ប្រធានាធិបតីកូរ៉េខាងត្បូងផ្តើមទស្សនកិច្ចនៅកម្ពុជាថ្ងៃនេះ បន្ទាប់ពីប្រុយណេនិងម៉ាឡេស៊ី
ប្រធានាធិបតីកូរ៉េខាងត្បូង លោក មូន ចេអ៊ីន នឹងចាប់ផ្តើមបំពេញទស្សនកិច្ចជាផ្លូវរដ្ឋនៅកម្ពុជា ចាប់ពីថ្ងៃទី១៤ ដល់ថ្ងៃទី១៦ មីនា ឆ្នាំ២០១៩នេះ តបតាមការអញ្ជើញរបស់ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី។ នេះគឺជាដំណើរទស្សនកិច្ចជាលើកទី០១របស់លោក មួន ចេអ៊ីន មកកាន់កម្ពុជា និងជាប្រធានាធិបតីកូរ៉េខាងត្បូងទី៣ ដែលបានអញ្ជើញមកទស្សនកិច្ចជាផ្លូវរដ្ឋនៅកម្ពុជា។ តាមរយៈដំណើរទស្សនកិច្ចនេះ គេរំពឹងថា នឹងផ្ដល់ផលវិជ្ជមានកាន់តែច្រើនសម្រាប់ទំនាក់ទំនងការទូត និងសេដ្ឋកិច្ចរវាងប្រទេសទាំងពីរ។
ចុះផ្សាយនៅថ្ងៃ៖
ស្តាប់ - ០២:៤០
គួរជំរាបជូនថា មុនពេលដាក់ជើងជាន់ដីកម្ពុជានៅរសៀលថ្ងៃទី ១៤ មីនានេះ លោក មួន ចេអ៊ីន (Moon Jae-in) និងភរិយារបស់លោក គឺលោកស្រី គីម យ៉ុងស៊ុក (Kim Jung-sook) ទើបតែបានបញ្ចប់ដំណើរទស្សនកិច្ចនៅប្រទេសចំនួនពីរនៅតំបន់អាស៊ាន គឺប្រទេសប្រុយណេនិងម៉ាឡេស៊ី។ ជាដំណើរទស្សនកិច្ច ដើម្បីទាក់ទាញការគាំទ្រពីប្រទេសជាសមាជិកអាស៊ាន លើគោលនយោបាយថ្មីរបស់លោកនៅក្នុងតំបន់អាស៊ីខាងត្បូង និងជាពិសេស គឺការគាំទ្រគោលនយោបាយសន្តិភាពរបស់លោកនៅក្នុងឧបទ្វីបកូរ៉េ។ នេះបើយោងតាមការផ្សាយរបស់សារព័ត៌មានកូរ៉េខាងត្បូង។
ដោយឡែកនៅក្នុងដំណើរទស្សនកិច្ចរយៈពេល៣ថ្ងៃនៅកម្ពុជា ដោយចាប់ផ្តើមពីថ្ងៃទី ១៤ ដល់ថ្ងៃទី ១៦ មីនានេះវិញ លោក មួន ចេអ៊ីន នឹងចូលគាល់ព្រះមហាក្សត្រកម្ពុជាព្រះបាទសម្តេចព្រះ បរមនាថ នរោត្តម សីហមុនី នៅព្រះបរមរាជវាំង និងបន្ទាប់មក លោកនិងជួបជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព។ តាមរយៈជំនួបនេះ ប្រធានាធិបតីកូរ៉េខាងត្បូងនិងលោកនាយករដ្ឋមន្ត្រី ហ៊ុន សែន នឹងពិភាក្សាអំពីការជំរុញទំនាក់ទំនងទ្វេភាគី និងការពង្រីកកិច្ចសហប្រតិបត្តិការលើវិស័យនានា និងការផ្លាស់ប្តូរយោបល់គ្នាលើបញ្ហាតំបន់និងអន្តរជាតិ ដែលជាក្តីកង្វល់និងផលប្រយោជន៍រួម។ បន្ទាប់ពីនេះ ថ្នាក់ដឹកនាំទាំងពីរ ក៏នឹងអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួនផង។ ហើយនៅចុងបញ្ចប់នៃដំណើរទស្សនកិច្ចនេះ ភាគីទាំងពីរនឹងចេញសេចកី្តថ្លែងការណ៍រួម ស្តីពី លទ្ធផលនៃដំណើរទស្សនកិច្ចរយៈពេល៣ថ្ងៃនៅកម្ពុជានេះ។
តាមរយៈដំណើរទស្សនកិច្ចនេះ គេរំពឹងដែរថា លោក មួន ចេអ៊ីន និងលោកនាយករដ្ឋមន្ត្រី ហ៊ុន សែន នឹងអញ្ជើញថ្លែងសុន្ទរកថា ក្នុងវេទិកាធុរកិច្ចកម្ពុជា-កូរ៉េខាងត្បូង ដើម្បីលើកទឹកចិត្តឲ្យមានការវិនិយោគ ការផ្លាស់ប្តូរសេដ្ឋកិច្ចនិងពាណិជ្ជកម្ម កាន់តែច្រើនឡើងថែមទៀត។ គួរជំរាបជូនថា គិតចាប់ពីឆ្នាំ ២០១៦ដល់ឆ្នាំ២០១៨កន្លងមកនេះ ទំហំពាណិជ្ជកម្មកម្ពុជា-កូរ៉េខាងត្បូង បានកើនឡើងពី ៦០២,៦៨២ លានដុល្លារ ដល់៧៤៦,៣៨៥លានដុល្លារ។ក្រៅពីនេះ ទំហំវិនិយោគរបស់កូរ៉េខាងត្បូងនៅកម្ពុជាមានចំនួន២១៤គម្រោងជាមួយទំហំទឹកប្រាក់ប្រមាណ ៤.៤៧ពាន់លានដុល្លារ គិតចាប់ពីឆ្នាំ១៩៩៦ ដល់ខែមករាឆ្នាំ២០១៩។
សូមបញ្ជាក់ដែរថា នេះគឺជាដំណើរទស្សនកិច្ចលើកទី០១របស់ លោក មួន ចេអ៊ីន មកកាន់កម្ពុជា និងជាប្រធានាធិបតីកូរ៉េខាងត្បូងទី០៣ ដែលបានអញ្ជើញមកបំពេញទស្សនកិច្ចជាផ្លូវរដ្ឋនៅកម្ពុជា បន្ទាប់ពីលោក រ៉ូ មូយុន (Roh Moo-hyun) ដែលបានមកទស្សនកិច្ចនៅកម្ពុជា កាលពីខែវិច្ឆិកាឆ្នាំ២០០៦ និងលោក លី ម្បុងបាក់ (Lee Myung-bak) ដែលបានធ្វើទស្សនកិច្ចមកកម្ពុជានៅខែតុលាឆ្នាំ២០០៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ