លោក ហ៊ុន សែន ប្រកាសប្រើកណ្តាប់ដៃដែកលុបបំបាត់ការកែច្នៃរថយន្តខុសបច្ចេកទេស
ប្រមុខរដ្ឋាភិបាលកម្ពុជា លោក ហ៊ុន សែន ប្រកាសប្រើកណ្តាប់ដៃដែករបស់លោកនៅថ្ងៃនេះ ដើម្បីលុបបំបាត់ការកែច្នៃរថយន្តខុសបច្ចេកទេសដឹកទំនិញដែលនាំឲ្យគ្រោះថ្នាក់ចរាចរណ៍កើតឡើងញឹកញាប់។ ការប្រកាសដាក់ចេញវិធានការកណ្តាប់ដៃដែកនេះ ដោយលោកប្រមុខរដ្ឋាភិបាលអះអាងថា មកពីគណៈកម្មាធិការជាតិសុវត្ថិភាពចរាចរណ៍ដែលដឹកនាំដោយរដ្ឋមន្រ្តីក្រសួងមហាផ្ទៃ លោក ស ខេង កន្លងមកធ្វើការមិនសូវមានប្រសិទ្ធិភាព។
ចុះផ្សាយនៅថ្ងៃ៖
ស្តាប់ - ០២:២៧
អត្ថបទដោយ៖ អ៊ឹង ប៊ុនថន
ពីស្រុកស្ទឹងត្រង់ ខេត្តកំពង់ចាម ជាទីដែលសម្បូរទៅដោយរថយន្តដឹកទំនិញធំៗ លោក ហ៊ុន សែន បាននិយាយចំៗថា រថយន្តដែលកែច្នៃខុសបច្ចេកទេសភាគច្រើនគឺ ដឹកដែក ស៊ីម៉ងតិ៍ ដឹកដំឡូងមី និងដឹកគោ ក្របី ជាដើម។ ក្នុងពិធីបើកការដ្ឋានសង់ស្ពានឆ្លងកាត់ទន្លេមេគង្គនោះ លោកប្រមុខរដ្ឋាភិបាលក៏បានព្រមានទុកជាមុនទៅដល់អភិបាលខេត្ត និងអភិបាលស្រុក កុំឲ្យចេញមុខអន្តរាគមន៍ ករណីដែលប៉ូលីសចាប់រថយន្តដែលកែច្នៃខុសលក្ខណៈបច្ចេកទេសទាំងនោះ។ មិនត្រឹមតែចាប់រថយន្តកែច្នៃខុសបច្ចេកទេសដែលធ្វើចរាចរណ៍លើផ្លូវនោះទេ ប៉ុន្តែអ្នកដែលរកស៊ីកាត់រថយន្តខុសបច្ចេកទេសក៏ត្រូវតែលុបបំបាត់ផងដែរ។ នេះជាការបញ្ជារបស់លោកនាយករដ្ឋមន្រ្តី។
ប្រសិនបើមានបញ្ហាប្រតោងប្រទាញគ្នា ជាមួយតុលាការ លោក ហ៊ុន សែន បានបញ្ជាឲ្យសមត្ថកិច្ចត្រូវចាប់រថយន្តទាំងនោះ ទៅរក្សាទុកនៅតុលាការ ហើយឲ្យបើកសវនាការលើរថយន្តដែលកែច្នៃខុសបច្ចេកទេសទាំងនោះតែម្តង។
បន្ថែមពីនេះ នៅលើហ្វេសប៊ុក លោក ហ៊ុន សែន បានបញ្ជាក់ថា ចាប់ពី០ ម៉ោងយប់នេះ ថ្ងៃទី ៩ ខែ កុម្ភៈ ឆ្នាំ ២០១៨ ចំពោះរថយន្តកាត់តកែឆ្នៃ ទាំងអស់ បើឃើញ មានបើកបរនៅខេត្តណា ឬស្រុកណា គឺត្រូវចាប់ទុកទាំងអស់។ លោកក៏ប្រាប់ “ទាំងរដ្ឋមន្រ្តី ទាំងចៅហ្វាយខេត្ត ទាំងចៅ ហ្វាយស្រុក គឺត្រូវទទួលខុសត្រូវ។ បើមិនចាត់វិធានការទេ គឺប្រឈមនឹងការដកតួនាទីមុខតំណែង”។
ចំពោះរថយន្តដឹកជញ្ជូនលើសទម្ងន់វិញ លោកប្រមុខរដ្ឋាភិបាល បានដាក់បញ្ជាផ្ទាល់មាត់ឲ្យ ក្រសួងមន្ទីរពាក់ព័ន្ឋនានាត្រូវជួបប្រជុំជាមួយម្ចាស់ ឬតំណាងក្រុមហ៊ុនធ្វើការ ពន្យល់ ណែនាំឲ្យបានច្បាស់អំពីច្បាប់ចរាចរណ៍ និងការដឹកជញ្ជូន និងផ្ទុកទំនិញ លើសទម្ងន់ ដែលអាចបង្កផលប៉ះពាល់ដល់ការខូចខាតផ្លូវថ្នល់ និងស្ពាន ព្រមទាំងអាចបង្កគ្រោះថ្នាក់ផ្សេងៗដល់ប្រជាពលរដ្ឋធ្វើដំណើរ។
ជាមួយគ្នានោះ លោក ហ៊ុន សែន ព្រមានថា “បើក្រុមហ៊ុនណាមិនគោរពតាមច្បាប់ គឺត្រូវចាប់រថយន្តនោះទុក ហើយនឹងអាចឈានទៅបិទក្រុមហ៊ុននោះតែម្តង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ