ស៊ុន ឆៃ៖ បក្សសង្គ្រោះជាតិមិនពាក់ព័ន្ធក្នុងការធ្វើបាតុកម្មនៅបរទេស
ក្រោយមានការចាប់ខ្លួនប្រធានគណបក្សសង្គ្រោះជាតិ កាលពីដើមសប្ដាហ៍នេះ អ្នកគាំទ្របក្សនេះនៅបរទេសកំពុងរៀបចំធ្វើបាតុកម្មទាមទាររដ្ឋាភិបាលឲ្យមានការដោះលែងលោក កឹម សុខា វិញជាបន្ទាន់។ សកម្មជនទាំងនោះបានអះអាងថា ការចាប់ខ្លួនលោក កឹម សុខា ជារឿងនយោបាយសុទ្ធសាធ។ បាតុកម្មរបស់សកម្មជនទាំងនោះ ត្រូវបានថ្នាក់ដឹកនាំគណប្សសង្គ្រោះជាតិក្នុងទីក្រុងភ្នំពេញបដិសេធថា មិនបានជាប់ពាក់ព័ន្ធជាមួយគណបក្សសង្គ្រោះជាតិនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
កូនស្រីពៅលោកកឹម សុខា គឺកញ្ញា កឹម សម្មាធីតា បញ្ជាក់ថា សកម្មជនគាំទ្រគណបក្សសង្គ្រោះជាតិ នៅក្រៅប្រទេសយ៉ាងហោចណាស់៧ ប្រទេសបានប្រកាសធ្វើបាតុកម្មដើម្បីទាមទារឲ្យមានការដោះលែងលោកកឹម សុខា។ តាមរយៈទំព័រហ្វេសប៊ុក កញ្ញា កឹម សម្មាធីតា បានឲ្យដឹងថា បាតុកម្មទាំងនោះ នឹងរៀបចំធ្វើនៅអូស្ត្រាលី កាណាដា បារាំង និងអាឡឺម៉ង់ នៅថ្ងៃទី៩កញ្ញា។ នៅរដ្ឋមួយចំនួននៃសហរដ្ឋអាមេរិក នៅថ្ងៃទី១០ និង១៥កញ្ញា។ នៅប្រទេសណូវែលហ្សេឡង់ ថ្ងៃទី១៦កញ្ញា។ និងនៅប្រទេសប៊ែលហ្ស៊ិក នៅថ្ងៃទី១៨កញ្ញា។
លោក ស៊ុន ឆៃ បានប្រាប់វិទ្យុបារាំងអន្ដរជាតិនៅថ្ងៃនេះថា ថ្នាក់ដឹកនាំគណបក្សសង្គ្រោះជាតិក្រុងភ្នំពេញ មិនបានដឹង ឬមានការពាក់ព័ន្ធការធ្វើបាតុកម្មរបស់ប្រជាពលរដ្ឋនៅបរទេសនោះទេ។ លោកបន្ដថា ការធ្វើបាតុកម្មទាំងនោះជាសិទ្ធិរបស់ពួកគេ បើទោះបីជាមានការប្រើប្រាស់ទង់ ឬបដាដែលមានរូបសញ្ញាបក្សសង្គ្រោះជាតិក៏ដោយ។
ដូចគ្នាដែរ លោក ផៃ ស៊ីផាន វិញ បានចាត់ទុកថា បាតុកម្មទាំងនោះ ជាសិទ្ធិសេរីភាពរបស់ពលរដ្ឋ។ យ៉ាងណាក៏ដោយ បើតាម លោក ផៃ ស៊ីផាន បាតុកម្មទាំងនោះ មិនអាចមានឥទ្ធិពលមកលើអំណាចតុលាការកម្ពុជាឡើយ។ ចំពោះអ្នកនាំពាក្យរដ្ឋាភិបាលរូបនេះ បាតុកម្មទាំងនោះជាសកម្មភាពនយោបាយរបស់កូនស្រីលោក កឹម សុខា ដើម្បីស្វែងរកដំណោះស្រាយជូនឪពុក។ ប៉ុន្ដែលោកថា វាអាចជាបន្ទុកបន្ថែមទៅលើលោក កឹម សុខា ទៅវិញ។ អ្នកនាំពាក្យរូបនេះ ក៏ផ្ដល់ជាអនុសាសន៍ថា ប្រជាពលរដ្ឋទាំងនោះគួរស្វែងរកមេធាវីឆ្នើមទៅការពារលោកកឹម សុខា តាមផ្លូវតុលាការប្រសើរជាង នាំគ្នាបាតុកម្ម។
ចំណែកលោក ហុង លីម តំណាងរាស្ត្រអូស្ត្រាលីមានដើមកំណើតខ្មែរ ដែលនឹងចូលរួមធ្វើបាតុកម្មនៅប្រទេសអូស្ត្រាលីនៅថ្ងៃទី ០៩ កញ្ញា ស្អែក យល់ថា បាតុកម្មនេះ ទំនងជាមិនជះឥទ្ធិពលដល់ការសម្រេចចិត្តរបស់រដ្ឋាភិបាលខ្មែរទេ។ ប៉ុន្តែលោកបញ្ជាក់ថា វានឹងបង្ហាញទៅកាន់សហគមន៍អន្ដរជាតិថា ពលរដ្ឋខ្មែរនៅបរទេសមិនអាចទទួលយកបានទេ ការចាប់ខ្លួនលោក កឹម សុខា ដោយសារបទល្មើសក្បត់ជាតិនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ