លុយគឺជានុយដ៏ធំបំផុត សម្រាប់ស្ទូចកីឡាខ្មែរពីកម្រិតឱនភាពឲ្យទៅជារុងរឿង
ចុះផ្សាយនៅថ្ងៃ៖
ដើម្បីអភិវឌ្ឍកីឡាខ្មែរ បញ្ហាហិរញ្ញវត្ថុ បានដើរតួនាទីសំខាន់ជាងគេក្នុងចំណោមតម្រូវការលើ វិស័យនេះ។ តាមរយៈបទពិសោធន៍កន្លងមកក៏ដូចជាបច្ចុប្បន្ន ការលើកទឹកចិត្តដោយផ្តល់ថវិកាដោយផ្ទាល់ដល់កីឡាករ កីឡាការិនី គឺជាចលករមួយជម្រុញឲ្យអត្តពលិកមានការប្រឹងប្រែង។ ភាពប្រឹងប្រែងនេះនាំមកនូវលទ្ធផលល្អជាបណ្តើរៗហើយ សម្រាប់ប្រភេទកីឡាមួយចំនួន។ តែកីឡាមួយចំនួនទៀតក៏គួរតែយកចិត្តទុកដាក់ដូចគ្នាដែរ គឺតាមរយៈការជួយឧបត្ថម្ភពីក្រុមហ៊ុនឯកជន និងស្ថាប័នរដ្ឋនានា។
តាមរយៈការបើកប្រកួតកីឡាជាតិទ្រង់ទ្រាយធំ កាលពីពេលថ្មីៗនេះ បង្ហាញថា កីឡាករ កីឡាការិនីកម្ពុជា មានសមត្ថភាពលេងកីឡាកម្រិតខ្ពស់ជាច្រើននាក់។ ក៏ប៉ុន្តែឱកាសនៃការអភិវឌ្ឍអត្តពលិកទាំងនោះ នៅមិនទាន់មានការកត់សម្គាល់ជាវិជ្ជមានជាទូទៅនៅឡើយ។
កត្តាសំខាន់ ក្នុងការអភិវឌ្ឍន៍ វិស័យកីឡាខ្មែរ គឺថវិកា។ ថវិកាសំខាន់ណាស់ វាអាចធ្វើឲ្យមានការប្រែប្រួលយ៉ាងធំធេងលើវិស័យកីឡាជាតិ។ ជាក់ស្តែង កីឡាបាល់ទាត់ ចំបាប់ និងកីឡាប្រដាល់ តេក្វាន់ដូ ជាដើម គឺជាប្រភេទវិញ្ញាសារកីឡា ដែលមានការលូតលាស់ល្អ បន្ទាប់ពីមានការយកចិត្តទុកដាក់ និងឧបត្ថម្ភពីសំណាក់ សហគ្រាសឯកជននានា។
ការគៀងគររកចំណូល ដើម្បីឧបត្ថម្ភកីឡាករ និងកីឡាការិនី ពីសំណាក់ក្រុមហ៊ុន ឯកជនគឺជាការចាំបាច់។ ចាំបាច់ដោយគេមិនអាចរងចាំថវិកាជាលុយរៀលពីរដ្ឋាភិបាល ដែលមានកំណត់នោះទេ។ ការវិវឌ្ឍរបស់កីឡាខ្មែរ នាដំណាក់កាលចុងក្រោយនេះ បង្ហាញថាមានគម្លាតគ្នាយ៉ាងខ្លាំងរវាងប្រភេទកីឡា ដែលមានការឧបត្ថម្ភថវិកាគ្រប់គ្រាន់ ឬថវិកាលើកទឹកចិត្ត និងប្រភេទកីឡា ដែលមានធនធានតិចតួច ឬអាចនិយាយថាកីឡា ដែលរំពឹងតែទៅលើធនធានរបស់រដ្ឋ។
នៅប្រទេសអាស៊ាននានា ការអភិវឌ្ឍវិស័យកីឡារបស់គេគ្រប់វិញ្ញាសារ គឺពឹងផ្អែកទៅលើមួយផ្នែកថវិការបស់រដ្ឋាភិបាល និងមួយផ្នែកធំទៀតបានមកពីសហគ្រាសឯកជន ដែលជាអ្នកឧបត្ថម្ភ ឬ Sponsor ដ៏សំខាន់។
ងាកមកមើលប្រទេសកម្ពុជាវិញ មានប្រភេទកីឡាតិចតួចណាស់ ដែលមានក្រុមហ៊ុនជួយឧបត្ថម្ភ។ ហើយកីឡាជាច្រើនប្រភេទទៀតរស់ ដោយសារថវិកាបន្តិចបន្ទួច ដែលផ្តល់ដោយរដ្ឋាភិបាលតាមរយៈក្រសួងអប់រំ។ ការដែលមានថវិកាមិនគ្រប់គ្រាន់ ខ្វះអាហារបំប៉ន ពោលគឺមិនមានរបបអាហារត្រឹមត្រូវតាមស្តង់ដារកីឡា នោះអត្តពលិកមិនអាចលូតលាស់ក្នុងការ ហ្វឹកហាត់បានទេ។ ថវិកាលើកទឹកចិត្តក៏ជាផ្នែកមួយជួយឲ្យកីឡាករមានឆន្ទៈប្រឹងប្រែងផងដែរ។
ម៉្យាងទៀត ថវិកាឧបត្ថម្ភ ដែលទម្លាក់ពីថ្នាក់លើមក គប្បីសហព័ន្ធកីឡានីមួយៗ បញ្ជូនឲ្យដល់ដៃកីឡាករ និងចៀសវាងភាពយឺតយ៉ាវ ដែលជាមូលហេតុធ្វើឲ្យកីឡាករបាក់ទឹកចិត្ត និងមានភាពរារែកក្នុងការហ្វឹកហាត់។ តម្លាភាពនិងគណនេយ្យភាពក្នុងវិស័យកីឡា គឺជាការចាំបាច់។ មួយវិញទៀត យុវជនខ្មែរនៅតាមបណ្តាខេត្តនានា ដែលមានសមត្ថភាព និងទេពកោសល្យ ក៏គួរតែមានចំណាត់ការប្រមូលផ្តុំពួកគេ ផ្តល់ការហ្វឹកហាត់ និងឧបត្ថម្ភថវិកាឲ្យបានគ្រប់គ្រាន់ដែរ។
រីឯបញ្ហាផ្សេងៗទៀត ដូចជាទីលានហ្វឹកហាត់ សម្ភារៈហ្វឹកហាត់ ជាដើម គឺជាកត្តាសំខាន់ដែរតែជារឿងបន្ទាប់បន្សំ សំខាន់លុយគ្រប់គ្រាន់សម្រាប់អត្តពលិក គឺជាកត្តាចំបង ដែលនាំឲ្យគ្រប់វិស័យកីឡាប្រកបដោយសក្តានុពល។
ជាការពិតកាលពីថ្ងៃសៅរ៍សប្តាហ៍មុន លោកនាយករដ្ឋមន្ត្រី ហ៊ុន សែន ក៏បានអំពាវនាវដល់សហគ្រាសឯកជននានា និងស្ថាប័នរដ្ឋ ចងសម្ព័ន្ធភាពជាមួយកីឡាណាមួយឬច្រើន តាមលទ្ធភាពរបស់ខ្លួន ដើម្បីលើកទឹកចិត្តដល់កីឡារបស់ជាតិ។ លោក ហ៊ុន សែន ក៏បានសង្ឃឹមដែរថាក្រុមហ៊ុន និងស្ថាប័នរបស់រដ្ឋនឹងជ្រើសរើសកីឡាណាមួយ ដើម្បីជួយទ្រទ្រង់ជាពិសេសផ្នែកហិរញ្ញវត្ថុ។
តាមរយៈការអំពាវនាវរបស់ប្រមុខរដ្ឋាភិបាលដូច្នេះ គេរំពឹងថាប្រភេទកីឡា ដែលមានការខ្វះខាតកន្លងមក នឹងអាចមានក្តីសង្ឃឹម ហើយកីឡាខ្មែរអាចនឹងមានការរីកចម្រើនឡើងព្រមៗគ្នា ប្រសិនបើមានការគោរពតាមការអនុសាសន៍របស់លោកនាយករដ្ឋមន្ត្រីមែននោះ។
ជាការកត់សម្គាល់ មានកីឡាសក្តានុពលមួយចំនួន ដែលជាប្រភេទកីឡាអូឡាំពិក ត្រូវបានជម្រុញ និងយកចិត្តទុកដាក់ជាងកីឡាមិនមែនអូឡាំពិក។ ក៏ប៉ុន្តែសម្រាប់ការត្រៀមលក្ខណៈធ្វើជាម្ចាស់ផ្ទះកីឡាស៊ីហ្គេមឆ្នាំ ២០២៣ ខាងមុខនេះ កម្ពុជាមិនអាចព្រលែងប្រភេទកីឡាមួយ អភិវឌ្ឍកីឡាមួយផ្សេងទៀតបានទេ។ ក្នុងនាមជាម្ចាស់ផ្ទះយ៉ាងហោចណាស់មានប្រភេទកីឡាពី ៣០ ទៅ៤០កីឡាដែរ ដែលត្រូវតែមានការជម្រុញឲ្យមានសន្ទុះអាចទទួលមេដាយបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ