រដ្ឋាភិបាលបង្គាប់ឲ្យលោកស្រីស៊ុយ សុផាន ចូលខ្លួនដោះស្រាយបញ្ហាជម្លោះដីធ្លីនៅភ្នំពេញនិងខេត្តកណ្តាល
រដ្ឋាភិបាលកម្ពុជាតាមរយៈលិខិតចុះថ្ងៃទី ២ខែកុម្ភៈឆ្នាំ២០១៧ បានយល់ព្រមឲ្យក្រសួងដែនដីនិងនគរូបនីយកម្ម និងសំណង់ កោះហៅ លោកស្រី ស៊ុយ សុផាន ប្រធានក្រុមហ៊ុនផានអ៊ីម៉ិចចូលខ្លួនមកដោះស្រាយបញ្ហាជម្លោះដីធ្លីជាមួយប្រជាពលរដ្ឋប្រមាណចំនួន ៥៥៦ គ្រួសារ ស្ថិតនៅក្នុងខណ្ឌច្បារអំពៅក្រុងភ្នំពេញ និងខេត្តកណ្តាល។ លោកស្រី ស៊ុយ សុផាន ដែលគេដឹងថា ជាម្ចាស់អភិវឌ្ឍន៍តំបន់បុរីកីឡា ដែលមានជម្លោះរហូតមកទល់នឹងសព្វថ្ងៃ។
ចុះផ្សាយនៅថ្ងៃ៖
ស្តាប់ - ០២:០៣
យោងតាមលិខិតរបស់ទីស្តីការគណៈរដ្ឋមន្រ្តី ចុះថ្ងៃទី ២ ខែកុម្ភៈ ឆ្នាំ២០១៧ ផ្ញើជូនលោកទេសរដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដីនគរូបនីយកម្ម និងសំណង់ មិនបានបញ្ជាក់ថា តើការបង្គាប់ឲ្យលោកស្រី ស៊ុយ សុផាន ចូលខ្លួនទៅដោះស្រាយរឿងដីធ្លីជាច្រើនកន្លែងស្ថិតនៅក្នុងខណ្ឌច្បារអំពៅក្រុងភ្នំពេញ និងស្រុកពញាឮខេត្តកណ្តាលនោះ នឹងធ្វើឡើងនៅពេលណានោះទេ។ ក៏ប៉ុន្តែបានបង្គាប់ឲ្យលោកស្រី ស៊ុយ សុផាន ដែលគេដឹងថា ជាប្រធានក្រុមហ៊ុនផានអ៊ីម៉ិចនោះ ចូលខ្លួនទៅដោះស្រាយជាមួយប្រជាពលរដ្ឋ និងជាមួយអាជ្ញាធរមានសមត្ថកិច្ច ប្រកបដោយសុឆន្ទៈ និងស្មារតីទទួលខុសត្រូវ ដើម្បីបញ្ចប់វិវាទដីធ្លីទាំងនោះ។ យោងតាមលិខិតរបស់ទីស្តីការគណៈរដ្ឋមន្រ្តី ចុះថ្ងៃទី ២ ខែកុម្ភៈ ឆ្នាំ២០១៧ ក៏បានបង្គាប់ឲ្យរដ្ឋបាលសុរិយោដី ផ្អាកការចុះបញ្ជី ឬធ្វើការផ្ទេរដី ដែលមិនទាន់ដោះស្រាយផងដែរ ដើម្បីចៀសវាងធ្វើឲ្យវិវាទកាន់តែរីករាលដាលតទៅទៀត។
បើផ្អែកតាមរបាយការណ៍របស់ក្រសួងដែនដី នគរូបនីយកម្ម និងសំណង់បានរកឃើញថា ពលរដ្ឋប្រមាណជាង ៤០០ គ្រួសារនៅខណ្ឌច្បារអំពៅ បានប្ដឹងក្រុមហ៊ុនផានអ៊ីម៉ិច ដែលរំលោភយកដីពួកគាត់ រំលោភយកផ្លូវសាធារណៈមកធ្វើជាកម្មសិទ្ធិរបស់ក្រុមហ៊ុន និងលួចធ្វើប័ណ្ណខុសប្រក្រតីជាដើម។ ចំណែកដីពលរដ្ឋជាង ៩០គ្រួសារ ស្ថិតនៅក្នុងស្រុកពញាឮ ខេត្តកណ្ដាលវិញ បានប្ដឹងក្រុមហ៊ុន ផានអ៊ីម៉ិច ថាបានក្លែងបន្លំឯកសារកែប្រែប័ណ្ណសម្គាល់សិទ្ធិកាន់កាប់អចលនវត្ថុរបស់ប្រជាពលរដ្ឋ។
គួរជម្រាបជូនថា លោកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច ដែលស្និទ្ធិនឹងរដ្ឋាភិបាលកម្ពុជា ក៏ធ្លាប់មានរឿងរ៉ាវជម្លោះដីធ្លី និងការបណ្តេញប្រជាពលរដ្ឋចេញពីបុរីកីឡានៅចំកណ្តាលទីក្រុងភ្នំពេញកាលពីឆ្នាំ ២០១២ផងដែរ។ ការបណ្តេញប្រជាពលរដ្ឋចេញពីតំបន់បុរីកីឡាក្រោមពាក្យអភិវឌ្ឍន៍នៅនឹងកន្លែងនោះ បានបន្សល់ទុកនូវការតវ៉ារបស់ប្រជាពលរដ្ឋ ១៥៦គ្រួសារ ដែលនៅមិនទាន់ទទួលបានសំណងមកទល់នឹងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ