តុលាការកំពូលរក្សាការសម្រេចមិនឲ្យលោកហ៊ុន សែនមកតទល់ក្តីនឹងលោកគឹម សុខនៅក្នុងតុលាការ
តុលាការកំពូលនៅព្រឹកមិញនេះ បានសម្រេចទាត់ចោលបណ្តឹងជំទាស់សុំនៅក្រៅឃុំរបស់លោក គឹម សុខ និងបានទាត់ចោលបណ្តឹងជំទាស់ការមិនអនុញ្ញាតឲ្យដើមបណ្តឹងគឺលោកនាយករដ្ឋមន្ត្រីហ៊ុន សែនមកតទល់ក្តីនៅក្នុងតុលាការតាមការស្នើសុំរបស់លោគឹម សុខ។ តុលាការកំពូលបានចាត់ទុកការសម្រេចរបស់សាលាដំបូងរាជធានីភ្នំពេញលើបណ្តឹងទាំងពីរនេះថា ត្រឹមត្រូវហើយចាត់ទុកជាបានការ។
ចុះផ្សាយនៅថ្ងៃ៖
ស្តាប់ - ០២:៤៤
លោកគី តិច មេធាវីតំណាងឲ្យលោកនាយករដ្ឋមន្ត្រីហ៊ុន សែន បានអះអាងថា មូលហេតុដែលតុលាការកំពូលទាត់ចោលបណ្តឹងជំទាស់ចំពោះការមិនអនុញ្ញាតឲ្យលោកគឹម សុខ បាននៅក្រៅឃុំ គឺដើម្បីការពារមិនឲ្យជនជាប់ចោទរូបនេះ បង្កើតបទល្មើសបន្ថែមទៀត និងបង្កបញ្ហាធ្វើឲ្យចលាចនៅក្នុងសង្គម។ បើតាមលោកគី តិច លោកគឹម សុខ ធ្លាប់បានបង្កបញ្ហាជាច្រើនមកហើយដូចជាការមកកាន់តុលាការក្រុងភ្នំពេញដំបូង លោកគឹម សុខ បាននាំប្រជាពលរដ្ឋជាច្រើនមកជាមួយបង្កឲ្យបរិយាកាសអាប់អួរ។ លោកគឹម សុខ ក៏ធ្លាប់បានចោទថា លោកនាយករដ្ឋមន្ត្រីហ៊ុន សែន បានបញ្ជូនមនុស្សទៅបញ្ចុះបញ្ចូលលោកឲ្យសុំទោសហើយថែមទាំងគំរាមកំហែងដាក់គុកងងឹតទៀត។ ទាំងនេះហើយដែលលោកគី តិច បង្ហាញជាការបង្កើតឲ្យមានបញ្ហាចលាចល។
ចំពោះរឿងនេះ លោកជួង ជូងីមេធាវីការពារលោកគឹម សុខ បានះអាងថាតបវិញថា លោកគឹម សុខ ពុំមានអំណាច ឬឥទ្ធិពលធ្វើឲ្យចលាចលក្នុងសង្គមនោះទេ។ សម្រាប់លោកជួង ជូងី ការទាត់ចោលរបស់តុលាការកំពូលនេះគឺមិនយុត្តិធម៌និងផ្ដល់ការឈឺចាប់ទៅដល់កូនក្តីរបស់លោក។ លោកថា កាលណាតុលាការអត់ទាន់ចេញសេចក្ដីសម្រេចជាស្ថាពរថា គាត់មានទោសឬក៏យ៉ាងណានោះ ផ្លូវច្បាប់អាចឲ្យគាត់នៅក្រៅឃុំបាន។
ដោយឡែក ចំពោះការបដិសេធបណ្តឹងជំទាស់ការមិនអនុញ្ញាតឲ្យលោកហ៊ុន សែនមកតទល់ក្តីនៅក្នុងតុលាការវិញ លោកមេធាវីគី តិចបានបញ្ជាក់ថា គឺដោយសារតែការស្នើសុំមិនច្បាស់លាស់និងមិនត្រឹមត្រូវតាមច្បាប់ និយាយជារួម គឺការស្នើសុំនោះគ្មានសំអាងហេតុតែម្តង។ ផ្ទុយទៅវិញ លោកជួង ជូងី បានចាត់ទុកការទាត់ចោលបណ្តឹងជំទាស់ការមិនអនុញ្ញាតឲ្យលោកហ៊ុន សែនមកតទល់ក្តីនៅក្នុងតុលាការនេះថា គឺមិនបង្ហាញនូវតម្លាភាពនិងមិនបង្ហាញនូវភាពយុត្តិធម៌សម្រាប់លោកគឹម សុខ។ បើតាមមេធាវីរូបនេះ តុលាការកំពូលបានរឹតត្បឹតការនិយាយរបស់លោកគឹម សុខនៅក្នុងតុលាការដោយលោកគឹម សុខ បានលើកពីសំអាងហេតុបានតែ៤ចំណុចធំៗប៉ុណ្ណោះ ខណៈសំអាងហេតុមានដល់ទៅ៦ចំណុចឯណេះ ហើយចុងក្រោយតុលាការបែរជាថា មិនច្បាស់លាស់ ឬក៏មិនមានសំអាងហេតុទៅវិញ។
សូមបញ្ជាក់ថា លោក គឹម សុខ អ្នកឃ្លាំមើលបញ្ហានយោបាយនិងសង្គម ត្រូវបានតុលាការឃុំខ្លួននៅក្នុងពន្ធនាគារតាំងពីកាលពីខែមីនា។ លោកគឹម សុខ ត្រូវបានលោកនាយកមន្ត្រីហ៊ុន សែន ប្តឹងពីបទញុះញង់បង្កឲ្យមានមានភាពវឹកវរដល់សង្គម ហើយទាមទារសំណងជំងឺចិត្ត៥០ម៉ឺនដុល្លារអាមេរិក បន្ទាប់ពីអ្នកឃ្លាំមើលបញ្ហានយោបាយ និងសង្គមរូបនេះ បានអត្ថាធិប្បាយថា គណបក្សប្រជាជនកម្ពុជាអ្នកនៅពីក្រោយឃាតកម្មលោកបណ្ឌិតកែម ឡី។ បន្ថែមលើនេះ លោកហ៊ុន សែន ក៏បានប្តឹងលោកគឹម សុខ ពី«បទបរិហារកេរ្តិ៍ជាសាធារណៈ»ទៀតដែរ ក្រោយពីលោកបានចោទរដ្ឋាភិបាលបច្ចុប្បន្នថា បានបង្កើតឲ្យមានប្រព័ន្ធមួយដែលមានការសម្លាប់មនុស្សហើយរកមុខឃាតករមិនឃើញ។ ចំពោះករណីនេះ លោកហ៊ុន សែន បានទាមទារសំណងជំងឺចិត្តចំនួន១០លានរៀល ដែលស្មើនឹង២ពាន់៥រយដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ