សមាគមគ្រូបង្រៀន៖ ការកែទម្រង់ប្រព័ន្ធប្រាក់បៀវត្សរ៍ថ្មី ធ្វើឲ្យមន្ត្រីរាជការចាស់ៗ បាត់បង់អតីតភាពការងារ
សមាគមគ្រូបង្រៀនកម្ពុជាឯករាជ្យ បានស្នើសុំលោកនាយករដ្ឋមន្ត្រី ហ៊ុនសែន ពិនិត្យឡើងវិញលើការកែទម្រង់ប្រព័ន្ធប្រាក់បៀវត្សរ៍មន្ត្រីរាជការ។ ការកែទម្រង់នោះ ត្រូវបានលោក រ៉ុងឈុន អះអាងថា ធ្វើឲ្យមន្ត្រីរាជការបម្រើការច្រើនឆ្នាំ បាត់បង់អតីតភាពការងារ។ ប៉ុន្តែតំណាងរាជរដ្ឋាភិបាល លោក ផៃស៊ីផាន បានបដិសេធ ហើយថា របបតម្លើងបៀវត្សរ៍ថ្មី ដែលជាការតម្លើងប្រាក់ខែដល់មន្ត្រីរាជការ ធ្វើឡើងតាមបែបវិទ្យាសាស្ត្រ និងដោយសមធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ក្នុងលិខិតជូនលោកនាយករដ្ឋមន្ត្រី ហ៊ុនសែន ចុះថ្ងៃទី៤កុម្ភៈ លោក រ៉ុងឈុន ប្រធានសមាគមគ្រូបង្រៀនកម្ពុជាឯករាជ្យ បានលើកឡើងថា ការធ្វើកំណែទម្រង់ប្រព័ន្ធបៀវត្សរ៍ គឺមានកំហុស ដែលធ្វើឲ្យមន្ត្រីរាជការ បានបម្រើការងារច្រើនឆ្នាំ បាត់បង់អតីតភាពការងាររបស់ពួកគាត់។
សមាគមគ្រូបង្រៀន បានពន្យល់ថា តាមការកែទម្រង់ប្រព័ន្ធប្រាក់បៀវត្សរ៍ គឺប្រភេទក្របខណ្ឌ គ៣.១៤ ដែលជាក្របខណ្ឌចាស់ កែទម្រង់ទៅប្រភេទក្របខណ្ឌ គ៩ ដែលជាក្របខណ្ឌថ្មី ដែលមន្ត្រីរាជការទើបចេញបម្រើការងារ បានទទួលប្រភេទក្របខណ្ឌ គ៩ ដូចគ្នា។ ពោលគឺអ្នកទើបចូលធ្វើការ ជាមន្ត្រីរាជការ ត្រូវទទួលបានប្រាក់ខែ ស្មើនឹងអ្នកបម្រើការងារ ជាមន្ត្រីរាជការរយៈពេល ២០ ឆ្នាំ។ ប្រាក់ខែមូលដ្ឋានរបស់មន្ត្រីរាជការ ក្នុងកំណែទម្រង់ថ្មីនេះ ទទួលបានជាង ៤១ ម៉ឺនរៀល ក្នុងមួយខែ។
តាមលោករ៉ុងឈុន មន្ត្រីរាជការប្រភេទក្របខណ្ឌ ក៣ និងខ៣ ក៏មានបញ្ហាដូចមន្ត្រីរាជការប្រភេទក្របខណ្ឌគ៣ ផងដែរ។ ដូច្នេះសមាគមគ្រូបង្រៀន សូមឲ្យលោកនាយករដ្ឋមន្ត្រី ធ្វើការកែតម្រូវលើការកែទម្រង់ប្រាក់បៀវត្សរ៍មន្ត្រីរាជការ ដើម្បីកុំឲ្យមន្ត្រីរាជការ បម្រើការច្រើនឆ្នាំ ប្រតិកម្ម មិនសប្បាយចិត្ត ចំពោះការបាត់បង់អតីតភាពការងារ។
ចំពោះការលើកឡើងខាងលើ ត្រូវបានលោក ផៃ ស៊ីផាន រដ្ឋលេខាធិការ និងជាអ្នកនាំពាក្យគណៈរដ្ឋមន្ត្រី ចាត់ទុកថា ជាការលើកឡើងមិនចំទិសដៅ និងមិនមានការគិតគូច្បាស់លាស់។ តាមលោកផៃស៊ីផាន របបបៀវត្សរ៍ថ្មី ដែលរដ្ឋាភិបាលបានតម្លើងប្រាក់ខែមន្ត្រីរាជការ ពិសេសគ្រូបង្រៀន នៅពេលនេះ គឺធ្វើឡើងតាមវិទ្យាសាស្ត្រ និងដោយសមធម៌។ ពោលគឺរដ្ឋាភិបាល កំណត់យកចំណុចកណ្តាល រវាងអ្នកមានប្រាក់ខែទាប និងអ្នកមានប្រាក់ខែខ្ពស់។
លោក ផៃស៊ីផាន ក៏បានបញ្ជាក់ថា រាជរដ្ឋាភិបាល បានគិតគូរួចហើយ លើការតម្លើងប្រាក់ខែមន្ត្រីរាជការ ពិសេសគ្រូបង្រៀន ឡើងឲ្យបាន ១ លានរៀល ឬ ២៥០ ដុល្លារ នៅឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ