លោកស៊ុន ចាន់ថុល ត្រៀមខ្លួនរួចហើយសម្រាប់កំណែទម្រង់នៅក្រសួងសាធារណការ និងដឹកជញ្ជូន
លោកស៊ុន ចាន់ថុល រដ្ឋមន្ត្រីក្រសួងពាណិជ្ជកម្មបច្ចុប្បន្ន ហើយដែលនឹងត្រូវផ្លាស់ទៅកាន់ក្រសួងសាធារណការ និងដឹកជញ្ជូននៅក្នុងពេលឆាប់ៗខាងមុខនេះ បានប្រកាសពីការបេ្តជ្ញាចិត្តរបស់លោកក្នុងការធ្វើកំណែទម្រង់នៅក្រសួងថ្មី ឲ្យកាន់តែល្អប្រសើរឡើងសម្រាប់ប្រជាពលរដ្ឋកម្ពុជា។ ការប្រកាសនេះត្រូវបានធ្វើឡើងនៅក្នុងឱកាសសិក្ខាសាលាជាស៊េរី ស្តីពីវេទិការពិភាក្សាអំពីវិស័យពាណិជ្ជកម្ម និងអប់រំនៅកម្ពុជាបច្ចុប្បន្ន នៅវិទ្យាស្ថានបច្ចេកវិទ្យាកម្ពុជា ឬតិចណូ នៅព្រឹកថ្ងៃទី ១៩ មីនានេះ។
ចុះផ្សាយនៅថ្ងៃ៖
ស្តាប់ - ០៣:១៦
លោកស៊ុន ចាន់ថុល រដ្ឋមន្ត្រីក្រសួងពាណិជ្ជកម្មដែលល្បីឈ្មោះ ខាងធ្វើកំណែទម្រង់ស៊ីជម្រៅ និងចូលរួមកាត់បន្ថយ អំពើពុករលួយនៅក្រសួងតាមរយៈពេលការបង្កើតការចុះបញ្ជីពាណិជ្ជកម្មតាមរយៈប្រព័ន្ធអនឡាញនោះ ត្រូវបានរដ្ឋាភិបាលកម្ពុជាសម្រេចផ្លាស់ប្តូរលោកទៅកាន់នៅក្រសួងថ្មីវិញ គឺក្រសួងសាធារណការ និងដឹកជញ្ជូននៅពេលដ៏ខ្លីខាងមុខនេះ។
ឆ្លើយតបនឹងសំណួររបស់អ្នកសារព័ត៌មាន លោកស៊ុន ចាន់ថុល បានបញ្ជាក់ថា លោកនឹងបេ្តជ្ញាចិត្តធ្វើកំណែទម្រង់នៅក្នុងក្រសួងថ្មី ហើយជាពិសេសធ្វើយ៉ាងណា សម្រួលសេវាសាធារណៈជូនដល់ប្រជាពលរដ្ឋឲ្យបានកាន់តែប្រសើរឡើង។ ហើយលោកក៏សុំឲ្យប្រជាពលរដ្ឋទុកពេលវេលាខ្លះ សម្រាប់លោកក្នុងការធ្វើកំណែទម្រង់ថ្មីផងដែរ។
គួររំលឹកជូនផងដែរថា សមាសភាពក្បាលម៉ាស៊ីនថ្មីរដ្ឋាភិបាលលោកហ៊ុន សែន ត្រូវបានទម្លាយជាសាធារណៈ កាលពីថ្ងៃទី ១៨ មីនាតាមរយៈទំព័រហ្វេសប៊ុករបស់អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន។ សមាសភាពរដ្ឋមន្ត្រីថ្មីទាំងនោះ គឺស្ថិតក្នុងសេចក្តីស្នើរបស់លោកនាយករដ្ឋមន្ត្រីហ៊ុន សែន សម្រាប់រដ្ឋសភាធ្វើការអនុម័ត។ ក្នុងនោះមានការផ្លាស់ប្តូររដ្ឋមន្ត្រីចំនួន៦រូប ដែលក្នុងនោះលោក ស៊ុន ចាន់ថុល ដែលកន្លងមកជារដ្ឋមន្ត្រីក្រសួងពាណិជ្ជកម្ម ត្រូវបានតែងតាំងជារដ្ឋមន្ត្រីក្រសួងសាធារណការ និងដឹកជញ្ជូន។ លោក ត្រាំ អ៊ីវតឹក ដែលកន្លងមកជារដ្ឋមន្ត្រីក្រសួងសាធារណការ និងដឹកជញ្ជូន ត្រូវបានតែងតាំងជារដ្ឋមន្ត្រីក្រសួងប្រៃសណីយ៍ និងទូរគមនាគមន៍។ លោក ប្រាក់ សុខុន ដែលកន្លងមកជារដ្ឋមន្ត្រីក្រសួងប្រៃសណីយ៍ ត្រូវបានតែងតាំងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជំនួសលោក ហោ ណាំហុង។ លោក ជា សុផារ៉ា ដែលកន្លងមកជារដ្ឋមន្ដ្រីក្រសួងអភិវឌ្ឍន៍ជនបទ ត្រូវបានតែងតាំងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។ លោក អ៊ុក រ៉ាប៊ុន ដែលកន្លងមកជារដ្ឋមន្ត្រីក្រសួងកសិកម្ម ត្រូវបានតែងតាំងជារដ្ឋមន្ត្រីក្រសួងអភិវឌ្ឍន៍ជនបទ និង លោក មិន ឃិន ដែលកន្លងមកជារដ្ឋមន្ត្រីក្រសួងធម្មការ ត្រូវបានតែងតាំងជាទេសរដ្ឋមន្ត្រី។ នេះបើតាមសេចក្តីស្នើរបស់លោកហ៊ុន សែន កាលពីថ្ងៃទី១៦ ខែមីនាដាក់ជូនប្រធានរដ្ឋសភាលោក ហេង សំរិន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ