លោកនាយករដ្ឋមន្ត្រី៖ អូស្រ្តាលីខ្លាចលោកមិនចូលរួមកិច្ចប្រជុំអាស៊ាន-អូស្ត្រាលី
លោក ហ៊ុន សែន នាយករដ្ឋមន្ត្រីកម្ពុជានៅព្រឹកនេះ បានថ្លែងបែបចំអកដល់អ្នករិះគន់រូបលោកថា អូស្ត្រាលីខ្លាចលោកមិនអាចចូលរួមក្នុងកិច្ចប្រជុំអាស៊ាន-អូស្រ្តាលីទៅវិញទេ។ ជាកិច្ចប្រជុំ ដែលគ្រោងធ្វើនៅទីក្រុងស៊ីដនី នាខែក្រោយនេះ។ ការថ្លែងបែបហួសចិត្តនេះ កើតឡើងបន្ទាប់ពីលោក ហ៊ុន សែន ទទួលដំណឹងថាអូស្ត្រាលីហៅលោកទៅគាប។
ចុះផ្សាយនៅថ្ងៃ៖
ស្តាប់ - ០១:៥៦
លោកនាយករដ្ឋមន្ត្រីបានអះអាងនៅមុខ កម្មករ កម្មការនី ប្រមាណ១,៥ម៉ឺននាក់ថា កាលពីថ្ងៃទី២០ ខែកុម្ភៈមានគេលើកឡើងថាអូស្ត្រាលីហៅលោកទៅដើម្បីគាប ក្នុងពេលដែលអូស្រ្តាលីខា្លចលោកមិនទៅចូលរួមកិច្ចប្រជុំនៅអូស្ត្រាលី និងជំទាស់សេចក្តីថ្លែងការណ៍ ដែលធ្វើឲ្យសេចក្តីថ្លែងការណ៍នោះចេញមិនរួច។
លោកនាយករដ្ឋមន្ត្រីហ៊ុន សែន បង្ហាញការជឿជាក់ថាប្រទេសអូស្ត្រាលី និងមិនធ្វើបែបនោះដាក់លោកទេ។ លោកនាយករដ្ឋមន្ត្រីបន្តថាមនុស្សដូចលោកមិនមានអ្នកណាហ៊ានស្តីបន្ទោសទល់មុខនោះឡើយ បើដូច្នេះមែននោះ លោកនឹងចង្អុលមុខគេវិញភ្លាម។
សូមជ្រាបជូនថាកិច្ចប្រជុំកំពូលអាស៊ាន-អូស្ត្រាលី ដែលគ្រោងធ្វើឡើងនៅថ្ងៃទី១៧ និង១៨ ខែមីនា ខាងមុខ នឹងមានវត្តមានមេដឹកនាំកំពូលៗរបស់ប្រទេសជាសមាជិកអាស៊ានចូលរួម ដោយមានការទទួលស្វាគមន៍ពីនាយករដ្ឋមន្ត្រីអូស្ត្រាលីលោក Malcolm Turnbull ។
កាលពីដើមខែកុម្ភៈកន្លងទៅ សមាជិកព្រឹទ្ធសភានៃគណបក្សប្រឆាំងមួយរូបនៅក្នុងប្រទេសអូស្រ្តាលី បានអំពាវនាវឲ្យរដ្ឋាភិបាលអូស្រ្តាលីដកហូតមកវិញ នូវលិខិតអញ្ជើញលោកនាយករដ្ឋមន្ត្រី ហ៊ុន សែន ឲ្យមកចូលរួមកិច្ចប្រជុំអាស៊ាន-អូស្រ្តាលី។ ជាការអំពាវនាវបន្ទាប់ពីសមាជិកព្រឹទ្ធសភាអូស្រ្តាលី រូបនេះបានឃើញនូវចំណាត់ការរបស់រដ្ឋាភិបាលកម្ពុជា ដែលមានលក្ខណៈជាប្រព័ន្ធក្នុងការរុះរើសម្លេងឯករាជ្យ និងគណបក្សប្រឆាំងនៅកម្ពុជាចាប់តាំងពីពាក់កណ្តាលឆ្នាំ២០១៧មក។
លោកនាយករដ្ឋមន្ត្រីបន្ទាប់ពីថ្លែងចំអកដល់អ្នករិះគន់ជុំវិញវត្តមានរបស់លោកនៅអូស្ត្រាលី លោកក៏បានផ្តាំដល់អ្នកត្រៀមធ្វើបាតុកម្មនៅពេលលោកមានវត្តមាននៅអូស្ត្រាលីនាពេលខាងមុខថា ការធ្វើបាតុកម្មនោះ គឺជាសេរីភាពរបស់ពួកគេមែន ប៉ុន្តែលោកអះអាងថាលោកក៏មានប្រជាជននៅក្រៅប្រទេសចាំគាំទ្ររូបលោកដែរ។
លោកបញ្ជាក់ថាអ្នកមកធ្វើបាតុកម្មនៅក្រៅប្រទេសប្រឆាំងនឹងវត្តមានរបស់លោកកន្លងមកមានតែប្រមាណ១០ភាគរយប៉ុណ្ណោះនៃអ្នកដែលបានមកជួបលោក។ លោកនាយករដ្ឋមន្ត្រីក៏បានហាមមិនឲ្យមានការដុតរូបថតរបស់លោកជាដាច់ខាត បើមិនដូចនោះទេ លោកនឹងតាមដល់ផ្ទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ