សង្គមស៊ីវិល សាទរចំពោះការសម្រេចដំឡើងពន្ធលើផលិតផលគ្រឿងស្រវឹង និងថ្នាំជក់
អង្គការចលនាដើម្បីសុខភាពកម្ពុជា ដែលធ្វើសកម្មភាពជំរុញឱ្យមានការត្រួតពិនិត្យថ្នាំជក់ និងគ្រឿងស្រវឹង បានសាទរចំពោះការសម្រេចដំឡើងពន្ធលើផលិតផលគ្រឿង ស្រវឹង និងថ្នាំជក់ របស់ក្រសួងសេដ្ឋកិច្ច និងហិរញ្ញវត្ថុ។ សូមបញ្ជាក់ថា បើតាមសេចក្តីជូនដំណឹងរបស់ក្រសួងសេដ្ឋកិច្ចនិងហិរញ្ញវត្ថុ ចាប់ពីថ្ងៃទី ១ ខែមេសា ខាងមុខនេះតទៅ ក្រសួងនឹងកែសម្រួលអាត្រាអាករពិសេសលើមុខទំនិញដែលផលិត និងផ្គត់ផ្គង់ក្នុងស្រុក ដូចជាស្រាបៀរ សុរា ឬស្រា និងបារីគ្រប់ប្រភេទ។សរ ពិសី រាយការណ៍៖
ចុះផ្សាយនៅថ្ងៃ៖
ស្តាប់ - ០២:១៧
អង្គការចលនាដើម្បីសុខភាពកម្ពុជា នៅថ្ងៃទី ២៣ មីនានេះ បានសាទរ និងស្វាគមន៍ចំពោះការសម្រេចរបស់រដ្ឋាភិបាលកម្ពុជា ក្នុងការកែសម្រូលអាត្រាអាករពិសេសលើមុខទំនិញនិងផ្គត់ផ្គង់ក្នុងស្រុក ដូចជា ផលិតផលថ្នាំជក់ និង គ្រឿងស្រវឹង ចាប់ពីថ្ងៃទី ០១ ខែ មេសា ខាងមុខនេះតទៅ។
សូមបញ្ជាក់ថា យោងតាមសេចក្តីជូនដំណឹងរបស់អគ្គនាយកដ្ឋានពន្ធដានៃក្រសួងសេដ្ឋកិច្ច និងហិរញ្ញវត្ថុ ចុះថ្ងៃទី ២២ ខែមីនា បញ្ជាក់ថា ក្រសួងនឹងធ្វើការដំឡើងពន្ធលើផលិតផលគ្រឿងស្រវឹង និងថ្នាំជក់ ដែលផលិត និងផ្គត់ផ្គង់នៅក្នុងស្រុក។ ដោយនៅក្នុងនោះ ៣០ភាគរយ លើមុខទំនិញស្រាបៀរគ្រប់ប្រភេទ ៣៥ % លើមុខទំនិញ សុរា (ស្រា) និង២០ ភាគរយ លើមុខទំនិញបារីគ្រប់ប្រភេទ។ បើប្រៀបធៀប កាលពីពេលកន្លងទៅ ពន្ធចំពោះផលិតផលស្រា ស្រាបៀរ មាន (២០%) និងបារី ត្រឹមតែ១៥% តែប៉ុណ្ណោះ។
បើតាមកញ្ញា ម៉ក់ ទេវិន្ទ ប្រធានគម្រោងអង្គការចលនាដើម្បីសុខភាពកម្ពុជា ការដំឡើងពន្ធលើផលិតផលគ្រឿងស្រវឹង និង ថ្នាំជក់ នឹងក្លាយជាចំណុចចាប់ផ្តើមដ៏មានប្រសិទ្ធិភាពមួយសម្រាប់កម្ពុជា ដើម្បីកាត់បន្ថយ និង ទប់ស្កាត់ ការពិសារផលិផលគ្រឿងស្រវឹង និង ថ្នាំជក់ នៅក្នុងចំណោម ប្រជាជនកម្ពុជា។ មានប្រសិទ្ធិភាព ដោយសារតែ វិធានការណ៍នេះ ត្រូវបានអនុវត្តនៅតាមបណ្តាប្រទេសជាច្រើន នៅលើពិភពលោក និង ទទួលបានលទ្ធផលជាវិជ្ជមាន។
តំណាងអង្គការចលនាដើម្បីសុខភាពកម្ពុជា យល់ឃើញថា ការធ្វើដូច្នេះ ក៏នឹងធ្វើឲ្យប្រាក់ចំណូលរបស់រដ្ឋមានការកើនឡើងផងដែរ តាមរយៈការយកពន្ធពីម្ចាស់ក្រុមហ៊ុន គ្រឿងស្រវឹង និងថ្នាំជក់ទាំងនោះ។
ទោះបីជាយ៉ាងណាក៏ដោយ ប្រធានគម្រោងអង្គការចលនាដើម្បីសុខភាពកម្ពុជា ដែលធ្វើការ តស៊ូមតិ ឲ្យមានការទប់ស្កាត់ និង កាត់បន្ថយ ការប្រើប្រាស់គ្រឿងស្រវឹង និង ថ្នាំជក់ បានសំណូមពរ ឲ្យមានការពន្លឿននូវដំណើការអនុម័តច្បាប់ស្តីពីការត្រួតពិនិត្យគ្រឿងស្រវឹង នៅកម្ពុជា ដើម្បីរួមចំណែកកាត់បន្ថយ ហានិភ័យគ្រោះថ្នាក់ដោយសារគ្រឿងស្រវឹង។
គួរជម្រាបជូនថា តាមរបាយការណ៍អង្គការសុខភាពពិភពលោក បង្ហាញថា នៅលើពិភពលោក ជារៀងរាល់ឆ្នាំ មានអ្នកស្លាប់ដោយសារតែការប្រើប្រាស់ផលិតផលថ្នាំជក់ជាងមួយលាននាក់ ដោយនៅក្នុងប្រទេសកម្ពុជា មានប្រជាជនប្រមាណជាង១ម៉ឺននាក់ បានបាត់បង់ជីវិតដោយសារតែការប្រើប្រាស់ថ្នាំជក់ ហើយក្នុង១ថ្ងៃមានពលរដ្ឋកម្ពុជាជិត៣០ នាក់បានស្លាប់ដោយសារការប្រើប្រាស់ថ្នាំជក់។
បន្ថែមពីលើការតំឡើងពន្ធ កាលពីពេលថ្មីៗនេះ រដ្ឋាភិបាលកម្ពុជា ក៏បានចេញនូវអនុក្រឹត្យស្ដីពី ការបោះពុម្ពសារព្រមាន សុខភាពជាភាសាខ្មែរ និងជារូបភាពនៅលើកញ្ចប់ផលិតផល បារី និង ថ្នាំជក់ នៅខែកក្កដា ឆ្នាំ២០១៦ខាងមុខនេះ។
នៅក្នុងអនុក្រឹត្យបានបញ្ជាក់ថា ការបោះពុម្ពសារព្រមានសុខភាពជារូបភាពលើ កញ្ចប់បារី គឺជាវិធីសាស្ត្រសង្គ្រោះជីវិតពលរដ្ឋកម្ពុជាពីផលប៉ះពាល់នៃការប្រើប្រាស់ថ្នាំជក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ