ប្រជាជនកម្ពុជាឈូឆរជូនពរគ្រូបង្រៀនតាមរយៈបណ្ដាញសង្គម
ប្រជាជនកម្ពុជាបាននាំគ្នាផ្ញើសារ និងរូបភាពជូនពរគ្រូបង្រៀនជាបន្តបន្ទាប់ ក្នុងឱកាសដែលប្រទេសកម្ពុជា ក៏ដូចជាប្រទេសនានាក្នុងពិភពលោក ត្រៀមប្រារព្ធទិវាគ្រូបង្រៀនឆ្នាំ២០១៥។ ក្រោមប្រធានបទ«លើកកម្ពស់សក្ដានុពលគ្រូបង្រៀន ដើម្បីកសាងសង្គមប្រកបដោយនិរន្តរភាព» ទិវាគ្រូបង្រៀនពិភពលោក ដែលត្រូវនឹងថ្ងៃទី០៥ ខែតុលាស្អែក នឹងត្រូវក្រសួងអប់រំ យុវជន និងកីឡាកម្ពុជា រៀបចំធ្វើនៅថ្ងៃទី០៧ ខែតុលា។
ចុះផ្សាយនៅថ្ងៃ៖
ស្តាប់ - ០២:០០
ពេលនេះ នៅលើបណ្ដាញសង្គម ជាពិសេសហ្វេសប៊ុក សារ និងរូបថតជាច្រើន ត្រូវបានមហាជនផ្សាយ និងចែកចាយបន្ត ក្នុងន័យអបអរទិវាគ្រូបង្រៀនពិភពលោក ដែលត្រូវនឹងថ្ងៃទី០៥ ខែតុលា។ សារខ្លះមានទម្រង់ជាពាក្យរាយ ខ្លះជាកំណាព្យ ខ្លះជារូបភាព និងខ្លះទៀតជាភាពយន្តខ្លី ត្រូវបានក្រសួងអប់រំ យុវជន និងកីឡាកម្ពុជា ផ្សព្វផ្យាយបន្ត។
អ្នកប្រើប្រាស់បណ្ដាញសង្គមជាច្រើន ជូនពរ«វិស្វករព្រលឹង»ទាំងឡាយដែលមានគុណចំពោះពួកគេ និងដែលមានស្នាដៃក្នុងការស្ថាបនាសង្គមកម្ពុជា។ អ្នកខ្លះលើកកម្ពស់គុណូបការៈរបស់គ្រូបង្រៀនថា«ធ្ងន់ស្មើនឹងគុណរបស់ឪពុកម្តាយ» រីឯអ្នកខ្លះថា ខ្លួនបាន«ផុតអិវជ្ជាដ៏ក្រៀមក្រំ ខ្ពង់ខ្ពស់ឧត្តមក៏ព្រោះតែគ្រូ» ហើយអ្នកខ្លះទៀតក៏ថា«គ្រូមួយថ្ងៃ គ្រូមួយជីវិត» ឬ«រីករាយទិវាគ្រូបង្រៀនពិភពលោក»ជាដើម។
ស្របពេលដែលពិភពលោកនឹងប្រារព្ធទិវានេះនៅថ្ងៃទី០៥ ខែតុលា ក្រសួងអប់រំ យុវជន និងកីឡា បានប្រកាសតាំងពីថ្ងៃទី២៩ ខែកញ្ញាមកថា កម្ពុជាប្រារព្ធទិវាគ្រូបង្រៀនពិភពលោកឆ្នាំ២០១៥ នៅថ្ងៃទី០៧ ខែតុលា ក្នុងបរិវេណវិទ្យាស្ថានបច្ចេកវិទ្យាកម្ពុជា។
ក្រោមប្រធានបទ«លើកកម្ពស់សក្ដានុពលគ្រូបង្រៀន ដើម្បីកសាងសង្គមប្រកបដោយនិរន្តរភាព» ក្រសួងអប់រំកម្ពុជាបានបំផុសឱ្យសិស្សានុសិស្ស និស្សិត និងសាធារណជនទូទៅ ចូលរួមផ្ញើសារ ឬរូបភាព ដើម្បីជូនពរដល់លោកគ្រូ អ្នកគ្រូ និងសាស្ត្រាចារ្យ ក្នុងឱកាសនេះ។
ចាប់តាំងពីឆ្នាំ១៩៩៤មក អង្គការយូណេស្កូ (UNESCO) បានបង្កើតឱ្យមានទិវាគ្រូបង្រៀនពិភពលោកនេះឡើង។ បើតាមអង្គការនេះ គេទទួលស្គាល់ថាគ្រូបង្រៀនមិនមែនគ្រាន់តែជាមធ្យោបាយសម្រាប់អនុវត្តគោលដៅអប់រំប៉ុណ្ណោះទេ ពួកគេជាគន្លឹះនាំទៅកាន់និរន្តរភាព ក៏ដូចជាសមត្ថភាពរបស់ជាតិ ក្នុងការសម្រេចបាននូវសង្គមមនុស្សប្រកបដោយការសិក្សា និងការឆ្នៃប្រឌិត ដោយឈរលើចំណេះដឹង តម្លៃ និងក្រមសីលធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ