លោកស្រីទេព វន្នីសរសេរលិខិតសុំការលើកលែងទោសពីលោកនាយករដ្ឋមន្រ្តីហ៊ុន សែន
នៅព្រឹកមិញនេះ សាច់ញាតិ និងអ្នកភូមិបឹងកក់មួយចំនួនបានដាក់ញត្តិទៅកាន់ខុទ្ទកាល័យនាយករដ្ឋមន្រ្តី និងក្រសួងយុត្តិធម៌ ដើម្បីស្នើសុំលើកលែងទោសអ្នកស្រីទេព វន្នី នៅថ្ងៃវិសាខបូជាខាងមុខនេះ។ ក្រៅពីលិខិតស្នើសុំរបស់សាច់ញាតិនេះ អ្នកស្រីទេព វន្នីខ្លួនឯងផ្ទាល់ក៏បានសរសេរលិខិតស្វែងរកអន្តរាគមន៍ពីលោកហ៊ុន សែននិងរដ្ឋមន្រ្តីយុត្តិធម៌កម្ពុជាផងដែរ។ លិខិតស្នើសុំនេះ ធ្វើឡើងខណៈដែលក្រសួងយុត្តិធម៌នឹងប្រជុំវាយតម្លៃបញ្ជីទណ្ឌិតសម្រាប់បន្ធូរបន្ថយទោសនិងលើកលែងទោសសម្រាប់ថ្ងៃបុណ្យវិសាខបូជា២៩ មេសា នៅរសៀលថ្ងៃចន្ទនេះ។
ចុះផ្សាយនៅថ្ងៃ៖
ស្តាប់ - ០១:៥៤
នៅក្នុងលិខិតទៅកាន់លោកនាយករដ្ឋមន្រ្តីហ៊ុន សែនចុះថ្ងៃទី២១ មេសា និងលិខិតទៅកាន់រដ្ឋមន្រ្តីក្រសួងយុត្តិធម៌ចុះថ្ងៃទី១៩ មេសា អ្នកស្រីទេព វន្នី បានលើកឡើងពីជីវភាពក្រីក្រក្នុងគ្រួសារជាស្រ្តីមេម៉ាយ និងបង្ហាញពីទុក្ខលំបាករបស់អ្នកស្រីផ្ទាល់ ក៏ដូចជាកូនស្រី និងម្តាយរបស់អ្នកស្រីដែលកំពុងមានជំងឺ។ ទាំងនេះហើយ ជាហេតុផលដែលអ្នកស្រីទេព វន្នី សុំការសណ្តោសប្រណីពីសំណាក់លោកនាយករដ្ឋមន្រ្តីហ៊ុន សែន និង រដ្ឋមន្រ្តីក្រសួងយុត្តិធម៌កម្ពុជាលោកអង្គ វង្សវឌ្ឍនា ឲ្យជួយអន្តរាគមន៍ឲ្យអ្នកស្រីមានសេរីភាពឡើងវិញ ដើម្បីទៅមើលថែនិងចិញ្ចឹមម្តាយនិងកូនៗរបស់អ្នកស្រី។ តាមរយៈលិខិតផ្ទាល់ដៃរបស់ខ្លួននេះ អ្នកស្រីទេព វន្នី ក៏សង្ឃឹមជឿជាក់ថា ប្រមុខរដ្ឋាភិបាលកម្ពុជានឹងផ្តល់ក្តីមេត្តាដោយធ្វើកិច្ចអន្តរាគមន៍លើកលែងទោសដល់អ្នកស្រីនៅថ្ងៃវិសាខបូជាខាងមុខនេះ។
លិខិតទាំងពីរច្បាប់របស់អ្នកស្រីទេព វន្នី ត្រូវបានម្តាយនិងបងស្រីរបស់អ្នកស្រី យកទៅដាក់នៅក្រសួងយុត្តិធម៌ និងខុទ្ទកាល័យលោកនាយករដ្ឋមន្រ្តីហ៊ុន សែន នៅព្រឹកថ្ងៃចន្ទនេះដោយភ្ជាប់បន្ថែមជាមួយលិខិតស្នើសុំលើកលែងទោសអ្នកស្រីពីសំណាក់ក្រុមគ្រួសារផងដែរ។ តំណាងក្រសួងយុត្តិធម៌ និងខុទ្ទកាល័យលោកនាយករដ្ឋមន្រ្តីហ៊ុន សែន បានចេញមកទទួលយកលិខិតទាំងនេះដោយទឹកមុខរីករាយ ហើយអះអាងថា ពួកគេនឹងជួយបញ្ចូនលិខិតទាំងនេះទៅកាន់ថ្នាក់ដឹកនាំកំពូលឲ្យបានឆាប់ថែមទៀត។ គឺនៅត្រង់ចំណុចអស់ទាំងនេះ ដែលអ្នកស្រីហួត ច័ន្ទសុវណ្ណ ដែលជាបងស្រីអ្នកស្រីទេព វន្នី សង្ឃឹមថា លោកនាយករដ្ឋមន្រ្តីហ៊ុន សែន និងរដ្ឋមន្រ្តីក្រសួងយុត្តិធម៌កម្ពុជានឹងពិចារណាជួយអន្តរាគមន៍ដោះលែងអ្នកស្រីទេព វន្នី ឲ្យមានសេរីភាពឡើងវិញ។
សូមបញ្ជាក់ថា អ្នកស្រីទេព វន្នី ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសឲ្យជាប់ពន្ធនាគាររយៈពេល២ឆ្នាំ៦ខែ ពីបទហិង្សាដោយចេតនាមានស្ថានទម្ងន់ទោសដែលប្រព្រឹត្តទៅនៅក្បែរផ្ទះលោកនាយករដ្ឋមន្ត្រីហ៊ុន សែន កាលពីឆ្នាំ២០១៣ ។ មកដល់ពេលនេះ អ្នកស្រីទេព វន្នី ត្រូវបានអនុវត្តទោសក្នុងពន្ធនាគារជាង១ឆ្នាំ៨ខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ