សាលាឧទ្ធរណ៍បន្តឲ្យឃុំខ្លួនអ្នកស្រីទេព វន្នី នៅពន្ធនាគារព្រៃស
ក្រុមប្រឹក្សាជំនុំជម្រះសភាស៊ើបសួរនៃសាលាឧទ្ធរណ៍នៅព្រឹកនេះ បានបដិសេធសំណើសុំនៅក្រៅឃុំបណ្តោះអាសន្នរបស់អ្នកស្រី ទេព វន្នី សកម្មជនដីធ្លីតំបន់បឹងកក់។ លោកស្រីទេព វន្នី លើកឡើងថា ការសម្រេចនេះ គឺធ្វើតាមបញ្ជារបស់អ្នកមានអំណាច។ សវនាការនៅព្រឹកមិញនេះ មិនមានវត្តមានមេធាវីការពារក្តីចូលរួមនោះឡើយ។
ចុះផ្សាយនៅថ្ងៃ៖
ស្តាប់ - ០២:០០
សវនាការលើសំណើសុំនៅក្រៅឃុំរបស់អ្នកស្រី ទេព វន្នី នេះ គឺបានធ្វើឡើងជាអសាធារណៈ ពោលគឺមានតែអ្នកស្រីទេព វន្នី អមដោយអនុរក្សពន្ធនាគារជាមួយនឹងក្រុមប្រឹក្សាជំនុំជម្រះសភាស៊ើបសួរនៃសាលាឧទ្ធរណ៍តែប៉ុណ្ណោះ។ រីឯអ្នកផ្សេងទៀត មិនត្រូវបានអនុញ្ញាតឲ្យចូលរួមស្ដាប់ដូចសព្វមួយដងឡើយ។ ចំណែកមេធាវីការពារក្តីវិញ ក៏មិនមានវត្តមាននោះដែរ នេះគឺដោយសារតែខាងតុលាការមិនបានជូនដំណឹងទៅកាន់មេធាវីរបស់អ្នកស្រីទេព វន្នី។
ក្រោយពីការសម្រេចរបស់សាលាឧទ្ធរណ៍នេះ អ្នកស្រីទេព វន្នី បានឆ្លៀតប្រាប់អ្នកកាសែតថា មូលហេតុដែលតុលាការមិនឲ្យអ្នកស្រីនៅក្រៅឃុំ គឺដោយសារតែភ័យខ្លាចអ្នកស្រីបង្កចលាចល និងមានអំពើហិង្សាណាមួយក្នុងសង្គមនៅពេល ដែលអ្នកស្រីបាននៅក្រៅឃុំនោះ។ សម្រាប់សកម្មជនដីធ្លីរូបនេះ ហេតុផលទាំងនេះ គ្រាន់តែជាលេសប៉ុណ្ណោះព្រោះអ្នកស្រីចាត់ទុកថាករណីនេះ គឺជារឿងនយោបាយ។ អ្នកស្រី ទេព វន្នី បានបញ្ជាក់បន្ថែមថា ការសម្រេចរបស់តុលាការនេះ ស្ថិតក្រោមការបញ្ជារបស់អ្នកមានអំណាច និងអ្នកមានលុយ គឺគេឲ្យសម្រេចយ៉ាងណា នឹងសម្រេចយ៉ាងនោះហើយ។
អ្នកស្រី ទេព វន្នី ត្រូវបានចាប់ខ្លួន និងឃុំខ្លួននៅក្នុងពន្ធនាគារព្រៃសជាមួយសកម្មជនម្នាក់ទៀត គឺអ្នកស្រីបូវ សោភា កាលពីអំឡុងខែសីហា ដែលកាលណោះតុលាការក្រុងភ្នំពេញបានចោទប្រកាន់អ្នកទាំងពីរពីបទប្រមាថអ្នករាជការសាធារណៈហើយផ្តន្ទាទោសក្នុងពន្ធនាគារ ៦ថ្ងៃ និងពិន័យជាទឹកប្រាក់ ៨ម៉ឺនរៀល។ ក្រោយមក អ្នកស្រីបូវ សោភា ត្រូវបានដោះលែងឲ្យមានសេរីភាពឡើងវិញ។ ក៏ប៉ុន្តែអ្នកស្រី ទេព វន្នី ត្រូវបានឃុំខ្លួនបន្តជាមួយបទចោទផ្សេងទៀត។ នៅថ្ងៃទី ១៩ កញ្ញា សាលាដំបូងរាជធានីភ្នំពេញបានសម្រេចផ្តន្ទាទោសអ្នកស្រីទេព វន្នី និងសកម្មជនបឹងកក់ ៣នាក់ទៀតឲ្យជាប់ពន្ធនាគារម្នាក់ៗ រយៈពេល៦ខែពីបទ«ប្រមាថ និងប្រឆាំងអ្នករាជការសាធារណៈមានស្ថានទម្ងន់ទោស»ប្រព្រឹត្តនៅមុខសាលារាជធានីភ្នំពេញកាលពីថ្ងៃទី ២៨ ខែវិច្ឆិកា ឆ្នាំ២០១១។
សម្រាប់អ្នកស្រីទេព វណ្នី នេះ គឺជាការកាត់ទោសថ្មីមួយទៀតលើរូបគាត់ ស្របពេលដែលស្រ្តីតំបន់បឹងកក់រូបនេះកំពុងត្រូវបានតុលាការឃុំខ្លួនបណ្តោះអាសន្នក្នុងពន្ធនាគារព្រៃសនៅក្នុងសំណុំរឿងហិង្សាក្បែរផ្ទះលោកនាយករដ្ឋមន្ត្រីកាលពីឆ្នាំ២០១៣កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ