រដ្ឋាភិបាលគ្រោងដកពន្ធលើប្រាក់ខែចាប់ពី មួយលានរៀលឡើងទៅ នៅដើមឆ្នាំ ២០១៧
បើគ្មានអ្វីប្រែប្រួលទេ នៅដើមឆ្នាំ ២០១៧ រដ្ឋាភិបាលនឹងផ្តើមអនុគ្រោះការដកពន្ធលើប្រាក់បៀវត្សចាប់ពី មួយលានរៀល ឡើងទៅ ដើម្បីជួយលើកកម្ពស់ជីវភាពមន្រ្តីរាជការ គ្រូបង្រៀន និងកម្មករនិយោជិត ដែលមានចំណូលតិច។ សម្រាប់អ្នកវិភាគសេដ្ឋកិច្ចឯករាជ្យ លោក ចាន់ សុផល យល់ថា ការអនុគ្រោះពន្ធលើប្រាក់បៀវត្ស ពីមួយលានរៀលនេះ មិនមែនជារឿងថ្មីទេ ព្រោះជាការឆ្លើយតបនឹងអតិផរណាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
អគ្គនាយកនៃអគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ លោក គង់ វិបុល បានប្រាប់វិទ្យុបារាំងអន្តរជាតិ នៅថ្ងៃពុធ នេះថា ចាប់ពីថ្ងៃទី១ ខែមករា ឆ្នាំ២០១៧ តទៅ ក្រសួងនឹងផ្តើមអនុគ្រោះការដកហូតពន្ធលើប្រាក់ខែ សម្រាប់កម្មករ និយោជិត ដែលមានចំណូលលើសពី ១លានរៀល ឬ២៥០ដុល្លារសហរដ្ឋអាមេរិក នៅពេល រដ្ឋសភាអនុម័ត ច្បាប់ស្តីពីការគ្រប់គ្រងថវិកាជាតិឆ្នាំ២០១៧ រួចរាល់។ សេចក្តីព្រាងច្បាប់ថវិកាជាតិឆ្នាំ២០១៧ ដែលបានឆ្លងទីស្តីការគណៈរដ្ឋមន្រ្តី និងបញ្ជូនទៅរដ្ឋសភា ដើម្បីរងចាំអនុម័ត។
លោក គង់ វិបុល បានបន្ថែមថា ទោះបីជា រដ្ឋនឹងបាត់បង់ចំណូលខ្លះ តែរដ្ឋាភិបាលមានគោលដៅ ចង់លើកកម្ពស់ជីវភាពកម្មករ និយោជិត គ្រូបង្រៀន មន្រ្តីរាជការ តាមរយៈការអនុគ្រោះពន្ធលើប្រាក់ខែ លើសពីមួយលានរៀលនេះ។
ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ៨ វិច្ឆិកា បានចេញផ្សាយ ចំណូលពន្ធអាករប្រចាំខែតុលា ឆ្នាំ២០១៦ មានចំនួនជាង ១២៤.០៣ លានដុល្លារ ហើយចំណូលសរុប សម្រាប់រយៈពេល ១០ខែ ឆ្នាំ២០១៦ មានប្រមាណ ១៣១៥.២៩ លានដុល្លារ ស្មើនឹង ៩២.៥២% នៃគោលដៅកំណត់ដោយច្បាប់។ បើប្រៀបធៀបនឹងរយៈពេលដូចគ្នា ឆ្នាំ២០១៥ ចំណូលពន្ធអាករ គ្រប់ប្រភេទ កើនឡើង ២០.៨១% ឬស្មើនឹង ២២៦.៥៥ លានដុល្លារ។ ក្នុងនោះ ពន្ធលើប្រាក់បៀវត្ស កើនឡើង ២៤.៩% និងពន្ធលើប្រាក់ចំណេញ កើនឡើង ១៩.១%។
អ្នកវិភាគសេដ្ឋកិច្ចឯករាជ្យ លោក ចាន់ សុផល ចាត់ទុកថា ការអនុគ្រោះពន្ធលើប្រាក់បៀវត្ស ចាប់ពីមួយលានរៀល ដែលពីមុនគិតចាប់ពី ៥សែនរៀល ជារឿង សមហេតុសមផល និងស្រប តាមអតិផរណាបច្ចុប្បន្ន។ អ្នកវិភាគសេដ្ឋកិច្ចរូបនេះ យល់ថា ការអនុគ្រោះពន្ធលើប្រាក់ខែ នឹងជួយសម្រួលខ្លះដែរ ដល់មន្រ្តីរាជការ កម្មករ កម្មការនី គ្រូបង្រៀន បើទោះបីជា អ្នកមានប្រាក់ខែខ្ពស់ខ្លះ អាចត្រូវដកហូតពន្ធដល់ទៅ ២០% តាមអត្រាកំណើននៃប្រាក់បៀវត្ស។
លោក ចាន់ សុផល បានកត់សម្គាល់ថា ច្បាប់ថវិកាជាតិឆ្នាំ ២០១៧ អាចជា របត់ធំមួយ ដែលជម្រុញឲ្យ សហគ្រាសធុនតូច និងមធ្យម ដូរវប្បធម៌ បង់ពន្ធពីរបបម៉ៅការ មករៀនកត់ត្រាបញ្ជីចំណូលចំណាយ ឲ្យច្បាស់លាស់ នៅពេល ច្បាប់តម្រូវឲ្យ សហគ្រាស ដែលចុះបញ្ជីទាំងអស់ ត្រូវជាប់កាតព្វកិច្ចបង់ពន្ធ ដោយស្វ័យប្រកាស លើប្រាក់ចំណេញ ផលរបរ លើសពី ២៥០លានរៀល ក្នុងមួយឆ្នាំ។ យ៉ាងណាក៏ដោយ អ្នកវិភាគសេដ្ឋកិច្ច រូបនេះ បានសម្តែងបារម្ភពីការដកហូតពន្ធ ប្រសិនបើមិនស្មើភាពគ្នាទេ អាចនាំឲ្យមានការប្រកួតប្រជែងមិនស្មោះត្រង់ និងប៉ះពាល់ដល់ប្រសិទ្ធិភាពធុរកិច្ចក្នុងស្រុក។
គួររម្លឹកថា ការអនុគ្រោះពន្ធលើប្រាក់ខែនេះ ទំនងជាមិនរំញោច ដល់កម្មកររោងចក្រ កាត់ដេរ ជាង ៧០ម៉ឺននាក់ ដែលនឹងទទួលបានប្រាក់ឈ្នួលអប្បបរមា ១៥៣ដុល្លារ សហរដ្ឋអាមេរិក នៅដើមឆ្នាំ ២០១៧ ខណៈប្រាក់បៀវត្សរ៍អប្បបរមា របស់គ្រូបង្រៀន និងបុគ្គលិកអប់រំ ជាង ១០ម៉ឺននាក់ (១០៨៧៤១ នាក់ ក្នុងឆ្នាំសិក្សា២០១៥-២០១៦) នឹងកើនដល់ជិត ១ លានរៀល ក្នុងឆ្នាំ ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ