ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 18/07 00h00 GMT
  • 06h00 - 07h00 GMT
    កម្មវិធីព័ត៌មាន 18/07 06h00 GMT
  • 12h00 - 13h00 GMT
    កម្មវិធីព័ត៌មាន 18/07 12h00 GMT
កម្ពុជា

​ច្បាប់​គ្រប់​គ្រង​ការ​ធ្វើ​អាជីវកម្ម​តាម​អន​ឡាញ​ត្រូវ​បាន​រដ្ឋា​ភិបាល​កម្ពុជា​បាន​អនុម័ត​ជា​ផ្លូវ​ការ​នៅ​ថ្ងៃ​នេះ​

media  
ការលក់ទំនិញអនឡាញជាទូទៅ (រូបភាពតំណាង) @FB

លោក​នាយក​រដ្ឋ​មន្រ្តី​ហ៊ុន សែន នៅ​ព្រឹក​ថ្ងៃ​សុក្រ​នេះ បាន​ដឹក​នាំ​ប្រជុំ​គណៈ​រដ្ឋ​មន្រ្តី​កម្ពុជា ដើម្បី​ពិនិត្យ និង​អនុម័ត​លើ​សេចក្តី​ព្រាង​ច្បាប់​ចំនួន៣ និង គម្រោង​វិនិយោគ​ក្នុង​វិស័យ​អគ្គិសនី​មួយ​គម្រោង​។ សេចក្តី​ព្រាង​ច្បាប់ និង​គម្រោង​វិនិយោគ​ទាំង​នេះ សុទ្ធ​តែ​ត្រូវ​បាន​អនុម័ត​រួច​ហើយ​នៅ​ព្រឹក​នេះ​។ ក្នុង​នោះ​ក៏​មាន​ដែរ សេចក្តី​ព្រាង​ច្បាប់​ស្ដី “ពាណិជ្ជកម្ម​តាម​ប្រព័ន្ធ​អេឡិច​ត្រូនិច”ដែល​ជា​ច្បាប់​គ្រប់​គ្រង​លើ​ការ​ធ្វើ​អាជីវកម្ម​តាម​អនឡាញ​។ 

សេចក្តី​ច្បាប់​ស្ដី “ពាណិជ្ជ​កម្ម​តាម​ប្រព័ន្ធ​អេឡិច​ត្រូនិច” ឬ E-Commerce law គឺ​ជា​ច្បាប់​សម្រាប់​គ្រប់​គ្រង​ទៅ​លើ​រាល់​សកម្មភាព​ទិញ​លក់​ទំនិញ និង​ទូទាត់​សេវា​កម្ម​តាម​រយៈ​ប្រព័ន្ធ​អ៊ិន​ធើ​ណេត ដែល​អាច​នាំ​មក​នូវ​កាលានុវត្ត​ភាព​អាជីវកម្ម​ថ្មីៗ​យ៉ាង​ច្រើន​សម្រាប់​សហ​គ្រិន​វ័យ​ក្មេង​នៅ​កម្ពុជា​ក្នុង​ការ​ចូល​រួម​ពង្រីក​កំណើន​សេដ្ឋ​កិច្ច​ជាតិ​។ សេចក្តី​ព្រាង​ច្បាប់​ថ្មី​នេះ មាន​១២​ជំពូក និង​ចែក​ចេញ​ជា ៩០​មាត្រា ហើយ​ត្រូវ​បាន​រដ្ឋា​ភិបាល​អនុម័ត​ជា​ផ្លូវ​ការ​នៅ​ព្រឹក​ថ្ងៃ​សុក្រ​នេះ និង បញ្ជូន​បន្ត​ទៅ​កាន់​រដ្ឋ​សភា​ជាតិ ដើម្បី​ធ្វើ​ការ​ពិនិត្យ និង​អនុម័ត​ឱ្យ​ប្រើ​ប្រាស់​ជា​ធរមាន​នា​ពេល​ខាង​មុខ​នេះ​។

សេចក្តី​ព្រាង​ច្បាប់​នេះ ត្រូវ​បាន​រៀប​ចំ​តាក់​តែង​ឡើង​ដំបូង​ដោយ​ក្រុម​ការងារ​របស់​ក្រសួង​ពាណិជ្ជកម្ម ដោយ មាន​ការ​ជួយ​ឧបត្ថម្ភ​ពី​អ្នក​ជំនាញ​ការ​របស់​ធនាគារ​ពិភព​លោក​(World Bank) ក្នុង​ឆ្នាំ​២០១២ និង​ពី​ជំនាញ​ការ​ជាតិ​ក្នុង​ឆ្នាំ​២០១៤​។ នៅ​ក្នុង​ឆ្នាំ​២០១៦ ធនាគារ​អភិវឌ្ឍន៍​អាស៊ី(ADB)ក៏​បាន​ផ្ដល់​ជំនួយ​បច្ចេកទេស និង​ជំនាញ​ការ​ឱ្យ​ជួយ​ផ្ដល់​យោបល់​លើ​សេចក្ដី​ព្រាង​ច្បាប់​នេះ​ជា​បន្ត​បន្ទាប់​ផង​ដែរ​។ នេះ​បើ​តាម​ការ​បញ្ជាក់​ឱ្យ​ដឹង​ពី​ក្រសួង​ពាណិជ្ជ​កម្ម​កម្ពុជា​។

ក្រសួង​ពាណិជ្ជកម្ម​កម្ពុជា ក៏​បាន​បញ្ជាក់​ឱ្យ​ដឹង​ទៀត​ថា ច្បាប់​ស្ដី​ពី “ពាណិជ្ជកម្ម​តាម​ប្រព័ន្ធ​អេឡិច​ត្រូនិក” នឹង​ផ្ដល់​វិធាន​ជា​មូល​ដ្ឋាន​ដ៏​សំខាន់​ក្នុង​ការ​ជំរុញ​ពាណិជ្ជ​កម្ម​តាម​ប្រព័ន្ធ​អេឡិច​ត្រូនិក​ក្នុង និង​ក្រៅ​ប្រទេស​ប្រកប​ដោយ​ទំនុក​ចិត្ត​តាម​រយៈការ​ទទួល​ស្គាល់​សុពល​ភាព អានុ​ភាព ភាព​អាច​អនុវត្ត​បាន និង​ភាព​អាច​ទទួល​យក​បាន​នៃ​ទំនាក់​ទំនង​អេឡិច​ត្រូនិក កំណត់ត្រា​អេឡិច​ត្រូនិក និង​កិច្ច​សន្យា​តាម​ប្រព័ន្ធ​អេឡិច​ត្រូនិក ព្រម​ទាំង​មាន​ការ​ទទួល​ស្គាល់​យថា​ភូត​ភាព​នៃ​កំណត់​ត្រា​អេឡិច​ត្រូនិក និង​ហត្ថលេខា​អេឡិច​ត្រូនិក ដែល​កំណត់​ដោយ​បច្ចេក​វិទ្យា និង​គ្រប់​គ្រង​ដោយ​ស្ថាប័ន​រដ្ឋ​។

សម្រាប់​ក្រសួង​ពាណិជ្ជ​កម្ម ច្បាប់​នេះ​នឹង​រួម​ចំណែក​យ៉ាង​សកម្ម​ក្នុង​ការ​អភិវឌ្ឍ​សេដ្ឋ​កិច្ច​ឌីជីថល​នៅ​កម្ពុជា ដោយ​ហេតុ​ថា​ក្រប​ខណ្ឌ​ច្បាប់ និង​បទ​ដ្ឋាន​គតិ​យុត្ត​នានា ដែល​គាំទ្រ​ដល់​សកម្មភាព និង​ប្រតិបត្តិ​ការ​តាម​ប្រព័ន្ធ​អេឡិច​ត្រូនិក និង​ឌីជីថល ចាំ​បាច់​ត្រូវ​រៀប​ចំ​និង​ធ្វើ​បច្ចុប្បន្ន​ភាព ដើម្បី​អាច​បង្កើត​សេដ្ឋកិច្ច​ឌីជីថល​រឹង​មាំ​មួយ ព្រម​ទាំង​ត្រៀម​ទទួល​យក​នូវ​ការ​ឈាន​មក​ដល់​នៃ​បដិវត្តន៍​ឧស្សាហកម្ម​ទី៤​។ ជាង​នេះ​ទៅ​ទៀត ច្បាប់​នេះ​នឹង​ផ្ដល់​លទ្ធភាព​ឱ្យ​សហ​គ្រាស​ធុន​តូច និង​មធ្យម(SMEs) នៅ​កម្ពុជា​អាច​ភ្ជាប់​ខ្លួន​ទៅ​នឹង​ខ្សែ​សង្វាក់​ផលិត​កម្ម និង​ទីផ្សារ​ក្នុង​ស្រុក និង​អន្តរ​ជាតិ ក៏​ដូច​ជា​ជំរុញ​ឱ្យ​មាន​ការ​ច្នៃ​ប្រឌិត និង​ការ​បង្កើត​ទំនិញ និង​សេវា​ថ្មីៗ​បន្ថែម​ទៀត​ផង​ដែរ​៕

 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ