយទ្វេភាគី ជាមួយប្រទេសចិនដោយផ្ទាល់។ លោកសុខ ឥសានបន្ថែមថា ជំហឯករាជ្យមិនពាក់ព័ន្ធនឹងសំណុំជម្លោះសមុទ្រចិនខាងត្បូង មិនមែនតែកម្ពុជាមួយទេ ដែលជំទាស់លើបញ្ហានេះ កន្លងមកក៏មានប្រទេសមួយចំនួនធ្លាប់ជំទាស់ទៅលើរឿងនេះដូចគ្នាដែរ។
ការស្នើរបស់កម្ពុជានេះ គឺបានធ្វើឡើងខណៈ ដែលកិច្ចប្រជុំអន្តរសភាអាស៊ាន គ្រោងនឹងប្រជុំនៅខែកញ្ញាខាងមុន នៅរដ្ឋធានីវៀងចន្ទន៍ប្រទេសឡាវ។ សូមបញ្ជាក់ថា បញ្ហាជម្លោះសមុទ្រចិនខាងត្បូង គឺជារឿងសំណុំដ៏ចម្រូងចម្រាស់មួយរវាងសមាជិកអាស៊ាន ដែលពាក់ព័ន្ធនឹងជម្លោះ និងសមាជិកអាស៊ាន ដែលមិនពាក់ព័ន្ធនឹងជម្លោះជាមួយមហាយក្សចិន។
នៅក្នុងសំណុំរឿងនេះ គណបក្សសង្គ្រោះជាតិសុំមិនអត្ថាធិប្បាយ ដោយសារមិនមែនជាគណបក្សកាន់អំណាច ប៉ុន្តែលោក អេង ឆៃអៀង មន្ត្រីជាន់ខ្ពស់គណបក្សសង្គ្រោះជាតិគ្រាន់តែសង្ឃឹមថា កម្ពុជាអាចនឹងមានកិច្ចសហប្រតិបត្តិការល្អជាមួយនឹងប្រទេសផ្សេងៗនៅក្នុងតំបន់។ ហើយចំពោះ គណបក្សសង្គ្រោះជាតិវិញ គឺចង់បានតែសន្តិភាព យុត្តិធម៌ពេញលេញ និងមិនចង់ឲ្យប្រទេសកម្ពុជាជួបនឹងបញ្ហាប្រឈមផ្សេងៗឡើយ។
យ៉ាងណាក៏ដោយ លោក អ៊ូ វីរៈ អ្នកវិភាគឯករាជ្យ និងជាប្រធានវេទិកាអនាគតបានសង្កេតឃើញថា ទង្វើរបស់រដ្ឋាភិបាល គឺមានបំណង ដើម្បីបំពេញចិត្តមហាមិត្តចិនជាធំ ហើយកម្ពុជាក៏មិនចង់ឲ្យអាស៊ានលូកដៃចូលក្នុងរឿងនេះដែរ។ ហើយថាបញ្ហានេះ នឹងមិនមានផលចំណេញដល់ប្រទេសកម្ពុជានោះទេ មិនតែប៉ុណ្ណោះកម្ពុជាក៏ទទួលរងការរិះគន់យ៉ាងខ្លាំងពីសំណាក់សមាជិកអាស៊ាន ដែលពាក់ព័ន្ធនឹងជម្លោះ ព្រមទាំងប្រទេសអន្តរជាតិផងដែរ។ លោកអ៊ូ វីរៈ ក៏បានបន្ថែមទៀតថា បញ្ហាជម្លោះសមុទ្រចិនខាងត្បូងនេះ អាចនឹងធ្វើឲ្យអាស៊ានបែកបាក់គ្នា ហើយនឹងអាចធ្វើឲ្យប៉ះពាល់ដល់អនាគតរបស់ប្រទេសកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ