សិស្សសាលាដែលមិនចូលរៀន ជាមុខសញ្ញាថ្មីនៃការបង្រ្កាបគ្រឿងញៀនរបស់អាជ្ញាធរ
ដើម្បីទប់ស្កាត់ការប្រើប្រាស់គ្រឿងញៀននៅទូទាំងប្រទេស អាជ្ញាធរប្រយុទ្ធប្រឆាំងគ្រឿងញៀន បានកំណត់មុខសញ្ញាថ្មីនៃអ្នកដែលប្រើប្រាស់គ្រឿងញៀន គឺជាសិស្សសាលាដែលមិនចូលរៀន។ លោក មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា សិស្សសាលាដែលមិនចូលរៀន គឺជាជនងាយរងគ្រោះ ដែលងាយធ្លាក់ខ្លួនក្លាយជាអ្នកប្រើប្រាស់គ្រឿងញៀន តាមរយៈការអូសទាញពីមិត្តភ័ក្រ្ត និង អ្នកជួញដូរគ្រឿងញៀន។
ចុះផ្សាយនៅថ្ងៃ៖ កែប្រែថ្ងៃទី៖
របាយការណ៍នៃចំនួនអ្នកប្រើប្រាស់គ្រឿងញៀន ក្នុងរយៈពេលពីរខែ ដើមឆ្នាំ ២០១៧ នេះ បានបញ្ជាក់ថា ៩០% នៃយុវជនអាយុចន្លោះពី ១៨ ដល់ ៣៥ ឆ្នាំ ជាអ្នកប្រើប្រាស់គ្រឿងញៀន និង ត្រូវបានសមត្ថកិច្ចឃាត់ខ្លួន។ នេះបើតាម លោក មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន។
លោក មាស វីរិទ្ធ សង្កត់ធ្ងន់ថា ដើម្បីទប់ស្កាត់បទល្មើសគ្រឿងញៀនមិនឲ្យរីករាលដាលនៅតាមសាលារៀន អាជ្ញាធរ បានកំណត់គោលដៅសាលារៀន ដែលមានទីតាំងស្ថិតនៅតំបន់ដែលមានចរាចរណ៍ឬប្រើប្រាស់គ្រឿងញៀនច្រើន ទីពីរ សាលារៀនដែលមានសិស្សគេចម៉ោងសិក្សាច្រើន និងទី៣ សាលារៀនដែលមានសិស្សអវត្តមានច្រើន។
តាមរយៈការកំណត់មុខសញ្ញានេះ អាជ្ញាធរមានសមត្ថកិច្ច ក៏បានកំណត់ទីតាំងមួយចំនួន ដែលជាចំណុចគោលដៅ ដែលសិស្សគេចសាលា ហើយប្រើប្រាស់គ្រឿងញៀន ប្រមូលផ្តុំគ្នា មានដូចជា ផ្ទះសំណាក់ ហាងខារ៉ាអូខេ ក្លឹបកម្សាន្ត ជាដើម។
មិនត្រឹមតែប៉ុណ្ណោះ អាជ្ញាធរជាតិប្រយុទ្ធប្រឆាំងគ្រឿងញៀន សហការណ៍ជាមួយក្រសួងអប់រំ យុវជន និង កីឡា នឹងដាក់ឲ្យដំណើការនៅម៉ាស៊ីនតេស្ត ទឹកនោម នៅតាមសាលារៀន សម្រាប់ត្រួតពិនិត្យ សិស្សដែលសង្ស័យថា មានជាប់ពាក់ព័ន្ធនឹងការប្រើប្រាស់គ្រឿងញៀន។
លោក មាស វីរិទ្ធ បញ្ជាក់ វិធានការនេះ នឹងធ្វើឡើងតែនៅសាលារៀនគោលដៅ ដែលសង្ស័យថាសិស្សប្រើប្រាស់គ្រឿងញៀន ហើយមានការអនុញ្ញាតពីអាណាព្យាបាលតែប៉ុណ្ណោះ។
ទោះបីជាយ៉ាងណាក៏ដោយ លោក មាស វីរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន បានទទួលស្គាល់ចំណុចខ្សោយរបស់ខ្លួន ដែលធ្វើឲ្យចំនូនអ្នកប្រើប្រាស់គ្រឿងញៀន នៅតែបន្ត មានដូចជា៖ ការរីករាលដាលនៃការប្រើប្រាស់គ្រឿងញៀនពីទីក្រុងទៅជនបទ ខ្លឹមសារនៃសារអប់រំអាចនៅមិនទាន់មានភាពទាក់ទាញ ចំពោះមហាជនទូទៅ ឬ អាចទៅមិនដល់ក្រុមជនគោលដៅងាយប្រឈមខ្ពស់នឹងគ្រោះថ្នាក់ ពិសេសការផ្សព្វផ្សាយនៅតាមសាលារៀន មិនទៅដល់ក្រុមគោលដៅជាសិស្សគេចម៉ោងសិក្សា ឬ សាលារៀន ដោយសិស្សដែលចូលរួមយុទ្ធនាការផ្សព្វផ្សាយអប់រំភាគច្រើនគឺជាសិស្សដែលមិនជាប់ពាក់ព័ន្ធនឹងគ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ