លោកTed Cruz ព្រមានជាថ្មីមិនឲ្យមន្រ្តីរដ្ឋាភិបាលកម្ពុជាជាន់ដីអាមេរិក បើមិនមានការដោះលែងលោកកឹម សុខា នៅថ្ងៃនេះ
នៅថ្ងៃទី៨ វិច្ឆិកាម្សិលមិញនៅអាមេរិក ត្រូវនឹងថ្ងៃទី៩វិច្ឆិកានៅកម្ពុជា លោក Ted Cruz សមាជិកព្រឹទ្ធសភាអាមេរិកមកពីគណបក្សសាធារណរដ្ឋ បានចេញលិខិតមួយទៅកាន់ស្ថានទូតកម្ពុជាជុំវិញបញ្ហាដោះលែងលោកកឹម សុខា។ ក្នុងលិខិតនោះ លោក Ted Cruz បានព្រមានជាថ្មីពីលទ្ធភាពក្នុងហាមឃាត់មិនឲ្យមន្រ្តីរដ្ឋាភិបាលកម្ពុជាចូលទឹកដីអាមេរិក ប្រសិនបើរដ្ឋាភិបាលខ្មែរមិនព្រមដោះលែងលោកកឹម សុខា នៅត្រឹមថ្ងៃនេះ។
ចុះផ្សាយនៅថ្ងៃ៖
ការព្រមានជាថ្មីរបស់លោកTed Cruz សមាជិកព្រឹទ្ធសភាអាមេរិកនេះ គឺជាការឆ្លើយតបទៅនឹងលិខិតបកស្រាយរបស់លោកជុំ ប៊ុនរ៉ុង ឯកអគ្គរាជទូតកម្ពុជាប្រចាំនៅអាមេរិកចំពោះបញ្ហាចាប់ខ្លួនលោកកឹម សុខាដាក់ពន្ធនាគារ។ លោកជុំ ប៊ុនរ៉ុង នៅក្នុងលិខិតតបទៅកាន់លោកTed Cruz កាលពីថ្ងៃអង្គារ បានគូសបញ្ជាក់ថា វាមិនយុត្តិធម៌ទាល់តែសោះដែលរដ្ឋាភិបាលកម្ពុជាត្រូវរងការរិះគន់ និងគំរាមកំហែងដោយវិធានការដាក់ទណ្ឌកម្មចំពោះការអនុវត្តច្បាប់របស់ខ្លួន ដើម្បីការពារសន្តិសុខ ឯករាជ្យភាព និងអធិបតេយ្យភាពរបស់ខ្លួនដូចប្រទេសដទៃទៀត។ សម្រាប់លោកឯកអគ្គរាជទូតកម្ពុជា ការចាប់ខ្លួនលោក កឹម សុខា និងការរំលាយគណបក្សសង្គ្រោះជាតិនាពេលខាងមុខ មិនមែនជាការបញ្ចប់នូវរបបពហុបក្ស និងប្រជាធិបតេយ្យនៅក្នុងប្រទេសកម្ពុជានោះទេ។
ជាការឆ្លើយតបវិញ លោកTed Cruz បានអះអាងថា ការប៉ុនប៉ងពីសំណាក់រដ្ឋាភិបាលកម្ពុជាគឺជាការព្រួយបារម្ភមួយយ៉ាងខ្លាំង។ សម្រាប់លោកTed Cruz ប្រសិនបើនៅថ្ងៃទី៩ វិច្ឆិកា លក្ខខណ្ឌជាក់លាក់មួយចំនួនមិនត្រូវបានឆ្លើយតប ដូចជាការដោះលែងលោកកឹម សុខា ការអនុញ្ញាតឲ្យស្ថានីយ៍វិទ្យុបន្តការផ្សាយរបស់ខ្លួន និងការអនុញ្ញាតឲ្យអង្គការប្រជាធិបតេយ្យធ្វើប្រតិបត្តិការនៅក្នុងប្រទេសកម្ពុជាទេនោះ វានឹងមិនអាចទៅរួចទេសម្រាប់អាមេរិក និងសម្ព័ន្ធមិត្តរបស់អាមេរិកក្នុងការទទួលស្គាល់នូវភាពស្របច្បាប់នៃការបោះឆ្នោតនៅកម្ពុជា។
បន្ថែមលើនេះ លោកTed Cruz ក៏បានព្រមានឲ្យលោកហ៊ុន សែន ត្រូវចាត់វិធានការមុនគេបង្អស់ និងធ្វើភ្លាមៗតែម្តង ដើម្បីឆ្លើយតបទៅនឹងលក្ខខណ្ឌទាំងអស់របស់លោកដោយដោះលែងលោកកឹម សុខានៅថ្ងៃទី៩ វិច្ឆិកា។ ចំពោះលោក Ted Cruz ប្រសិនបើមិនមានការដោះលែងលោកកឹម សុខាទេនោះ លោកនឹងធ្វើការជាមួយសហការីរបស់លោកទាំងនៅក្នុងរដ្ឋសភានិងនៅក្នុងរដ្ឋបាលលោកដូណាល់ ត្រាំ ដើម្បីពិនិត្យមើលមន្រ្តីរដ្ឋាភិបាលដែលទទួលខុសត្រូវចំពោះរឿងរ៉ាវទាំងនេះ គឺនឹងត្រូវរារាំងមិនធ្វើឲ្យដំណើរទៅកាន់សហរដ្ឋអាមេរិក។
លោកសុខ ឥសាន អ្នកនាំពាក្យគណបក្សកាន់អំណាចបានហៅការដាក់ឱសានវាទរបស់លោកTed Cruz ថាគឺជាការដើរផ្ទុយពីនយោបាយការបរទេសថ្មីរបស់លោកដូណាល់ ត្រាំ ប្រធានាធិបតីអាមេរិកនិងជាការប្រមាថធ្ងន់ធ្ងរដល់ឆន្ទៈរបស់ប្រជាជនកម្ពុជាទូទាំងប្រទេស ហើយក៏ជាសកម្មភាពជ្រៀតជ្រែកចូលកិច្ចការផ្ទៃក្នុងកម្ពុជាផងដែរ។ សម្រាប់លោកសុខ ឥសាន ថ្ងៃទី១៦ វិច្ឆិកា ដែលជាថ្ងៃសម្រេចជោគវាសនាគណបក្សសង្រ្គោះជាតិពីសំណាក់តុលាការកំពូល ទើបជាថ្ងៃឱសានវាទពិតប្រាកដ ពោលគឺជាថ្ងៃឱសានវាទចុងក្រោយស្ថិតនៅក្រោមអធិបតេយ្យភាពកម្ពុជា និងឯករាជ្យរបស់តុលាការកំពូលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ